მართალია, ღიად უარყოფდნენ ამ საძრახ საქმეს, მაგრამ მთელ საქართველოში რომ ასე სამარცხვინოდ მოქმედებდნენ და უაღრესად გაჭირვებულ ხალხს ხმებს სძალავდნენ, დღეს უკვე ცნობილი ფაქტია. ხდება ისე, რომ მოტყუებული მიკროკოორდინატორები (ეს ტერმინი “ნაცებმა” ამ არჩევნებზე დაამკვიდრეს), ახლა იღებენ ხმას და მომტყუებელ მთავარ კოორდინატორებს უპირისპირდებიან. ზოგი ამაზე ღიად საუბარს უკვე გაზეთთან ბედავს და გვთხოვს დახმარებას, თან გვიამბობს, როგორ ისარგებლეს მისი დუხჭირი ეკონომიკური ყოფით. იმისდა მიუხედავად, რომ ამ შემთხვევაში, “მაკრო” და “მიკრო” კოორდინატორების ვინაობა ჩვენთვის ცნობილია, უდანაშაულობის პრეზუმპციიდან გამომდინარე, მაინც დაშიფრულად გთავაზობთ მათ სახელს და გვარს, რადგან, საქართველოს კანონმდებლობით, ფულის გამცემიც და მიმღებიც, 3 წლამდე პატიმრობით ისჯება და ამ საკითხზე სასამართლომ უნდა იმსჯელოს!
ოზურგეთის მუნიციპალიტეტის სოფელ კვირიკეთში მცხოვრები, ქალბატონი ნ. ჟ., “გურია ნიუსთან” იმ ფაქტების შესახებ ჰყვება, თუ როგორ არიგებდნენ ფულს “ნაციონალები”, მხარდამჭერების შეგროვებისთვის, კოორდინატორთა ხელით და როგორ არ მისცეს მას შეპირებული ხელფასი.
ნ. ჟ: “არჩევნებამდე ერთი დღით ადრე, 30 სექტემბერს, მირეკავს ქ. მ., რომელიც მთელი ამ ზონის კოორდინატორი იყო. მას ებარა სოფლები: შემოქმედი, წითელმთა, კვირიკეთი, გომის მიკროკოორდინატორების მეთვალყურეც იყო. ერთ დღეს მირეკავს და მეკითხება: სად არის შენი შვილიშვილიო. მე ვუთხარი, ყანაში იყო და ახლა, შეიძლება, სადმე ქუჩაში იყოს-მეთქი. შენი შვილიშვილი, გენაცვალე, “ქართული ოცნების” მაიკით და დროშით ფრიალობს ქალაქშიო. ეს თქვენ რა გააკეთეთ, თუ იცითო, საღამოს ამობრძანდით ჩემთან სახლში და გავარკვიოთ, რა ხდება შენს ოჯახში, რა პრობლემები გაქვსო. შევეპასუხე, რის პრობლემები მაქვს, არაფერი ვიცი, სახლიდან გასულმა ბავშვმა თუ სხვა მაიკა ჩაიცვა, რა მოხდა. მე არაფერი პრობლემა არ მაქვს-მეთქი. მ-ს ასეთი შემოტევის შემდეგ, ძალიან ვინერვიულე, დავურეკე იმ წუთში ჩემს შვილიშვილს, რომელიც 18 წლისაა და ვკითხე, სად ხარ, ბებო-მეთქი. აგერ ვარ, ბოხვაურის სკოლასთანო, _ მითხრა. ვკითხე კიდევ, რა ხდება, ბებია, მშვიდობა ხომ არის, რა მაიკა გაცვია, მითხარი, შეიძრა ცა და ქვეყანა-მეთქი. მოვიდა სახლში ბავშვი და მითხრა, რა იყო, ბებია, მერე, მთელ გოგო-ბიჭებს ეცვათ და ჩავიცვიო. ვუთხარი, ერთი ამბავი ამიტეხეს-მეთქი. ამის შემდეგ, პირველ ოქტომბერს ჩვეულებრივად გამოვცხადდი არჩევნებზე. ადამიანები, ვინც მე მებარა და აღწერილი მყავდა სიით, უნდა გამოცხადებულიყვნენ და “ნაციონალური მოძრაობისთვის” უნდა მიეცათ ხმა. ყველა მივიყვანე, დაახლოებით, 40 ადამიანი მაინც, ჩავაბარე ქ-ს და წამოსვლის ხანს ვუთხარი, როგორაა, საქმე თავისუფალი ვარ-მეთქი? _ კიო, მიპასუხა. მას ჩემთვის სექტემბრის თანხა უნდა მოეცა, ხელფასის სახით 150 ლარი, თუმცა. არაფერი უთქვამს.
