ლონდარიძის ინტერესებს ადვოკატი გელა ნიკოლაიშვილი იცავს, რომელიც უკვე შეხვდა პატიმარს და მისი დაკავებისა და წამების საზარელი ისტორია მოისმინა.
თავდაცვის სამინისტროს გაერთიანებული შტაბის თანამშრომელი დავით ლონდარიძე გასული წლის 17 სექტემბერს დააკავეს და უცხო ქვეყნების სპეცსამსახურებთან თანამშრომლობაში დასდეს ბრალი. ლონდარიძე წამებით აიძულეს დანაშაულში ემხილებინა გადამდგარი პოლკოვნიკი სერგო თეთრაძე, რომელიც დაკავებიდან ერთ კვირაში წამების დროს შემოაკვდათ. თეთრაძესთან და ლონდარიძესთან ერთად სამხედრო პოლიციამ რადიომოყვარული გიორგი გორელაშვილი და ლონდარიძის ჯგუფელი სერგეი ჩაპლიგინიც დააკავა.
“როგორც ლონდარიძემ მიამბო, სამხედრო პოლიციაში მიყვანის შემდეგ, მას ჯერ ლანძღეს, ჯაშუშს, სამშობლოს მოღალატეს უწოდებდნენ. თავიდან მას ეს ხუმრობა ეგონა, თუმცა, მალე ცემა და წამება დაუწყეს. საერთოდ მიკვირს, როგორ გადარჩა ცოცხალი ეს ადამიანი _ მას ნერვიულობის ნიადაგზე ტვინში სისხლი ჩაექცა და დღეს დამოუკიდებლად გადაადგილება უჭირს, ეს ადამიანი არის წამების და არაადამიანური მოპყრობის მსხვერპლი. ჩემთან საუბარში მან გაიხსენა, სამხედრო პოლიციაში როგორ აწამებდნენ ორი დღის განმავლობაში პირადად პოლიციის უფროსი მეგის ქარდავა, ბაჩო ახალაია და დათა ახალაია. ჯალათებიდან ზოგის გვარი ახსოვს, ზოგის არა, თუმცა მათი ამოცნობა შეუძლია,” _ აცხადებს ადვოკატი გელა ნიკოლაიშვილი “გურია ნიუსთან” საუბარში.
ლონდარიძე იხსენებს, რომ წამების შემდეგ, გლდანის მე-8 დაწესებულების დირექტორმა ალექსანდრე მუხაძემ მას მხარში რაღაც ინექცია გაუკეთა, რის შემდეგაც ტკივილი მოეხსნა, გამხიარულდა და საკუთარი თავის რწმენა დაუბრუნდა. როგორც “გურია ნიუსმა” გაარკვია, ეს ინექცია ქართულ ციხეში კარგად აპრობირებული ე.წ. “კოქტეილია” _ სხვადასხვა მედიკამენტების ნაზავი, რასაც პატიმრებისაგან სასურველი ჩვენების მისაღებად ან მისთვის ფიზიკური ტკივილების მოსახსნელად იყენებდნენ.
“გურია ნიუსმა” ისიც გაარკვია, რომ ალექსანდრე მუხაძე ბოლოს თავდაცვის სამინისტროს სამხედრო პოლიციის დეპარტამენტში მეგის ქარდავას მოადგილედ მუშაობდა. ის პროფესიით ექიმია და ძლიერმოქმედ “კოქტეილებს” პირადად ამზადებდა.
მნიშვნელოვანი ფაქტია, რომ მუხაძის მეუღლე ქეთევან ცაციაშვილი სასჯელაღსრულების სამინისტროს სამედიცინო დეპარტამენტის სამედიცინო უზრუნველყოფის სამმართველოს მრჩეველია.
დაკავებულ ლონდარიძეს წამებით აიძულეს დანაშაულში სერგო თეთრაძე ემხილებინა: “ლონდარიძე მომიყვა, რომ აღკვეთის ღონისძიების შეფარდების დროს ნაწამები სერგო თეთრაძე მიუტრიალდა და ჰკითხა: რას მერჩოდი, რა დაგიშავეო? სათქმელი არაფერი მქონდაო, ამბობს ლონდარიძე, გულში კი უფიქრია: “ჩემს ადგილზე თქვენ გაუძლებდით ამ წამებას?” ლონდარიძეს არაადამიანური წამების შედეგად დაასახელებინეს თეთრაძის გვარი,” _ აცხადებს ნიკოლაიშვილი.
ადვოკატი გელა ნიკოლაიშვილი ამ საქმის კიდევ ერთ მონაწილეს, გიორგი გორელაშვილსაც იცავს. გორელაშვილი მზად არის, თუკი ციხეში ამის შესაძლებლობა იქნება, სახალხოდ მისცეს ჩვენება და ტელეკამერების წინ, დანაშაულში ამხილოს არა ერთი ციხის ჯალათი.
“ამ ეტაპზე განცხადება მზად გვაქვს და პროკურატურას მივმართავთ, რომ დაიკითხონ ჩემი დაცვის ქვეშ მყოფი პატიმრები _ ლონდარიძე და გორელაშვილი და დაიწყოს ამ საქმის გამოძიება,” _ აცხადებს ნიკოლაიშვილი “გურია ნიუსთან” საუბარში.
