პრეზიდენტის ხარჯებს ახალი მთავრობა ვეღარ გააკონტროლებს

5 ოქტომბრის ბრძანებულებით ეკონომიკის სამინისტროს, რომელიც რამდენიმე დღეში ახალი კადრებით დაკომპლექტდება, სახელმწიფო უზრუნველყოფის სააგენტოზე ხელი აღარ მიუწვდება. ეს კი იმას ნიშნავს რომ პრეზიდენტის, მისი ადმინისტრაციის, ასევე ქვეყნის უმაღლესი თანამდებობის პირთა ხარჯებს ახალი მთავრობა ვერ გააკონტროლებს. ასევე, პრეზიდენტის უშუალო კონტროლს ექვემდებარება საინვესტიციო პროგრამებისა და პროექტების გახორციელება

საქართველოს სახელმწიფო უზრუნველყოფის სააგენტოს მიზნები და ამოცანები:

ა) სამთავრობო რეზიდენციებში საქართველოს პრეზიდენტის, პრეზიდენტის ადმინისტრაციის, ასევე ქვეყნის უმაღლესი თანამდებობის პირთა უზრუნველყოფა მათი საქმიანობისათვის საჭირო, საერთაშორისო სტანდარტების შესატყვისი პირობებით;

ბ) გადაცემული ქონების მშენებლობა, აღჭურვა, ექსპლუატაცია, მოვლა-პატრონობა, კეთილმოწყობა, რეკონსტრუქცია, მიმდინარე და კაპიტალური რემონტების ჩატარება;

გ) საინვესტიციო პროგრამებისა და მშენებლობის საინვესტიციო პროექტების განხორციელება მოქმედი კანონმდებლობით დადგენილი წესით;

დ) საზღვარგარეთიდან ჩამოსული სამთავრობო დელეგაციებისა და უმაღლესი დონის სტუმრების მომსახურეობა საჭიროების შემთხვევაში;

ე) სახელისუფლებო დაწესებულებათა წარმომადგენლების, ასევე სააგენტოს მიზნებიდან გამომდინარე, შესაბამისი კონტიგენტის მიღება და სათანადო მომსახურეობა;

ვ) სახელმწიფო კონტროლის განმახორციელებელი ორგანოსა და/ან საქართველოს პრეზიდენტის ადმინისტრაციის დავალებით სახელმწიფო ორგანოთა საქმიანობასთან დაკავშირებული ობიექტების აღჭურვა, კეთილმოწყობა, მიმდინარე და კაპიტალური რემონტების ჩატარება და სერვისული მომსახურება.2

2006 წლის 24 ნოემბერის ბრძანებულებაში, საჯარო სამართლის იურიდიული პირი – საქართველოს სახელმწიფო უზრუნველყოფის სააგენტოს შექმნის შესახებ, ნათქვამია, რომ სააგენტოს სახელმწიფო ქონება კანონმდებლობით დადგენილი წესით უნდა გადაეცეს. შესაბამისად საქართველოს პრეზიდენტი ცდილობს სახელმწიფო ბალანსზე არსებულ ქონებაზე კონტროლის შენარჩუნებას..

ცოტა ხნის წინ მედიასაშუალებებით გავრცელდა დოკუმენტური მასალა იმის შესახებ, რომ რამდენიმე შემთხვევაში კონკრეტული ღონისძიებების ხარჯი პრეზიდენტის დაცვის სამსახურმა გაიღო. 5 ოქტომბრის საკანონმდებლო ცვლილებამ მსგავსი ქმედებებს უკვე კანონიერი სახე მისცა.