ჩოხატაურის მუნიციპალიტეტის საკრებულოს თავმჯდომარის, ანტონ ხუნდაძის #55 ბრძანების თანახმად (12 მარტი, 2012 წელი), ჩოხატაურის მუნიციპალიტეტში (საკრებულოსა და გამგეობაში) მოქალაქეთა (საქართველოს და უცხოელთა) მიღების, განცხადებების და საჩივრების განხილვის პროცესის სრულყოფისა და მუნიციპალიტეტის შეუფერხებელი ფუნქციონირების უზრუნველყოფის მიზნით, მოქალაქეთა მიღება მხოლოდ ადმინისტრაციულ შენობაში მდებარე მოქალაქეთა მომსახურების ცენტრის მეშვეობით მოხდება.
ეს ბრძანება ორშაბათიდან ამოქმედდა და გამგეობის ორივე შესასვლელს უკვე “მგლები” (არასაუწყებო დაცვა) იცავენ.
ამ ახალმა წესმა, ყველაზე მეტად ჩოხატაურის მუნიციპალიტეტის კულტურისა და სპორტის განვითარების ცენტრების თანამშრომლები დააზარალა.
ორივე ცენტრი გამგეობის მოპირდაპირე შენობაშია (ყოფილი განათლების განყოფილების შენობა) განთავსებული. შენობას ტუალეტი არ აქვს და ამიტომ, ცენტრების თანამშრომლები ბუნებრივი მოთხოვნილების დასაკმაყოფილებლად გამგეობაში დადიოდნენ. თუმცა, ორშაბათიდან რიგით მოქალაქეთა მსგავსად, შენობაში შესასვლელად მათაც იმ ადამიანის ნებართვა უნდათ, ვისთანაც მიდიან. სამწუხაროა, რომ გამგეობის ტუალეტს ჯერჯერობით ხელმძღვანელი არ ჰყავს, რომ ბუნებრივი მოთხოვნილების დაკმაყოფილების მსურველისთვის საშვი დაუშვას (აქვე გვინდა ერთი მეტად საინტერესო იდეა შევთავაზოთ ხალხზე ზრუნვისთვის დამაშვრალ ხელისუფლებას, რომელიც საარჩევნოდ შესაშური ტემპებით ასაქმებს მოქალაქეებს _ შექმნას ახალი აიპ-ი სახელწოდებით _ “ადმინისტრაციული შენობის ტუალეტის განვითარების და უცხო ქვეყნების თვითმმართველობების სატუალეტო საქმეების გამოცდილების გაზიარების ცენტრი”. ახალ ცენტრს ეყოლება მთავარი და რამდენიმე წვრილი სპეციალისტი, რომლებიც მოქალაქეებს დააწერინებენ ხელწერილს, რომ ტუალეტით სარგებლობის საშვის გამოწერის სანაცვლოდ, ისინი არჩევნებზე “ნაციონალებს” მისცემენ ხმას!).
ხელისუფლების ამ მეტად მისასალმებელი გადაწყვეტილებიდან გამომდინარე, კულტურისა და სპორტის ცენტრის თანამშრომლებს ალტერნატიული გზის მოძებნა მოუხდათ _ ეს გზა კი, როგორც გავიგეთ გამგეობის უკან გადის, სადაც კულტურის ცენტრის დამწვარი შენობის ტუალეტი დგას. ოღონდ, ამ ტუალეტს არც კარი აქვს და არც იქამდე მისასვლელია გზაა სუფთა. ამასთან ერთად, ტუალეტში საშინელი ანტისანიტარიაა და მიმდებარე ტერიტორიაზე მცხოვრები ადამიანები ამის შესახებ დიდი ხანია საუბრობენ:
_ ამ ტუალეტში ადამიანი ვერ შევა. კარი არ აქვს და გზიდან ყველაფერი ჩანს, თუმცა, ეს კიდევ არაფერი _ საშინელი სიბინძურეა და განსაკუთრებით ზაფხულში მძიმე სუნი დგას. ბევრჯერ მივმართეთ ადგილობრივ ხელისუფლებას, მაგრამ უშედეგოდ. ჩვენზე რომ არ ზრუნავენ გავიგეთ, მაგრამ დავიჯეროთ ასეთი “სურნელება” მოსწონთ? _ აღნიშნავენ ჩვენთან საუბრისას იქვე მცხოვრები ადამიანები.
