ამის მიზეზი ის იყო, რომ ქუთაისისკენ მიმავალ გზაზე ხელოვნური საცობები იყო შექმნილი. ორ ადგილზე, ხელისუფლება გზის შეკეთების სამუშაოებს აწარმოებდა და დაახლოებით 100-მეტრიან რადიუსზე ორი ორმოს “ჩაკერებისთვის” რამდენიმე ერთეული მძიმე ტექნიკა ჰყავდათ გამოყვანილი, რამაც ძალიან დიდი საცობები წარმოშვა.
ქუთაისის შესასვლელში კი, ცენტრალურ გზაზე, ორი მიკროავტობუსი იყო გაფუჭებული და “დომკრატზე” შეყენებული. მიუხედევად იმისა, რომ ეს ფაქტები მოძრაობას ხელს უშლიდა, პატრული არსად ჩანდა.
ზოგადად, 10 ივნისს, ქუთაისში ფორმიანი ძალოვნების ნაკლებობა იყო. აქციის მიმდებარე ტერიტორიაზე კი საერთოდ არ გამოჩენილან, თუმცა, უამრავ ხალხს შორის, რამდენიმე, სამოქალაქო ფორმაში ჩაცმული გურული ძალოვანი შევნიშნეთ, თუმცა, ისინი ჩვენი კამერის დანახვისთანავე მიიმალნენ.
აქციამ, რომელიც 1 საათს გაგრძელდა თავისი სიტყვა ნამდვილად თქვა _ სააგენტო “ინტერპრესნიუსმა” “გუგლის” საშუალებით, მსოფლიოში აპრობირებული მეთოდით დათვლისას გაარკვია, რომ აქციას 55 000 ადამიანი ესწრებოდა, რაც ქუთაისისთვის ნამდვილად დიდი ციფრია…
მოქალაქეები ყველა გამოსვლელს ოვაციებით ხვდებოდნენ და “ბიძინა”, “გაუმარჯოს მშვიდობას”, “აგვიხდინე ოცნებები” სკანდირებდნენ.
ქუთაისელებს სიტყვით დავით მაღრაძემ, გუბაზ სანიკიძემ, ელისო ჩაფიძემ მიმართეს. განსაკუთრებული ოვაციებით აქციის მონაწილეები ბიძინა ივანიშვილს შეხვდნენ. კოალიციის ლიდერმა ვრცლად ისაუბრა საარჩევნო პროგრამაზე და დასძინა, რომ ყველა დაპირება აუცილებლად შესრულდება:
_ ვეღარავინ შეძლებს ჩვენს შეჩერებას, ჩვენი გამარჯვება გარდაუვალია, ამას ჩვენ ვაჩვენებთ მთელ ქვეყანას, მთელ ქვეყანას დავაყენებთ ფეხზე, ისე, როგორც მთელი ქუთაისი დგას დღეს ფეხზე! ისე, როგორც 27 მაისს დადგა ფეხზე მთელი თბილისი!
27 მაისს თბილისმა ხმამაღლა უთხრა ხელისუფლებას _ არა უსამართლობას! არა სიცრუეს! დღეს ამას ქუთაისი ამბობს! _ აღნიშნა ივანიშვილმა და ყურადღება გაამახვილა რამდენიმე დღის წინ ქუთაისში, პარლამენტის მშენებლობისას დაღუპულ ადამიანის დაღუპვაზე და დასძინა, რომ ეს ყველაფერი სააკაშვილის “აკვიატებული იდეების” ბრალია:
_ 27 მაისს, სულ რამდენიმე დღის წინ, წუთიერი დუმილით დავიწყეთ ჩვენი შეხვედრა თბილისელებთან. დღესაც, ქუთაისშიც, სამძიმრის სიტყვებით გვიწევს ჩვენი შეხვედრის დაწყება. სამძიმარი ვუთხრათ გარდაცვლილის ოჯახს, სამძიმარი ვუთხრათ ერთმანეთს, რადგან კიდევ ერთი მსხვერპლი გვყავს, კიდევ ერთი ადამიანი შეეწირა სააკაშვილის ახირებებს. ის ისტერია, რომელსაც სააკაშვილი თესავს თავის გარშემო, ის აკვიატებული იდეები, რომ მრავალწლიანი პროექტები რამდენიმე საათში უნდა შეუსრულონ, ყოველთვის ასეთი შედეგებით დასრულდება.
სამწუხაროდ, ეს არ არის ერთადერთი ტრაგედია. ყველას კარგად გვახსოვს, რამდენიმე წლის წინ იმ ადგილას შემზარავი ტრაგედია რომ დატრიალდა: ძეგლის აფეთქებას დედა-შვილის დაღუპვა მოჰყვა _ ძეგლებთან ომში საქართველომ მსხვერპლი განიცადა, _ განაცხადა ივანიშვილმა და საზოგადოებას მოუწოდა დაღუპულებისთვის წუთიერი დუმილით პატივი ეცათ.
ბიძინა ივანიშვილის თქმით, ქართველებმა ბრაზი და მრისხარება უნდა დაიოკონ და მხოლოდ ღირსეული ნაბიჯები გადადგან, რადგან “ამაშია ჩვენი ძალა და მათი სისუსტე. სწორედ ამიტომ ჩვენ ისინი ვეღარ შეგვაჩერებენ!”
