მინისტრი თეა წულუკიანი აქციის მონაწილეებს მედია საშუალებებთან ერთად შეხვდა.
“პირველ რიგში, დიდი მადლობა რომ მოხვედით, რადგან ეს არ არის უმნიშვნელო საქმე. მე უფრო მეტს გელოდით, ვიდრე ხართ. როგორც ჩანს, ვერ მოახერხეთ უფრო მეტი ყოფილიყავით,“ _ განუცხადა წულუკიანმა აქციის მონაწილეებს.
„რაც შეეხება საქმეს, თქვენ უკვე იცით, რამდენიმე დღეა დაძაბული ფონია გურიაში, სოფელ ნიგვზიანში. მე როდესაც ეს ინფორმაცია მივიღე, ამის შესახებ ჩემი წინამორბედი მაშინათვე აცნობებდა ხოლმე ერთადერთ უწყებას, ეს იყო შინაგან საქმეთა სამინისტრო და იქ შეიძლება მომხდარიყო ძალოვანი სტრუქტურების მიერ ძალის დემონსტრირება.
განსხვავებით ძველი პერსონალიდან, რომელთაგან ზოგი გაქცეულია, არ ესინჯებათ პულსი, სად არიან არავინ იცის, იმ პერსონალებიდან ვინც აქ არიან და ელოდებიან თავიანთი მომავლის განსაზღვარას ახალი ხელისუფლების მხრიდან, მე ავირჩიე სხვა სტრატეგია. ამის შესახებ ვესაუბრე არა მხოლოდ ჩემს კოლეგებს მთავრობაში, პირველ რიგში შევატყობინე საქართველოს საპატრიარქოს, რადგან ჩავთვალე, რომ იქ მართლმადიდებელი მრევლის მხრიდან, ადგილი ჰქონდა საკითხისადმი ზედმეტად ემოციურ დამოკიდებულებას.
ამ შეტყობინებამ წარმოშვა ჯანსაღი პროცესი. თქვენ იცით, რომ უკვე რამდენიმე დღეა, მართლმადიდებელი ეკლესიის წარმომადგენლები და მუფტი თავის მოადგილესთან ერთად, შეხვედრებს მართავენ. ეს საკითხი, რამდენიმე ადამიანის მიერ მთავრობის სხდომაზეც იქნა დაყენებული. მე ჩემი მოსაზრება გამოვთქვი, შს მინისტრმა თავისი მოსაზრება, რომლის თანახმადაც მან თქვა, რომ შემთხვევის ადგილზე პატრული არის მობილიზებული, მაგრამ იგი ჯერ ჩარევის გადაწყვეტილებას არ იღებს“, _ განუცხადა იუსტიციის მინისტრმა შეკრებილ საზოგადოებას.
თეა წულუკიანმა, შეხვედრის დროს, აქციის მონაწილეებს ტერმინიც შეუსწორა:
_ თქვენ ბრძანეთ, რომ სახელმწიფო უნდა ჩაერიოს და უნდა მონაწილეობდეს კონფლიქტში. მინდა გაგისწოროთ ეს ტერმინი, რომელიც თქვენ იხმარეთ. სახელმწიფოს როლი არ არის კონფლიქტში მონაწილეობა, სახელმწიფოს როლია კონფლიქტის განტვირთვა. ჩვენ ვადგავართ გზას _ არა მხოლოდ უმრავლესობის, არამედ უმცირესობის უფლებებიც იყოს დაცული.
ამ საკითხის განხილვას მთავრობის სხდომაზე შედეგად მოჰყვა ის, რომ გადაწყდა, წინა ხელისუფლებისაგან განსხვავებით, ჩვენ ძალოვან სტრუქტურებთან კი არ ვაგვარებთ ამ საკითხს, არამედ ეკლესიის წარმომადგენლებს მივეცით დიალოგის საშუალება. ამ საქმის ფასილიტატორად მივლენილი იქნა პარლამენტის ადამიანის უფლებათა კომიტეტის თამჯდომარე ეკა ბესელია. მას შეხვედრები ჰქონდა როგორც საქართველოს საპატრიარქოში, ასევე მუსლიმ მოქალაქეებთან და წინამძღვრებთან.
ეს არის საქართველოში ყველანაირი რელიგიური დაპირისპირების მოგვარების ჩვენეული და ახალი, ცივილიზებური მეთოდი. თუ ჩვენი გურულები, მართლმადიდებლები თუU მუსლიმები ვერ გამოიჩენენ კეთილგონიერებას და არ გაიხსენებენ იმ ტრადიციას საქართველოში, რომ მათ ერთად უნდა შეძლონ თანაცხოვრება, მაშინ, რა თქმა უნდა, ჩაერევა იუსტიციის სამინისტრო, მაგრამ არ მგონია, საქმე იქამდე მივიდეს, ამ საქმეში შინაგან საქმეთა სამინისტროს ჩარევა დაჭირდეს. ყოველ შემთხვევაში, მე ყველაფერს გავაკეთებ იმისთვის, რომ ეს ასე არ მოხდეს.
რელიგიური პრობლემების მოგვარების ახალი სტილი არის ეს და მე დარწმუნებული ვარ, თქვენ ამას ეთანხმებით. არსებობს კონსტიტუციური შეთანხმება. სახელმწიფო და ეკლესია არის გაყოფილი. როდესაც წარმოიშობა რელიგიურ ნიადაგზე დაძაბულობის წყარო, სახელმწიფო და მათ შორის მე, ვალდებული ვართ, ჯერ ეკლესიას მივცეთ ინციდენტის ამოწურვის საშუალება,“ _ განაცხადა თეა წულუკიანმა.
ამ ისტორიის პირველი ნაწილი არის ის, რომ სახეზე იყო დაპირისპირება, რომელიც უნდა ამოწურულიყო. უკეთესად ვინ დაამშვიდებს საკუთარ მრევლს, თუ არა ეკლესია. ამაში დამეთანხმებით. ამ სტრატეგიას ვადგავართ ჩვენ, მაგრამ იქ დაპირისპირების ფარგლებში თუ მოხდა ხელით შეხება, ცემა, შეურაცხყოფა და რელიგიური თავისუფლების ხელყოფის ფაქტი, ეს არის უკვე საქმის მეორე ნაწილი და აქ უნდა დაკავდეს პროკურატურა. თავიდან, სიტუაცია იყო განსამუხტი და ეს იმუხტება დღესაც, ამ წუთას და დასრულდება წარმატებით.
ამ შემთხვევაში, მე უფრო მეტი სასაყვედურო მექნება იმ ადგილობრივი ჩემი რწმენის ადამიანთან, მართლმადიდებელთან, რომელმაც არ გაიზიარა ის, რომ მუსლიმს აქვს უფლება ილოცოს. თუ იქ არის მომხდარი სისხლის სამართლის დანაშაული, რა თქმა უნდა, ჩატარდება გამოძიება. მაგრამ, სანამ არ არის ამოწურული ყველა ცივილური გზა, ჩვენ არ ვახდენთ ძალის დემონსტრაციას.
მე დარწმუნებული ვარ, ძალის დემონსტრირება არ დაგვჭირდება და დარწმუნებული ვარ, ამის მომხრე არც თქვენ ხართ.
ხშირად მობრძანდით ხოლმე, მე აგიხსნით რას ვაკეთებთ, რადგან ეს სამინისტრო იყო ბოლომდე ჩაკეტილი და მე მინდა ეს სამინისტრო გახდეს მაქსიმალურად ღია,” _ განცხადა თეა წულუკიანმა აქციის მონაწილეებთან შეხვედრისას.
