“გურია ნიუსი” ამასთან დაკავშირებით სალომე მახარაძეს დაუკავშირდა.
_ ქალბატონო სალომე, გავრცელდა ხმები, რომ თქვენ, შს მინისტრმა ირაკლი ღარიბაშვილმა გაგათავისუფლათ დაკავებული თანამდებობიდან.
_ ახლა ზუსტად გეტყვით, რაც არის. სიტყვა-სიტყვით ჩაიწერეთ. ცოტა ურთიერთ გამომრიცხავი რაღაცეები სახელდება. მე, გუშინ ბატონმა ირაკლიმ დამიბარა და მითხრა, რომ ჩემთან დაკავშირებით მას არანაირი პრობლემა არ აქვს, ძალიან მადლიერია და აღფრთოვანებულია ჩემი პროფესიონალიზმით. ამ ერთი თვის განმავლობაში მართლა კარგად ვიმუშავეთ. საკმაოდ დამყოლი და ღია მინისტრია. მითხრა, რომ ძალიან წყდება გული. ამ ადამიანმა მართლა ინერვიულა, მაგრამ მას აქვს მითითება, რომ ასეთ თანამდებობებზე აუცილებლად უნდა დაინიშნოს მეგობრები და ვთქვათ არა პროფესიონალური ნიშნით, ამიტომ ის იძულებულია, თანამდებობაზე მოყვანოს თავისი მეგობარი.
ბატონმა ირაკლიმ შემომთავაზა, უსამსახუროდ რომ არ დავრჩენილიყავი მემუშავა სადმე სხვაგან. მითხრა, რომ იფიქრებს და რამეს მომიძებნის. მე უარი ვუთხარი. იმიტომ, რომ ეს პროფესია მაქვს, განათლებითაც და პრაქტიკითაც ჟურნალისტის ვარ და მე პატივს ვცემ პროფესიონალიზმს. დამიჯერეთ, ბატონი ირაკლი ძალიან უხერხულ მდგომარეობაშია. მან პირდაპირ მითხრა, რომ მასზე არ არის ეს მარტო დამოკიდებული. ის ჩემთან ძალიან კომფორტულად გრძნობდა თავს, რადგან ვთავსდებოდით რაღაცეებზე და ამ დღეების განმავლობაში, ერთობლივად ვაკეთებდით ყველაფერს. მიუხედავად იმისა, რომ ბოლო პერიოდში სამი მინისტრი შევიცვალე და ჩემთვისაც ძალინ რთული იყო, ძალიან კარგად ვიმუშავეთ ერთად ამ ერთი თვის განმავლობაში. მაგრამ მითხრა, რომ მას აქვს მითითება, აუცილებლად დანიშნოს მეგობარი. ძალიან ინერვიულა. პირდაპირ გეუბნებით, ძალიან ვუთანაგრძნობ ბატონ ირაკლის, იმიტომ რომ საკმაოდ რთული საქმის დასაწყისშია და იძულებულია, დინების საწინააღმდეგოდ იაროს.
_ ხომ არ იცით, “მეგობრული მითითება” თქვენი გათავისუფლების შესახებ ვისგან მოდიოდა?
_ არ ვიცი. მე სახელი და გვარი არ მიკითხავს. მისი ზედმდგომი ამ ქვეყანაში რა ვიცი აბა, გამოთვალეთ ვინ არის? ან ერთობლივად გუნდის გადაწყვეტილება, ან მხოლოდ ერთის, მაგრამ ეს ასეა. თუმცა დარწმუნებით ვამბობ, ბატონი ირაკლი, მიუხედავად იმისა, რომ მან მითხრა სამსახურიდან გიშვებო, მართლაც გულრწფელად გულით მეცოდება, რადგან გამოუვალ მდგომარეობაში იყო ჩავარდნილი.
_ თქვენ თანამდებობაზე ვინ მიიღეს?
_ საკმაოდ მაღალი თანამდებობაა. მე ვარ საზოგადოებრივ საქმეთა დეპარტამენტის ხელმძღვანელი. ჯერ არავინ მიუღიათ, მე განცხადება არ დამიწერია, რადგან ეს მცდარი ფრომა იქნებოდა. თვითონ მითხრეს, წადიო და არა მე დავწერე განცხადება. ბატონმა ირაკლიმ ისიც კი მითხრა, რომ ამაზე ხელის მოწერა ძალიან გაუჭირდება. ამის გამო მართლა გულწრფელად ვუთანაგრძნობ. ალბათ, მომივა გათავისუფლების შესახებ ცნობა. ვინ დაინიშნება, ეს არ ვიცი.
_ გავრცელდა ინფორმაცია რომ “აირზენას” ყოფილი პრესსამსახურის უფროსი, ნინო გიორგობიანი ინიშნება შს საზოგადოებრივ საქმეთა დეპარტამენტში.
_ არ ვიცი. ეს ჩემი კომპეტენცია არ არის. ძალიან გული დამწყდება, თუ იქ არ მივა ისეთი ადამიანი, ვისაც ცოტა გამოცდილება მაინც აქვს ასეთ სფეროში, რადგან რთული პერიოდია. ყველაფერი შეცვლილია და ძალიან ბევრი ინფორმაცია ჭირდებათ ჩვენ სამსახურში. ძალიან დახურული იყო სისტემა და ბევრის თქმა არ შემეძლო. მე მაქსიმუმს ვაკეთებდი. ვინც იქნება, იმას წარმატებას ვუსურვებ ამ ძალიან რთულ სამსახურში.
