ბიძინა ივანიშვილის ადვოკატის, სანდრო ბარამიძის განცხადებით: “მოქმედი კანონმდებლობის თანახმად, სასამართლოს გადაწყვეტილება როცა არ სრულდება ნებაყოფლობით, მას აღასრულებენ იძულებით. ბიძინა ივანიშვილმა თქვა, რომ ის ნებაყოფილობით არ შეასრულებს გადაწყვეტილებას. ხვალ იწურება ვადა. შესაბამისად, ეს გადავა იძულებით აღსრულების პროცესში. აღიწერება ბიძინა ივანიშვილის ქონება, რაც აქვს საქართველოში. საზღვარგარეთ არსებულ ქონებაზე, არც სასამართლოს, არც სააღსრულებლო ბიუროს, არც ნათია მოგელაძეს არ მიუწვდებათ ხელი. ამ სიგრძე ხელები არ გააჩნიათ!”
კონტროლის პალატის ორი ოქმის საფუძველზე, თბილისის საქალაქო სასამართლოს გადაწყვეტილებით, ბიძინა ივანიშვილი ჯამში _ 148 650 131 ლარით დაჯარიმდა. პირველი ინსტანციის სასამართლოს გადაწყვეტილებები ადვოკატებმა სააპელაციო სასამართლოში გაასაჩივრეს, რომელმაც ჯარიმები შეამცირა. სააპელაციო სასამართლოს გადაწყვეტილებით, ბიძინა ივანიშვილს 74 325 065 ლარი აქვს გადასახდელი.
“გურია ნიუსის” ინფორმაციით, ივანიშვილს საქართველოში თვის სახელზე თითქმის არაფერი აქვს.
_ ბატონო სანდრო, მოექცევა თუ არა იძულებითი აღსრულებაში ივანიშვილის ე. წ შუშის სასახლე?
_ თვითონ შენობა, უძრავი ნივთი, ბიძინა ივანიშვილის არ არის. რაც შეეხება იქ განთავსებულ მოძრავ ქონებას, ეს კიდევ დასამტკიცებელი აქვს აღსრულების ბიუროს, რომ ეს მოძრავი ნივთები მას ეკუთვნის.
_ სურათებს რაც შეეხება, რითიც ასე ძალიან ამაყობს ივანიშვილი, ხომ მისი კუთვნილებაა?
_ ამბობს, მაგრამ ამ სურათების ორიგინალი ინახება სხვაგან.
_ ვის სახელზეა სახლი?
_ ბატონი ბიძინას სახელზე არ არის.
_ საქართველოში აქვს რაიმე ქონება?
_ აქვს, მაგალითად, ბაკურიანში უძრავი ნითვი, რომელზეც მიექცევა აღსრულება. ჭორვილაში აქვს რამდენიმე ნაკვეთი და არსებობს გარკვეული ნივთები, რომელიც ითვლება რომ მისია, სინამდვილეში კი მისი არ არის.
_ ბიძინა ივანიშვილის ოჯახის წევრების კუთვნილებაში არსებული ქონება, ფიქრობთ არ მიექცევა აღსრულებაში?
ბიძინა ივანიშვილს საკუთარი ოჯახი ჰყავს, რომლებსაც გააჩნიათ საკურება. მაგრამ ოჯახის წევრებზე ვერ მიექცევა აღსრულება იმ ჯარიმისა, რომელიც ბიძინა ივანიშვილს დაეკისრა.
