ოზურგეთის მუნიციპალიტეტის სოფელ დვაბზუს მკვიდრი, ი. ბასილაშვილი “გურია ნიუსთან” დაჯარიმების ფაქტზე საუბრობს:
_ მე ამ განუკითხაობას ვერაფრით შევეგუები _ ასეთი უკანონობა როგორ უნდა მოვითმინო? ლუკმა-პურის საშოვნელად ქუჩაში გამოსულ გაჭირვებულ ხალხს რომ კიდევ ამხელა ჯარიმას აჰკიდებ, ეს საქმეა? სოფლის მეურნეობა ისეა მიგდებული, კაცი არ ჰყავს პატრონი. თუ რამე მაქვს, ჩემი ფიზიკური შრომით შევქმენი, ჩემი სოფლის ყველა მცხოვრებს დავხმარებივარ. ამ პატარა ჯიხურში გაჭირვებამ დამსვა, თორემ, ძირითადად, სოფლის მეურნეობით ვიყავი დაკავებული და იმით ვირჩენდი თავს.
საღამოს რვის ნახევარი იქნებოდა, მოვიდა ვიღაც ახალგაზრდა და მითხრა, სანთებელა მინდა, ხურდები მაქვს და თუ მეყოფა, ნახეო. ამოიღო 40 თეთრი და დადო. მივაწოდე სანთებელა. სანთებელას როცა ვყიდი, ყველა სინჯავს. მას არ გაუსინჯავს, არც ხურდას დალოდებია, შებრუნდა, ამოვჭერი ქვითარი, მაგრამ მან მითხრა, თქვენ საგადასახადო კანონმდებლობა დაარღვიეთო. შეადგინა ოქმი. ტყუილად მიწერ ჯარიმას, მე ამის გადახდის საშუალება არ მაქვს, თან ეს ოქმი არ არის სწორად შედგენილი,-მეთქი. _ რა არ არისო? _ შემეპასუხა. მე ვუთხარი, რატომ არ არის დაფიქსირებული აქ, რომ მე ქვითარი ამოვჭერი. არც მოწმის ჩვენება არ გაქვს, მოწმე უნდა ესწრებოდეს ასეთ ფაქტს,-მეთქი. გამოვართვი ოქმი და ჩავიდე ჯიბეში, დავურეკავ პატრულსო, _ მითხრა. მე თვითონ დავურეკავ პატრულს,-მეთქი. _ შენ რა გინდაო? _ მკითხა. _ შენი ნარკოლოგიური მდგომარეობა უნდა შევამოწმო, არაფხიზელ მდგომარეობაში იმყოფები თორემ ასეთ რამეს სრულყოფილი ადამიანი არ მოიმოქმედებს,-მეთქი.
იცით რაშია საქმე? უარეს გაგიკეთებენ, ამათგან არაფერი არ არის გამორიცხული. შეიძლება, მოვიდეს, იყიდოს ერთი ცალი ასანთი და დამაჯარიმოს 2 000 ლარით, იმის გამო, რომ ასანთი უფაქტუროდ გიდევსო. ვერ გადავიხდი 2 000 ლარს და დამიყადაღებენ მთელ ქონებას…
მერე ადგა და გავიდა გარეთ. დარეკა სადღაც და უცებ მოაკითხა მანქანამ. მოვიდნენ სხვები და მკითხეს, წინააღმდეგობას რატომ უწევ, რა ხდებაო. მე ვუთხარი, ჯერ ამიხსენით, ეს თქვენი თანამშრომელი ნორმალური თუ არის, ქვითარი ამობეჭდილი მქონდა, მან კი ოქმი დამიწერა. მანქანა არ დაძრათ, პატრულში უნდა დავრეკო,-მეთქი. მითხრეს, შეგიძლია, გაასაჩივროო. გადავირიე, სად მაქვს იმის საშუალება, რომ ადვოკატი ავიყვანო და ვირბინო აქეთ-იქეთ? მერე შეეშინდათ, მართლა არ გამოიძახოს პატრულიო, დაქოქეს მანქანა და წავიდნენ. ერთადერთი რისი იმედიც მაქვს, ის არის, რომ მთავრობა შეიცვლება და ამ გადასახადს აღარ გადამახდევინებს. ამ იმედით ვარ.
მსგავს ფაქტზე საუბრობს ოზურგეთელი ვახტანგ ჯინჭარაძეც:
_ მცირე სამეურნეო საქმიანობას ვეწევი. ორჯერ დამაჯარიმეს. მოსული იყვნენ ფოთის კერძო ინსპექტორები. აიღეს იზოლენტა, დააგდეს ლარიანი და ისე გაიქცნენ, ხურდის დაბრუნებაც ვერ მოვასწარი. ამ დროს მოვიდა მეორე ახალგაზრდა და მეუბნება, ჩეკი არ ამოგიწერიაო, მე ვუთხარი, საიდან ამოვწერდი ჩეკს, თვალი ვერ მოვკარი, ისე გაიქცა,-მეთქი. დამაჯარიმეს 500 ლარით.