მეორე დღეს ვნახე კოორდინატორები და ვკითხე, მიიღეს თუ არა კუთვნილი თანხა. მათ მიპასუხეს, რომ ქ. მ-მა თანხა ყველას დაურიგა, ჩემ გარდა. 2 ოქტომბერს დავურეკე მას და ვუთხარი, ჩემი ხელფასი რატომ არ მომეცი-მეთქი. შენი ხელფასი სხვას მივეციო, რადგან შენ ასე გამიკეთეო. მე არაფერი მაგისთვის მეტი არ მითქვამს. ამის მერე დავდივარ სოფლის რწმუნებულთან, ბესიკ ლომინაძესთან, სახლში არ მხვდება, მითხარით, რა უნდა ვქნა?!” _ ამბობს ნ. ჟ., და განაგრძობს: _ “მეუღლე მყავს სიმსივნით დაავადებული, რომელიც ამ ამბებთან დაკავშირებით ძალიან მეხმარებოდა, სხვა გზა არ მქონდა. მაინტერესებს, ამ ქალმა, ვის მისცა ჩემი კუთვნილი თანხა? მას ჰქონდა უწყისი შედგენილი, რაზედაც ვაწერდით ხელს. აგვისტოში ავიღე 150 ლარი. ზოგს მთლად 1000 ლარს უხდიდნენ, რას აკეთებდნენ ისინი განსაკუთრებულს, არ ვიცი. მყავს ობოლი შვილიშვილი. სააკაშვილის ყველა ჩამოსვლაზე, მთელი ოჯახი მაგათ სამსახურში ვიყავით. აბა, დაგირეკავდნენ და იმ წუთსვე მაგათთან უნდა გაჩენილიყავი”.
ქალბატონ ნ.-სთან საუბრის შემდეგ, ჩვენ ქ. მ.-ს დავუკავშირდით.
_ გაზეთ “გურია ნიუსიდან” გაწუხებთ, იცნობთ თუ არა ქალბატონ ნ. ჟ-ს?
_ კი, ბატონო, როგორ არა.
_ ის “ნაციონალების” კოორდინატორი იყო სოფელ კვირიკეთში, ასეა?
_ კი, ბატონო.
_ თქვენც ბრძანდებოდით სოფელ შემოქმედის ზონის “ნაციონალების” კოორდინატორი?
_ და, რაშია საქმე?
_ ქალბატონი ნ. ამბობს, რომ მას თქვენ სექტემბრის კუთვნილი ხელფასი, 150 ლარი არ მიეცით.
_ ის აღარ იყო ჩვენი კოორდინატორი და ამდენად ვერ მიიღო სექტემბრის თანხა, ხელფასი… ისე, მე არაფერ ხელფასებს არ ვიძლეოდი, გენაცვალე, ჩვენ არავისთვის ხელფასები არ მიგვიცია.
_ ქალბატონო, თქვენ ნ. ჟ-ს აგვისტოს თანხა 150 ლარი არ მიეცით და უწყისზე ხელი არ მოაწერინეთ?
_ არა.
_ ერთი წუთის წინ, დაადასტურეთ ყველაფერი და ახლა უარყოფთ? თქვენ 30 სექტემბერს ქალბატონ ნ-ს არ დაურეკეთ და არ უთხარით, რომ მისი შვილიშვილი “ოცნების” მაისურით “დაფრიალებდა” ქალაქში და ამის გამო მას პრობლემები შეექმნებოდა?
_ მე ახლა ოზურგეთში არ ვარ, როცა დავბრუნდები, მაშინ ვისაუბროთ მაგაზე. მე ვთვლი, რომ ამის გარკვევა ტელეფონით არაა საჭირო.
_ ინფორმაცია პირადად თქვენთან გადავამოწმეთ. ქალბატონი ნ. ამბობს, რომ არჩევნების დღეს მან პირადად ჩაგაბარათ ის ადამიანები, ვინც სიაში ჰყავდა და ვისაც “ნაციონალებისთვის” უნდა მიეცათ ხმა. ამ ინფორმაციასაც უარყოფთ?
_ მასალას თქვენ ვერ გააკეთებთ! ქალბატონი ია მამალაძე ჩემი ნათესავია, მე მას დავუკავშირდები და ყველაფერს ავუხსნი. ქალბატონ ნ-ს ჩემთვის არავინ მოუყვანია, არავინ ჩაუბარებია! მე მასთან ბოლო პერიოდში არანაირი ურთიერთობა არ მქონია. მე როცა ჩამოვალ, გავარკვევ ყველაფერს. მე სულაც არ მსიამოვნებს თქვენთან ტელეფონზე ვისაუბრო ამ თემაზე. თქვენ ვერაფერს ვერ გააკეთებთ! ასე რომ, ძალიან გთხოვთ… _ შეუვალი, ბრძანების ტონით გვითხრა ქ.მ-მა.
ჩვენ ამ თემაზე მუშობას ისევ გავაგრძელებთ და მკითხველს დეტალურ ინფორმაციას მივაწვდით.
