ჩვენი არაერთი მცდელობის მიუხედავად, სამინისტროში ერთი ადამიანიც არ აღმოჩნდა, რომელიც ორი სიტყვით მაინც გაგვარკვევდა თუ რა ბედი ეწია ჩვენს მიერ შეტანილ წერილს, რომლითაც ხათუნა კალმახელიძესთან შეხვედრას ვითხოვდით”.
2012 წლის 4 მაისს, სასჯელაღსრულების, პრობაციისა და იურიდიული დახმარების საკითხთა სამინისტროს წინ აქცია მოეწყო, რომლის მონაწილე არასამთავრობო და მედია-ორგანიზაციები გლდანის #18 საპყრობილეში პატიმარ ზურაბ დელიანიძის გარდაცვალების ფაქტს გმობდნენ. პატიმრის გარდაცვალების ოფიციალურ მიზეზად აღნიშნული უწყება გულის შეტევას ასახელებდა, რასაც ოჯახი კატეგორიულად არ ეთანხმებოდა.
აქციის ორგანიზატორებმა, მედიის წარმომადგენლებთან ერთად, მინისტრ ხათუნა კალმახელიძესთან მოითხოვეს შეხვედრა.
“ადმინისტრატორი”, რომელიც აქციის ორგანიზატორებს მინისტრთან შუამავლობას შეპირდა, ისე “დაიკარგა”, რომ პასუხის გამცემი აღარავინ დარჩა. მისაღებში კი გაგვიმარტეს, თუ განცხადებას არ დაწერთ, მინისტრს ვერ შეხვდებითო.
“გურია ნიუსმა” ხათუნა კალმახელიძის სახელზე იმავე დღეს შეიტანა წერილი: “გთხოვთ, დღევანდელი აქციის მონაწილეებთან, სხვა მედია საშუალებებთან ერთად, შეგხვდეთ რათა გაგესაუბროთ ზურაბ დელიანიძის საქმის ირგვლივ”.
ამ წერილს, აქციის გასაშუქებლად მისულმა ყველა მედია საშუალებამ მოაწერა ხელი გარდა “რუსთავი 2”-ისა და პირველი არხისა. თუმცა, ხათუნა კალმახელიძესთან შეხვედრა არც განცხადების დაწერის შემდეგ მოხერხდა, რადგან კანცელარიის განმარტებით, წერილი მინისტრთან შეხვედრასთან დაკავშირებით გვიან შევიდა.
უწყების საქმეთა სამმართველოს წარმომადგენელმა, თამარ გელოვანმა ერთი კვირის წინ განგვიცხადა, რომ აუცილებლად დაგვიკავშირდებოდა და წერილის შესახებ ინფორმაციას მოგაწვდიდა. ქალბატონმა თამარმა პირობა არ შეასრულა.
ოთხკვირიანი ლოდინის შემდეგ, “გური ნიუსმა” წერილის ბედი მოიკითხა კალმახელიძის უწყებაში. საქმის წარმოების სამმართველოდან, თამარ გელოვანისგან
ამჯერად ასეთი პასუხი მივიღეთ:
_ ქალბატონო თამარ, “გურია ნიუსიდან” გაწუხებთ…
_ ააა, გამარჯობათ ქალბატონო ირმა.
_ წერილთან დაკავშირებით გირეკავთ, რომელიც თქვენთან 4 მაისს შემოვიტანეთ, სადაც ქალბატონ ხათუნა კალმახელიძესთან ვითხოვდით შეხვედრას სხვა მედიასაშუალებებთან ერთად, კონკრეტულად ზურაბ დელიანიძის საქმესთან დაკავშირებით.
_ დიახ, მახსოვს თქვენი განცხადება. იცით, მე თქვენ გესაუბრეთ, თქვენი კოორდინატებიც ჩავიწერე, ტელეფონის ნომერიც, გითხარით, რომ დაგიკავშირდებოდით. სამწუხაროდ, ჯერ-ჯერობით არაფერი არ არის გარკვეული. მინისტრი რამდენიმე დღით მივლინებაში იყო, არ იმყოფებოდა თბილისში. შესაბამისად, ამიტომ ვერ დაგიკავშირდით. დიდი ბოდიში უყურადღებობისთვის. სამწუხაროდ, ამ ეტაპზეც არ შემიძლია რაიმე ინფორმაცია მოგაწოდოთ. მე თქვენი ნომერი მაქვს ჩაწერილი, აუცილებლად დაგიკავშირდებით, როცა რამე ინფორმაცია მეცოდინება.
_ ქალბატონო თამარ, დარწმუნებული ვართ, გეცოდინებათ იმის შესახებ, რომ ყველანაირი გონივრული ვადა უკვე ამოწურულია. როდესაც თქვენთან ვიყავით, პარასკევი იყო. მაშინ გვითხარით, რომ სამუშაო საათები დასრულებულია, ორშაბათს აუცილებლად დაგიკავშირდებით და პასუხს გეტყვითო. 4 მაისის შემდეგ, მე მგონი, ბევრი ორშაბათი გავიდა.
_ მართალი ხართ. ნამდვილად ვერაფერს გეტყვით.
_ ის მაინც მითხარით, კონკრეტულად ვის დაეწერა ჩვენი წერილი?
_ აი, ამიტომ არ შემიძლია ინფორმაცია მოგაწოდოთ. ქალბატონ ხათუნა კალმახელიძეს მივაწოდეთ თქვენი განცხადება. როგორც ჩანს, ჯერ-ჯერობით არ არის გადაწყვეტილი, შემდგომი მსვლელობა როგორ მიეცემა. ალბათ, მოლაპარაკების პროცესშია.
_ ვისთან მოლაპარაკების პროცესში, ქალბატონო თამარ?
_ როგორც ჩანს, მინისტრთან არის ეს განცხადება და შესაბამისად, ჯერ განიხილავენ, რადგან უკან, კანცელარიაში არ დაბრუნებულა.
_ წერილები, რომლებიც ქალბატონ მინისტრთან შემოდის შეხვედრასთან დაკავშირებით, ყველა ერთთვიანი ვადით იხილება?
_ არა, საერთოდ ამდენი ხანი არ იხილება და ამ შემთხვევაში, ცოტა დიდი ხანი დასჭირდა საქმის განხილვას. რატომ, ვერ გეტყვით.
_ დაახლოებით რა ვადებში ჯდება სხვა წერილები?
_ საერთოდ, მინისტრთან შეხვედრა იშვიათად ხდება, რადგან საკმაოდ გადატვირთული გრაფიკის გამო ვერ ხერხდება მოქალაქეებს გაესაუბროს. თუმცა, არის შემთხვევები, სხვა ხელმძღვანელი პირები შეხვედრიან მოქალაქეებს.
ამ შემთხვევაში, ვერ გეტყვით თქვენი განცხადება რატომ გაჩერდა ამდენი ხანი. მე დაგიკავშირდებით, როგორც კი რამე ინფორმაცია მექნება…
