8 დეკემბერს, ოზურგეთის მუნიციპალიტეტის 2012 წლის ბიუჯეტის პროექტის მორიგი განხილვა გაიმართა.
ვიდრე საქმეს შეუდგებოდნენ, ილია ვაშაყმაძემ თავდაჯერებულად განაცხადა, რომ მე გავცემ კითხვებს პასუხს, თუ რომელ სფეროში რატომ არის ესა თუ ის თანხა განკუთვნილიო.
საბიუჯეტო საფინანსო სამსახურის უფროსის, ლია ქათამიძის ინფორმაციით, ოზურგეთის მუნიციპალიტეტის 2012 წლის ბიუჯეტის შემოსავლები 9 692.4 ათასი ლარი განისაზღვრა. მათ შორის: გადასახადები _ 1 580.0 ათასი ლარი, გრანტები (ტრანსფერები) _ 7 312.4 ათასი ლარი, სხვა შემოსავლები _ 7 000.0 ათასი ლარი, არაფინანსური აქტივების კლება _ 1000.0 ათასი ლარი.
საკრებულოს თავმჯდომარემ, ალეკო მამეშვილმა მადლობა გადაუხადა მოწვეულ პირებს, რომლებიც გასულ წლებთან შედარებით, არც ისე მრავლად იყვნენ და ბიუჯეტის განხილვაც დაიწყო.
სად, რამდენი და როგორ უნდა დაიხარჯოს? ამ კითხვის ირგვლივ, ჯერ სოფლის პროგრამებით გათვალისწინებული თანხების შესახებ ისაუბრეს, რაც გასულ წლებში არც ისე გამჭვირვალედ დაიხარჯა და ამის დასტურად სოფელ დვაბზუს წარმომადგენელმა გამგებლის და საკრებულოს თავმჯდომარის სოფელში მისვლა მოითხოვა.
საკრებულოს ქრისტიან-დემოკრატმა მაჟორიტარმა დეპუტატმა, კახაბერ ღლონტმა ვეტერანთა სოციალურ პაკეტში და საქართველოს მთლიანობისთვის დაღუპულთა ოჯახებისთვის საშეშე მასალის შესაძენი თანხის დამატება ითხოვა, რაზეც ალეკო მამეშვილმა თქვა, რომ ასეთი 413 ბენეფიციარია, მთლიანად კი, სამამულო ომის მონაწილეთა ჩათვლით, 780 ადამიანია. მათ ერთმანეთისგან ვერ გავყოფთ და ყველას უნდა დავეხმაროთო.
ღლონტმა აღნიშნა აგრეთვე, ტუბერკულოზით დაავადებულთა და დიალეზზე მყოფთა შესახებ, რაზეც ილია ვაშაყმაძემ განმარტა, რომ 17 ადამიანია დიალეზიანი ავადმყოფი და მათთვის 17 ათასი ლარია გამოყოფილი, რაც წინ გადადგმულ ნაბიჯად უნდა ჩაითვალოსო.
ოპოზიციონერმა დეპუტატმა ლელა ნაცვალაძემ მოითხოვა დაკონკრეტება, ძირითადად, რატომ და ვის ასაქმებენ აიპ-ებში, რომელთა უმრავლესობა ხელისუფლების მხარდამჭერთა დასასაქმებლადაა შექმნილი და ვიღაც-ვიღაცების ცოლები მუშაობენო. ილია ვაშაყმაძემ სთხოვა, დაესახელებინა, ვის ცოლზეა საუბარი, რაზეც ნაცვალაძემ უთხრა, ეგ თქვენ ჩემზე კარგად იცითო, რაზეც უპასუხეს, თუნდაც ასე იყოს, მერე რა არის ამაში ცუდი, ვიღაცა ხომ დასაქმდაო?(?!)
იურისტმა ქეთი თოიძემ იკითხა, ერთ მარადიულ კითხვას ვსვამ პოლიციის დაფინანსებასთან დაკავშირებით _ 50 ათასი ლარი რატომ დაემატათო, რაზეც ილია ვაშაყმაძემ “ორიგინალური” პასუხი გასცა _ პოლიცია ძალიან კარგად რომ მუშაობს, ხომ ხედავთ, ხალხი გარეთ მანქანებს ვერ ტოვებდა და ახლა თუ გაგიგიათ, ვინმესთვის ავტომობილი მოეპაროთო?
ვაშაყმაძეს ჟურნალისტმა ჰკითხა, ხალხი რომ პირუტყვს ვერ ტოვებს გარეთ, ათეულობით ძროხა რომ დაიკარგა გურიაში და დღემდე ერთ ადამიანსაც არ უპოვია დაკარგული, ეს არის პოლიციის შესანიშნავი მუშაობაო? ბატონმა ილიამ ოპერატიული, თუმცა დემაგოგიური პასუხი არც ამაზე დააყოვნა _ ნატანებში 30 ძროხა იყო დაკარგული, მოპარული ეგონათ, მაგრამ სადღაც მოჩიხული იყვნენო(?).
“თავისუფალი დემოკრატების” წევრმა გელა ბურჯანაძემ ამერიკული პეპელას საწინააღმდეგო ღონისძიებისთვის თანხის გაზრდა მოითხოვა, თუმცა, პასუხად მხოლოდ ის მიიღო, რომ მომავალ წელს “სოლო” აპარატებით შეიწამლება მწვანე საფარი. თუმცა, ხალხს შედეგის მომტანად მხოლოდ მანქანებით შეორთქვლის მეთოდი მიაჩნია.
ბიუჯეტის პროექტის საჯარო განხილვა წარმატებულად მიიჩნიეს და მეორე დღისთვის (9 დეკემბრისთვის) უკვე დასამტკიცებლად “გაამწესეს”. განხილვის დასასრულს, ილია ვაშაყმაძემ საკუთარი ოჯახი დაიფიცა, რომ “ყველაფერს ისე გააკეთებს, როგორც ოზურგეთს და ოზურგეთელობას ეკადრება”.
