ინტერნეტ გამოცემა www.people.ge-ზე მისი ინტერვიუს ბეჭდური ვერსია გამოქვეყნდა.
მეჩითოვი ამბობს, რომ რუსეთში მეგრელებს ქართველებად არ თვლიან. ის დასცინის გურულებსაც: “გურულებს რაღაც აკლიათ, რაღაც მინერალი. მათ სოფელს მამათი ერქვა. მათ უჭირთ საღად აზროვნება. ძალიან პოლიტიზირებულნი არიან. ზოგჯერ ამბობენ, კი გურული ვარ, მაგრამ მომარჩინესო,” _ აცხადებს მინისტრის მოადგილე.
“გურია ნიუსმა” იური მეჩითოვთან თავისივე ინტერვიუზე კომენტარები ჩაწერა. მანამდე კი მის მიერ მიცემული ინტერვიუს ვრცელ ვარიანტს გთავაზობთ.
– ხომერიკი? ხომერიკი გურულია?
– კი, ეს ჰომეროსიდან მოდის.
ერთი ანეკდოტია: ორი მთვრალი გურული ზის, ერთი ღერი სიგარეტი აქვთ, ერთი ეუბნება მეორეს, როგორაა ის მათხოვარი? წარმოიდგინეთ თვითონ გადატეხილ სიგარეტს ეწევიან და სხვას მათხოვარს ეძახიან.
მეორე ანეკდოტია კიდევ: ციხეში სხედან გურულები, შენ რაზე ზიხარ? ერთი ეკითხება მეორეს, პოლიტიკურზე – პასუხობს პირველი, შენ რა გესმის პოლიტიკის? აბა მითხარი ლენინის გვარი, ეკითხება კვლავ პირველი, ტროცკი, პასუხობს მეორე პატიმარი, ტროცკი, ხომ მისი ცოლი იყო – ეუბნება პირველი – აი, ასეთი ხალხია გურულები. მათ “დოსტუპი” ზღვაზეც აქვთ.
_ მეგრელებს არ უყვართ ხომ გურულები?
– არ უყვართ, მეგრელები სხვა ხალხია. სხვათაშორის ძალიან აქტიურები არიან, მამაჩემს 14 წელი მეგრელი საყვარელი ჰყავდა. მეგრელები ეშმაკები არიან. იციან სამი ენა, მეგრული, ქართული და რუსული. მილიონ ნახევარზე მეტნი არიან. რუსეთის იმპერიაში არ თვლიან მათ ქართველებად.
– რაც შეეხება აჭარას?
– ქართველებმა ყოველდღე უნდა დალიონ რუსეთის სადღეგრძელო. რუსეთმა ორი ომი გადაიტანა თურქეთთან, რომ აჭარა საქართველოს შემადგენლობაში ყოფილიყო.
“გურია ნიუსი” იური მეჩითოვს დაუკავშირდა და სატელეფონო საუბარი ჩაწერა.
_ ბატონო იური, გამარჯობათ. მე, გიორგი გირკელიძე ვარ, გაზეთ “გურია ნიუსის” კორესპონდენტი და ინტერნეტსივრცეში გავრცელებული ინტერვიუს გამო გიკავშირდებით.
_ ეს გავრცელებული ადრეც იყო, მაგრამ, ახლა სხვაგანაც დადეს.
_ ბატონო იური, რატომ ფიქრობთ, რომ გურულებს აკლიათ და მათ უჭირთ საღად აზროვნება?
_ გურულები ძალიან სწრაფად აზროვნებენ, ეს ანეკდოტი იმიტომ დადის… ცუდი აქ არაფერი… ყველა გურული, რომელიც მისმენს ცოცხლად, ისინი არასდროს ამბობენ, რომ მე გურულებზე ცუდად ვამბობ, თქვენ რატომ ფიქრობთ ასე, ვერ გავიგე?!
_ გურულებს რაღაც აკლიათ, რაღაც მინერალი. მათ სოფელს მამათი ერქვა. მათ უჭირთ საღად აზროვნება… ეს ის ტექსტია, რომელსაც თქვენ ამბობთ, ეს იუმორია, ბატონო იური?
_ არა, იცით, როგორ არის საქმე? მანდ სიფიცხეა გურულების მთავარი ნიშანი. არაფერი ცუდი აქ არ არის, ეს ყველაფერი დამოკიდებულია მინერალზე და საკვებზე, ყველაფერი საჭმელზეა დამოკიდებული, გამიგეთ. იზაბელას რომ სვამს ადამიანი, სულ სხვა ადამიანია, კახურს რომ სვამს, სხვა ადამიანია. პრობლემა და წყენინება არ გვჭირდება. ანეკდოტს ერთმანეთს ყოველთვის ვეუბნებოდით.
_ ბატონო იური, “მათ უჭირთ საღად აზროვნება” _ ესეც იუმორია?
_ ასე არ არის ნათქვამი, საღად აზროვნება გურულს არასოდეს უჭირდა.
_ თქვენ ამბობთ ამას, არ გახსოვთ? კიდევ ერთხელ შემიძლია წაგიკითხოთ: “გურულებს რაღაც აკლიათ, რაღაც მინერალი. მათ სოფელს მამათი ერქვა. მათ უჭირთ საღად აზროვნება. ძალიან პოლიტიზირებულნი არიან. ზოგჯერ ამბობენ, კი, გურული ვარ, მაგრამ მომარჩინესო.
_ პოლიტიზირებული არიან, ეს ახალი ამბავია?
_ და “საღად აზროვნება” უჭირთო, ამაზე რას გვეტყვით?
_ მე მგონი, ეს, ალბათ, ფრაზაში წამომცდა. გურული სწრაფად აზროვნებს და სწრაფად საუბრობს, სხვანაირი ხედვა აქვს.
_ ინტერვიუს დროს ამბობთ: “მეგრელები არ უყვარს არავის. სხვათაშორის, ძალიან აქტიურები არიან, მამაჩემს 14 წელი მეგრელი საყვარელი ჰყავდა და ამბობდა, რომ მეგრელების სიძე ვარო. მეგრელები ეშმაკები არიან და თავიანთი კლანი აქვთ. კახელები ხუმრობენ, თბილისში რითი წამოვიდეთ, არც ინგლისური ვიცით და არც მეგრულიო. სამი მილიონი ქართველია და აქედან მილიონზე მეტი _ მეგრელები. მეგრელებმა იციან სამი ენა _ მეგრული, ქართული და აუცილებლად რუსული… სხვათაშორის, რუსეთის იმპერიაში არ თვლიან მათ ქართველებად…”
_ მოდით, რა შევხვდეთ, ტელეფონზე არ მესმის კარგად.
_ აუცილებლად, “გურია ნიუსის” თბილისის ოფისის წარმომადგენელი დაგიკავშირდებათ…
_ კი, ბატონო. თუ არასწორად ვთქვი რამე, შემიძლია მივცე ინტერვიუ. ყველაფერი სიყვარულით არის ნათქვამი, მთელი საქართველო მიყვარს და ყველა კუნჭული. რობიკო სტურუას დააბრალეს ისეთი რამ, რომ ვერ დააბრალებდი ვერასოდეს. თუმცა, ფრაზა ისეთია, რომ შეიძლება დაბრალდეს. მაგრამ ეს ფრაზა არ გამოხატავდა რობიკო სტურუას აზრს და მისწრაფებას.