ბიძინა ივანიშვილმა ქუთაისში პირობა დადო, რომ ხალხთან ერთად იბრძოლებს სამშობლოსთვის, ადამიანის უფლებებისთვის, თითეულის ოჯახისთვის: _ გპირდებით, რომ ამ ბრძოლაში ბოლომდე ვიდგები თქვენ გვერდით, ჩვენ ერთმანეთის გვერდით ვიდგებით გამარჯვებამდე! ჩვენ უნდა დავანახოთ ამ ხელისუფლებას და მთელ მსოფლიოს, რომ საქართველო იყო და ისევ იქნება ქვეყანა, რომელიც მსოფლიო ცივილიზაციის ნაწილია. დღევანდელი ხელისუფლება ვერ შეძლებს, უკან დაგვახევინოს და შეაჩეროს თანამედროვე საქართველოს სვლა ევროპისკენ, დემოკრატიისკენ, თანამედროვე სამყაროსკენ, _ აღნიშნა ივანიშვილმა.
მისივე თქმით, ხელისუფლებაში მათი კოალიციის მოსვლის შემთხვევაში, ქუთაისი საუნივერსიტეტო ქალაქი გახდება. ივანიშვილმა ისიც აღნიშნა, რომ სოფლის მეურნეობის განვითარებისთვის ერთ მილიარდიანი ფონდი დაარსდება, რომელიც ამ სფეროში ინვესტიციებს ჩადებს. “ქართული ოცნების” ლიდერის დაპირებით სასამართლო და მედია ზეწოლისგან გათავისუფლდება, პოლიცია კი _ პოლიტიკური დაკვეთისგან.
მანვე საქართველოს პრეზიდენტი საბიუჯეტო თანხების არამიზნობრივად ხარჯვაშიც დაადანაშაულა და დასძინა, რომ სააკაშვილი და მის გუნდი, კრედიტების თანხებსაც სჭამს.
_ სააკაშვილი და მისი ხელისუფლება კიდევ უფრო დიდ თანხას იმ კრედიტებიდან ხარჯავს, რომელიც ჩვენმა პარტნიორმა ქვეყნებმა გამოგვიყვეს ომისშემდგომი რეაბილიტაციისთვის, ეს კი, ის თანხებია, რომელიც ჩვენი შვილების და შვილთაშვილების გადასახდელი იქნება. და ეს ყველაფერი სააკაშვილს ილუზიის შესაქმნელად სჭირდება _ თითქოს ქვეყანა აღმშენებლობის გზას ადგას და უტიფრად უტოლებს თავს დავით აღამშენებელს. ეს უღირსობაა, _ თქვა ივანიშვილმა.
მან ყურადღება შუა ასაკის ადამიანებზე გაამახვილა, რომლებიც ამ ხელისუფლებამ სახლში გაუშვა და პირობა დადო, რომ მისი გუნდის ხელისუფლებაში მოსვლის შემთხვევაში ეს კატეგორია და სხვა ბევრიც, აუცილებლად დასაქმდება:
_ მე არაერთხელ მითქვამს და ჩემმა თანაგუნდელებმაც კარგად იციან _ არ მიყვარს ტყუილი დაპირებები. კაცს რომ დაპირდები, უნდა შეასრულო. ასე ვიცხოვრე დღემდე და ასე ვაპირებ მომავალშიც, _ თქვა ივანიშვილმა და დააზუსტა, რომ ამ ხელისუფლების დამარცხებას, ხალხთან ერთად, არჩევნების გზით შეძლებს.
ივანიშვილმა, რომელიც თანაგუნდელების მსგავსად კმაყოფილი იყო აქციაზე მოსულთა რაოდენობით, შემდეგი აქციის თარიღი და ადგილი დაასახელა: _ ზუსტად ერთ კვირაში, 17 ივნისს, ოზურგეთში შევხდებით, _ აღნიშნა ივანიშვილმა, რომლის გარემოცვის თქმით, ოზურგეთთან დაკავშირებით დიდი მოლოდინი არსებობს.
თინა ხიდაშელმა “გურია ნიუსთან” საუბრისას აღნიშნა, რომ გურიაში ბევრი სამუშაო არ აქვთ. რესპუბლიკელების ერთ-ერთი ლიდერი დარწმუნებულია, რომ 17-ში ოზურგეთში მთელი გურია მივა.
ასე ფიქრობს დავით ბერძენიშვილიც, რომელიც, როგორც გავიგეთ, ივანიშვილის საარჩევნო კამპანიის დასაწყისის მესამე ოფიციალური შეხვედრის გურიაში ჩატარების ინიციატორია: _ გურულები სულ ამბობთ, რომ არავინ გაქცევთ ყურადღებას. ეს კი ასე არ არის _ ჩვვენთვის გურია ძალიან მნიშვნელოვანია. ამიტომაც, 17-ში, ოზურგეთში შევხვდებით, _ გვითხრა ბერძენიშვილმა.
როგორც გავიგეთ, ბიძინა ივანიშვილი ოზურგეთში გურიის მაჟორიტარ კანდიდატებსაც დაასახელებს და მათ შორის იქნება დავით ბერძენიშვილიც, რომელიც კენჭს ოზურგეთში იყრის.
