“სხვადასხვა სამინისტროსა და საჯარო დაწესებულების (ფინანსთა სამინისტრო, კულტურისა და ძეგლთა დაცვის სამინისტრო, ქ. რუსთავის შემოსავლების სამსახური) რამდენიმე თანამშრომლის მიერ მოწოდებული ინფორმაციის თანახმად, ხელმძღვანელი პირები მათ ავალდებულებენ მმართველი პარტიის მხარდამჭერთა სიების შედგენას. ბრძანების შეუსრულებლობის შემთხვევაში კი პრობლემების შექმნით ემუქრებიან. ბოლო დროს მსგავსი ფაქტების შესახებ ინფორმაცია მედიასაშუალებებითაც ხშირად ვრცელდება. „საერთაშორისო გამჭვირვალობა – საქართველოს“ მიაჩნია, რომ საქმე შეიძლება გვქონდეს წინასაარჩევნოდ ადმინისტრაციული რესურსების ბოროტად გამოყენების საგანგაშო ტენდენციასთან, რაც სერიოზულ ზიანს მიაყენებს საარჩევნო გარემოს” _ აღნიშნულია გამოქვეყნებულ კვლევაში, რომელიც კონკრეტულ ინფორმაციებზე დაყრდნობით არის მომზადებული.
“ფინანსთა სამინისტროს ერთ-ერთმა თანამშრომელმა გვითხრა, რომ სამინისტროს შესაბამის სამსახურში ჩატარდა თათბირი სადაც იგი დაიბარა უშუალო უფროსმა და „ერთიანი ნაციონალური მოძრაობის“ ხუთი მხარდამჭერის სიის შედგენა მოსთხოვა, წინააღმდეგ შემთხვევაში პრობლემების შექმნით დაემუქრა. აღნიშნული პიროვნების ცნობით, მსგავსი შემთხვევები მთელი სამინისტროს და საქვეუწყებო დაწესებულებების მასშტაბით ხდება, რასაც კიდევ ერთი წყარო გვიდასტურებს. სიის მიტანის შემდეგ საჯარო მოხელეებს ურეკავენ „ერთიანი ნაციონალური მოძრაობიდან“ და პარტიის ოფისებში იბარებენ. ასევე, საჯარო მოხელეებს შეატყობინეს, რომ სიებში მოხვედრილ ადამიანებს დაურეკავენ „ნაციონალური მოძრაობის” წარმომადგენლები და გადაამოწმებენ ნამდვილად არიან თუ არა ისინი ამ პარტიის მხარდამჭერები” _ ვკითხულობთ ამავე კვლევაში.
რაც შეეხება ”გურია ნიუსის” მასალებს, რომლებიც კვლევაში გამოქვეყნდა:
2012 წლის 4 აპრილს გავრცელებული ინფორმაციის თანახმად, გურიის რეგიონში სოფლის რწმუნებულები, საჯარო მოხელეები და არასამეწარმეო არაკომერციული იურიდიულ პირებში (ააიპ) დასაქმებული პირები ადგენენ მმართველი პარტიის მომხრე-მოწინააღმდეგეების პერსონალური მონაცემების შემცველ სიებს, რომელიც მოიცავს ინფორმაციას ოჯახის წევრთა პირადი მონაცემების და პოლიტიკური სიმპათიების შესახებ. აღნიშნულ ფაქტს ადასტურებს რეგიონის საგანგებო სიტუაციების მართვის თანამშრომელი, მაგრამ არ აკონკრეტებს რა მიზნით მოხდა მონაცემების შეგროვება. (წყარო “გურია ნიუსი”)
2012 წლის 7 მაისს გავრცელებული ინფორმაციის თანახმად, ჩოხატაურის მუნიციპალიტეტში საბავშვო ბაღის პედაგოგებმა აღსაზრდელების მშობლებს მოსთხოვეს ოჯახის წევრთა მონაცემები, კერძოდ, მათი რაოდენობა, სახელი, გვარი და ასაკი. ადგილობრივი ბაღების გაერთიანების ხელმძღვანელის, ნინო ბარამიძის განმარტებით აღნიშნული ინფორმაცია დემოგრაფიული მონაცემებისთვის არის საჭირო, რომელზეც ისინი დიდი ხანია მუშაობენ და მუდმივად ადგენენ. თუმცა ლანჩხუთის და ოზურგეთის საბავშო ბაღის თანამშრომლების თქმით, ისინი მსგავს მონაცემებს არასდროს ადგენენ. (წყარო “გურია ნიუსი”)
2012 წლის 7 მაისს გავრცელებული ინფორმაციის თანახმად, ოზურგეთის მუნიციპალიტეტის აიპ-ებში მიმდინარეობს დახურული შეხვედრები, სადაც დასაქმებულებს საპარლამენტო არჩევნებზე მმართველი პარტიის მხარდამჭერი მინიმუმ 10 ადამიანის მიყვანას სთხოვენ, წინააღმდეგ შემთხვევაში სამსახურიდან განთავისუფლებით ემუქრებიან. (წყარო “გურია ნიუსი”)