მივმართე იურისტებს, მათი დახმარებით გავმართლდი და 300 ლარი ჩამომაკლეს. ასე მოხდა მეორედაც.
სასჯელაღსრულების სამინისტროს იურიდიული დახმარების სამსახურის იურისტი, ია მემარნიშვილი: _ ოზურგეთის მუნიციპალიტეტის ტერიტორიაზე მდებარე სავაჭრო ობიექტებში საგადასახადო აგენტების მიერ ხორციელდება საკონტროლო შესყიდვები. როგორც ჩანს, ამის ერთადერთი მიზანი, მცირე და საშუალო ბიზნესის მქონე ინდმეწარმეების დაჯარიმებაა და არა კონტროლის დაწესება და პრევენცია. ამის თქმის საფუძველს გვაძლევს საგადასახადო აგენტების მიერ, ოზურგეთის რაიონში ინდმეწარმეების მიმართ გამოყენებული მეთოდები. კერძოდ, საგადასახადო აგენტის მიერ ხდება გარკვეული პროდუქტის შეძენა, აგენტი ხელოვნურად აჩქარებს გამყიდველს, თითქოს მას ტრანსპორტი ასწრებს ან ცუდად არის და დგომა არ შეუძლია. გამყიდველს არ აქვს შესაძლებლობა ქვითარი გადასცეს შემსყიდველს, ვინაიდან შემსყიდველი პროდუქტის აღებისთანავე ტოვებს სავაჭრო ობიექტს. შემდეგ ბრუნდება, ამბობს, რომ საგადასახადო ინსპექტორია და ინდმეწარმეს უწერს ადმინისტრაციული სამართალდარღვევის ოქმს, რომელიც 500-ლარიან ჯარიმას ითვალისწინებს. ასევე ადგილი ჰქონდა ფაქტს, როდესაც შემსყიდველი (საგადასახადო აგენტი) შედის სავაჭრო ობიექტში, ყიდულობს 2,60 ლარის საქონელს, აწვდის 5-ლარიანს, აჩქარებს გამყიდველს. გამყიდველი მექანიკურ შეცდომას უშვებს _ 2,60 ლარის ნაცვლად აჩვენებს 2,40 ლარის საქონლის შესყიდვას. შეცდომა მოხდა 0,20 ლარის ფარგლებში და ასეთი უმნიშვნელო შეცდომის გამო, საგადასახადო აგენტი მას უდგენს სამართალდარღვევის ოქმს.
ასეთი შემთხვევა გურიის რეგიონში უამრავია. სასჯელაღსრულების სამინისტროს იურიდიული დახმარების სამსახურს არა ერთმა მოქალაქემ მომართა დახმარებისთვის. ჩვენ სხვა რა შეგვიძლია _ ვასაჩივრებინებთ ადმინისტრაციული სამართალდარღვევის ოქმს შემოსავლების სამსახურში. შემოსავლების სამსახურის გადაწყვეტილებებით ინდმეწარმეებს, ხშირ შემთხვევაში, უხსნიან 500-ლარიან ჯარიმას და უტოვებენ 200 ლარს.
მე არ შემიძლია უკომენტაროდ დავტოვო საგადასახადო აგენტების ქმედება. შემიძლია, ვთქვა, ეს არის საგადასახადო აგენტების მიერ ინდმეწარმეებზე გახორციელებული ჩასაფრების პოლიტიკა არა იმ მიზნით, რომ აღმოიფხვრას საგადასახადო სამართალდარღვევები, არამედ იმიტომ, რომ მიიღონ რაც შეიძლება მეტი გასამრჯელო ასეთი მეთოდით დაჯარიმებული ადამიანების ხარჯზე. იმედს ვიტოვებ, სახელმწიფოს მხრიდან უფრო მეტი კონტროლი დაწესდება არა ინდმეწარმეებზე, არამედ თვით საგადასახადო აგენტების მიერ შემუშავებულ ასეთ მეთოდებზე. ხომ არ არის მათი მხრიდან ასეთი ქმედება უფლებამოსილების გადამეტება და რამდენად შეესაბამება ყველაფერი ეს კანონს? მიუხედავად იმისა, იურისტი ვარ და მე უნდა გამეცა პასუხი ამ შეკითხვებზე, მაგრამ დღეს მე ვსვამ ამ კითხვას.
