სასწრაფო დახმარების ადგილობრივ სამსახურს გაფუჭებული ნაწილის შესაძენი ფული არ აღმოაჩნდა.
ქობულეთის მოსახლეობას კი მეორე ფოტოზე აღბეჭდილი უაზის ტიპის (ვერ გეტყვით, რომელი ეპოქის), ავტომანქანით 3 ბრიგადა ემსახურება.
პაციენტისა და ბრიგადის წევრების მდგომარეობა განსაკუთრებით მაშინ მძიმდება, როდესაც ქობულეთში წვიმს. ასეთი რამ კი ქობულეთში ძალიან ხშირად ხდება. როდესაც ქობულეთში ავდარია, უაზის სასწრაფო დახმარების მანქანებშიც ისევე წვიმს, როგორც გარეთ.
“პრეზიდენტის საჩუქარი” სასწრაფო სამედიცინო დახმარების მედპერსონალსა და ადგილობრივ მოსახლეობას შორის ხშირად გამხდარა კონფლიქტის მიზეზი. გახშირებული გამოძახების შემთხვევაში, როდესაც მანქანები არ არის საკმარისი, სასწრაფო სამედიცინო დახმარების თანამშრომლები ვერაფრით არწმუნებენ მოსახლეობას, რომ “პრეზიდენტის საჩუქარი” უქმად კი არ დგას, გაფუჭებულია.
მაგრამ ახლა ქობულეთის სასწრაფო სამედიცინო დახმარებას ბევრად უფრო დიდი პრობლემები აქვს, ვიდრე წვიმა და ძველი უაზი _ გუშინ, დილით, ქობულეთის სასწრაფო დახმარების ადმინისტრაციის სამი თანამშრომლის გათავისუფლების შესახებ ბრძანება მოვიდა. მას შემდეგ, რაც სადაზღვევო კომპანია “ალდაგი ბისიაის” შვილობილმა კომპანიამ _ “ჩემი ოჯახის კლინიკამ” საავადმყოფოების შესყიდვა დაიწყო, ასეთი ფაქტები ძალიან გახშირდა.
მიუხედავად იმისა, რომ “ალდაგი ბისიაის” პრესსამსახურის უფროსი, მაია ივჩენკო “გურია ნიუსთან” საუბრისას ამტკიცებს, _ “ჩვენი მხრიდან გათავისუფლება არა ოპტიმიზაციის, არამედ ტესტის გაუვლელობის გამო ხდებაო”, ქობულეთამდე ჯერ არც ტესტებს ჩამოუღწევია და არც ალდაგის თანამშრომლებს. ამ ეტაპზე მხოლოდ გათავისუფლებების შესახებ ბრძანებები მოდის, რომელიც ქობულეთის სასწრაფო სამედიცინო დახმარების მთავარმა მენეჯერმა, შორენა გეგიძემაც მიიღო. “გურია ნიუსი” სწორედ მას ესაუბრა:
_ ქალბატონო შორენა, რამდენიმე დღის წინ “ალდაგმა” თანამდებობიდან გაგათავისუფლათ. თქვენთვის თუ არის ცნობილი, რის საფუძვლზე დაგითხოვეს სამსახურიდან?
_ ცნობილია, რომ “ალდაგს” სასწრაფოც, სამშობიაროც, ინფექციურიც, ყველაფერი ერთ დაწესებულებაში აქვს. ეს ყველაფერი გაერთიანდება და მენეჯერები არ სჭირდებათ. ანუ, ერთ საავადმყოფოს ჰყავს ერთი მენეჯერი. ჩემთვის როგორც ცნობილია ამიტომ მიიღეს ასეთი გადაწყვეტილება.
_ გათავისუფლების შემდეგ სხვა რაიმე შემოთავაზება არ ყოფილა მათგან?
_ არა. მე ასევე ვმუშაობ სამშობიაროში. როგორც ვიცი, ჯერჯერობით სიები და საშტატო ერთეულები არ ჩამოსულა. ამიტომ დავრჩი.
_ ე.ი. სადაზღვევო კომაპნია “ალდაგმა” ოპტიმიზაციის გამო გამოგიშვათ სამსახურიდან?
_ მარტო მე არა. აბსოლუტურად ყველა სასწრაფოს მენეჯერი გაათავისუფლეს, ვინც აჭარაში იყო.
_ “გურია ნიუსთან” “ალდაგის” პრესსამსახურმა განაცხადა, რომ ისინი ექიმებს მიმდინარე ოპტიმიზაციის გამო კი არ ათავისუფლებენ, არამედ ექიმებს უტარდებათ ტესტირება. ვინც ვერ გაივლის, სწორედ მათ უშვებენ სამსახურიდან. თქვენ გაიარეთ ტესტირება?
_ არა, ჩვენ ასეთი რამე არ ჩაგვტარებია. ჩატარდება თუ არა, ჩვენთვის არაფერი უთქვამთ, ამის შესახებ ცნობილი არ არის. შესაძლებელია, ჩვეულებრივი ექიმებისთვის ჩატარდეს ტესტირება. შპს-ა და რასაც უნდა იმას ჩაგიტარებს, უნდათ, გამოცდას და რაც უნდათ, იმას. მაგრამ ოპტიმიზაციას თუ დავარქმევთ ამას, ვერ გეტყვით. ერთი მენეჯერია საჭირო მთელს საავადმყოფოში, ყველა მენეჯერი ხომ არ იქნებაო და ამიტომ მოხდა ოპტიმიზაცია. ადრე რომ იყო განყოფილების გამგე, მთავარი ექიმი და ასეთი სახელები, დარჩა თუ არა, არ ვიცი, რადგან ადმინისტრაციაში არ ვარ. მაგრამ, მე ვიცი, რის გამო გავთავისუფლდი. მითხრეს, _ გვყავს ერთი მენეჯერი და ის უხელმძღვანელებს ყველაფერსო.
