მას შემდეგ ბევრმა წყალმა გადაიარა ამ სკოლის ნანგრევებზე, თუმცა, შენობას აღდგენა არ ეღირსა. სწავლა დროებით, სოფლის ყოფილი კოლმეურნეობის შენობაში გაგრძელდა, სადაც არასდროს ყოფილა კომფორტული მდგომარეობა, თუმცა სხვა გზა არ იყო. მოგვიანებით ამ შენობის რემონტიც გადაწყდა, რომელსაც უზრუნველყოფდა შპს “ამაღლება-98”, მას დასაქმებული ჰყავდა 12 მუშახელი, თუმცა, როგორც თვითონ ამბობენ, ხელფასს დღემდე, უშედეგოდ ელიან და დასძენენ, არც არაფერი გამოვა სასამართლოს გარეშე.
_ ადვოკატის ქირაობა და პროკურატურაში სარბენი ფული რომ გვქონდეს, ვირებივით არ ვიმუშავებდით მაქ. გვასწავლეს, იჩივლეთო. მადლობთ, ბატონო, მაგრამ გვეგონა, საჩივრის გარეშე მივიღებდით კუთვნილს, თორემ იქაურობას სათოფეზე არ გავეკარებოდით, _ ამბობენ დაზარალებულები.
ყოფილი კოლმეურნეობის შენობა, სადაც დროებით განათავსეს სკოლა, სოფლის მკვიდრმა ადამიანებმა გაარემონტეს. მათი განცხადებით, დამსაქმებელთან ხელშეკრულება წინასწარ არ დაუდიათ _ უბრალოდ, მოილაპარაკეს, რომ გარკვეული სახის სამუშაოს კონკრეტული თანხის საფასურად შეასრულებდნენ. თავიდან ყველა მინდობილ საქმეს აკეთებდა: ზოგი ღებავდა, ზოგი ლესავდა, ზოგიც სახურავის გამაგრებით იყო დაკავებული, ანაზღაურებასაც იღებდნენ. ვითარება მას შემდეგ დაიძაბა, რაც “ამაღლება-98”-ის მეპატრონე დააპატიმრეს.
რეზო ქურასბედიანი: _ სულ ოცი ადამიანია დაზარალებული. მე 600 ლარი მაქვს ასაღები. საერთოდ არ ამიღია არაფერი, ზოგმა ნახევარი აიღო. ბევრი ვირბინეთ, მაგრამ არაფერი გამოვიდა. პრეზიდენტსაც გადავეცით წერილი წინა არჩევნების დროს _ პასუხი მოგვივიდა, სკოლის ადმინისტრაციას უჩივლეთო. ადმინისტრაცია ფულს საიდან მომცემს? “ამაღლება-98”-ის მეპატრონეს, დავით სიხარულიძეს 11 წელი აქვს მისჯილი _ მას უნდა აენაზღაურებინა ჩვენთვის ეს თანხა. ვიცით, სასამართლოს გარეშე არაფერი გამოვა, მაგრამ ადვოკატიდან მოყოლებული, ყველაფერს თანხა სჭირდება. არ გვაქვს ეს ფული და რა ვქნათ? ეს ხომ ადამიანის აბუჩად აგდება და დაჩაგვრაა? თუ მაინც და მაინც სახრე უნდა გადაგვიჭირონ და უღელში შეგვაბან, ბატონყმობის დროს რომ შვრებოდნენ, ისე?
უშანგი ქურასბედიანს, რეზოსთან შედარებით, “გაუმართლა” _ ნამუშევარი თანხის ნახევარი მიიღო. 5 თვის მანძილზე იმუშავა და კუთვნილი 1470 ლარიდან მიღებული აქვს 700 ლარი. დანარჩენი 770 ლარის მისაღებად იბრძვის, მაგრამ ხელსაყრელ დროს ელოდება _ იქნებ, სასამართლო პროცესისთვის საჭირო თანხა იშოვოს.
_ არჩევნები რომ იყო მაისში, მაშინ გვპირდებოდნენ, მოგცემთო, თუმცა, ვუთხარით, არჩევნებია და გვატყუებთ,-თქო… ისე აგიხდათ ყველაფერი კაი, _ ამბობს ბატონი უშანგი.
ასკანის საჯარო სკოლის სპორტის მასწავლებელს, აქვსენტი ქუთათელაძესაც ფიზიკური შრომა აქვს გაწეული ამ რემონტის დროს. მიიჩნევს, რომ ამ თანხის აღება, რის ვაი-ვაგლახით, მაინც მოხერხდებოდა, პროკურატურისთვის რომ მიემართათ:
_ შესატანი იყო 200 ლარი, რისი შეგროვებაც, დაზარალებულებმა ყველამ ერთადაც ვერ მოახერხეს.
_ ბატონო აქვსენტი, სხვა პრობლემები არაფერი გაქვთ სკოლაში? მასწავლებლებზე ამბობენ, დაშინებულები არიანო.
_ დაშინებული არავინაა. ყოველ შემთხვევაში, მე არა. თუ საგანი გამართულად იცი და პატიოსნად, პასუხისმგებლობით აკეთებ შენს საქმეს, რა გაქვს შესაშინებელი? ვიტყვი იმას, რომ არაჩვეულებრივი სკოლა გვქონდა და დაწვეს ვიგინდარებმა. შეხედეთ, რას ჰგავს! მერე ყოფილი კოლმეურნეობის ეს ძველი შენობა გაარემონტეს, მაგრამ ნახევრადაც ვერ აკმაყოფილებს მოთხოვნებს, 160 ბავშვისთვის ეს ძალიან ცოტაა. დირექცია იბრძვის, რომ ახალი აშენდეს. არის შეპირებები, მაგრამ რომ აშენდება, მაშინ დავიჯერებ.
გოჩა ჭეიშვილი: _ ეს რემონტი ოთხიოდე წლის წინ ჩატარდა. ყველას ჩვენი საქმე გვქონდა. მე, ერთი თვის მანძილზე, სახურავის შეკეთებაზე ვმუშაობდი. უნდა მიმეღო 1200 ლარი. ეს იყო ზეპირი შეთანხმება, მოვლაპარაკდით. მივიღე 750 ლარი. დანარჩენი, ისევე როგორც სხვებს, მეც მისაღები მაქვს. სასამართლოში განცხადების შეტანაა საჭირო, რასაც თანხა სჭირდება, ფული კი არ გვაქვს. დაუბრუნებს თუ არა ამ ადამიანებს მიტაცებულ 12 000 ლარს “ამაღლება-98”, ძნელი სათქმელია, ჩემი აზრით, თითქმის გამორიცხულიც, რადგან მეპატრონე დაჭერილია, სასამართლოს გარეშე ეს ამბავი არ გადაწყდება.
საქართველოს იურისტთა ასოციაციის ოზურგეთის ოფისის ხელმძღვანელი თამაზ ტრაპაიძე განმარტავს, რომ გააჩნია, ვინ იქნება მოპასუხე, შპს “ამაღლება-98” თუ სხვა: _ თუ მეპატრონე დაჭერილია და ეს გახდა ხელფასის გადაუხდელობის მიზეზი, გასარკვევია. მთავარია, გაირკვეს, ვინ არის მოპასუხე. თუ თანხას ვერ იხდის, შესაძლოა, ქონება, რაც გააჩნია, გაუყიდონ. ყველა შემთხვევაში, სასამართლომ უნდა გადაწყვიტოს ეს საქმე. ისე კი შემიძლია, წერილობით მომართულ კითხვებზე უფრო დაკონკრეტებული პასუხი გაგცეთ.