2012 წლის 10 მაისს გავრცელებული ინფორმაციის თანახმად, ოზურგეთის მუნიციპალიტეტის საბიუჯეტო ორგანიზაციის თანამშრომლებს, სოფლების რწმუნებულებს, საჯარო სკოლის დირექტორებს, საბავშო ბაღის გამგეებს, სოფლებში მცხოვრებ საჯარო სამსახურში დასაქმებულებს და ადგილობრივ აქტივისტებს მუნიციპალიტეტის ადმინისტრაციულ შენობაში დახურულ ფორმატში ხვდება საკრებულოს თავჯდომარე ალეკო მამეშვილი, რომელიც მათ საარჩევნოდ მმართველი პარტიისთვის 10 მხარდამჭერის სანაცვლოდ პირდება დახმარებას და დაფინანსებას. (წყარო “გურია ნიუსი”)
მიგვაჩნია, რომ ასეთი ქმედებები ერთდროულად რამდენიმე კანონს და მნიშვნელოვან პრინციპს არღვევს:
ფაქტების დადასტურების შემთხვევაში პარტიული დავალებების მიმცემი საჯარო მოხელეები არღვევენ „საჯარო სამსახურის შესახებ” საქართველოს კანონის 61-ე მუხლს, რომლის მიხედვითაც, „სახელმწიფო მოსამსახურეს არ აქვს უფლება თავისი სამსახურებრივი მდგომარეობა გამოიყენოს პარტიული საქმიანობისათვის”. შესაბამისად, დამრღვევ პირზე უნდა გატარდეს ამავე კანონის 79-ე მუხლით გათვალისწინებული დისციპლინური პასუხისმგებლობის ზომა. ამასთანავე, მოცემულ ფაქტებში, შესაძლებელია, იყოს სისხლის სამართლებრივი დანაშაულის ნიშნებიც.
გარდა ამისა, საქართველოს საარჩევნო კოდექსის 49-ე მუხლის პირველი ნაწილი კრძალავს თანამდებობის პირის მიერ საარჩევნო მიზნებისთვის თანამდებობრივი მდგომარეობის გამოყენებას. მართალია, ეს ნორმა ეხება მხოლოდ არჩევნების დანიშნვის დღიდან განვითარებულ მოვლენებს, მაგრამ პოლიტიკურ პარტიებს ფაქტობრივად დაწყებული აქვთ წინასაარჩევნო კამპანია და ცხადია, მსგავსი მაგალითები ადმინისტრაციული რესურსების საარჩევნო მიზნებისთვის გამოყენებად უნდა ჩაითვალოს.
ამასთანავე, ეუთოს კოპენჰაგენის დოკუმენტის შესაბამისად, ხელისუფლება ვალდებულია უზრუნველყოს სახელმწიფოს და პოლიტიკური პარტიის მკაფიო გამიჯვნა” _ წერია “საერთაშორისო გამჭირვალობა-საქართველოს” კვლევაში.
_ მიგვაჩნია, რომ ასეთი სახის ქმედებები წინასაარჩევნოდ ადმინისტრაციული რესურსების ბოროტად გამოყენების საგანგაშო ტენდენციის მაუწყებელი შეიძლება იყოს, რითაც თანასწორი და კონკურენტული წინასაარჩევნო გარემოს არსებობა კითხვის ნიშნის ქვეშ დგება. აქედან გამომდინარე, მივმართავთ:
ეროვნული უშიშროების საბჭოსთან არსებულ უწყებათაშორის კომისიას თავისუფალი და სამართლიანი არჩევნებისთვის, შეისწავლონ აღნიშნული ფაქტები და მოახდინონ შესაბამისი რეაგირება;
მთავარ პროკურატურას, დაიწყოს გამოძიება, რამდენადაც, შეიძლება, იკვეთებოდეს სისხლის სამართლის კოდექსის 322-ე მუხლით გათვალისწინებული დანაშაული, კერძოდ, სამსახურებრივი უფლებამოსილების ბოროტად გამოყენება;
საქართველოს ხელისუფლებას, არ დაუშვას მსგავსი შემთხვევების გამეორება, მიიღოს სათანადო ზომები და უზრუნველყოს თანასწორი და კონკურენტუნარიანი საარჩევნო გარემო, რათა არ დაირღვეს პოლიტიკური პარტიების, მთლიანად საზოგადოების და სახელმწიფოს ინტერესები, _ დასძენს “საერთაშორისო გამჭირვალობა_საქართველო”
