გია ნოდიამ დღეს პრესკონფერენცია გამართა და გრანტის განკარგვის გეგმებზე ისაუბრა. მისი თქმით, თანხას შვიდკაციანი გამგეობა განკარგავს, რომელიც საზოგადოებისათვის მაღალი ნდობით აღჭურვილი, აპოლიტიკური პირებით დაკომპლექტდება. სწორედ ეს გამგეობა შეარჩევს იმ მედია ორგანიზაციებს, რომლებსაც გრანტი შეხვდებათ. ნოდია ამბობს რომ ეს გრანტები არ იქნება დიდი, მისი პრიორიტეტი რაც შეიძლება მეტი გრანტის გაცემა და მეტი ორგანიზაციის დახმარებაა.
ფონდის აღმასრულებელი დირექტორი ამბობს, რომ ეს ამ მაშტაბის პირველი გრანტია,რომელიც ორგანიზაციას უცხოელი დონორებისაგან არ მიუღია.
“გურია ნიუსის” კითხვაზე, აქვს თუ არა ორგანიზაციას მედია პროექტების განხორციელების გამოცდილება, გია ნოდიამ კონკრეტული პროექტის სახელი ვერ გახსენა, მაგრამ დაბეჯითებით განაცხადა, რომ ორგანიზაციას ამ მიმართულებით გამოცდილება აქვს.
ინსტიტუტის ბოლო სამი წლის ანგარიში ასე გამოიყურება:
“საინტეგრაციო გარემოს გაუმჯობესება საქართველოში მაცხოვრებელი უმცირესობებისათვის საშუალო სკოლის რეფორმირების მეოხებით“, დონორი – ევანგელური განვითარების სამსახური (EED), 2008-2010 წწ., მოცულობა – €370 000.
„დამოუკიდებელი მედია სამოქალაქო ინტეგრაციისთვის“, დონორი – ევროკომისია, 2007-2010, მოცულობა – € 479 576.
„დეცენტრალიზაციის და ადგილობრივი მმართველობის რეფორმირების პროცესში სამოქალაქო საზოგადოების მონაწილეობის ხელშეწყობა“ (ნიდერლანდების სოციალური კვლევების ინსტიტუტთან ერთად), დონორი – ნიდერლანდების საგარეო სამინისტრო, 2010-2013, მოცულობა – € 670 988.
„ქვემო ქართლსა და სამცხე-ჯავახეთში ახალგაზრდების ინტეგრაცია საგანმანათლებლო და კულტურული ინიციატივების გზით“, დონორი – ევანგელური განვითარების სამსახური (EED), 2011-2013, მოცულობა – € 230 000
საკონსკუსო განაცხადი, რომელიც ნოდიას ორგანიზაციამ წარადგინა, საკმაოდ ზოგადია, ზოგადი იყო დღევანდელ პრესკონფერენციაზე ორგანიზაციის აღმასრულებელი დირექტორიც.თუმცა თქვა რომ ძირითადი ყურადღება ინტერნეტმედიაზე გამახვილდება.
საკონსკურსო განაცხადში, რომელმაც ორგანიზაციას გამარჯვება მოუტანა, რამდენიმე პრიორიტეტია გამოყოფილი.
“მიმდინარე საზოგადოებრივი და პოლიტიკური ვითარების მონიტორინგი და ანალიზი (რაც გულისხმობს შესაბამისი ინფორმაციის ფართო გავრცელებას და განხილვას)
მოქალაქეთა ჩართვა დისკუსიებში დემოკრატიის განვითარების კონკრეტული გზების გამოსარკვევად მედიაში ინტერნეტული პლატფორმების განვითარება (მაგალითი: სკაიპ-ტელევიზიები, სამოქალაქო ჟურნალისტიკის სხვადასხვა ფორმა)
გია ნოდიას თქმით კონკრეტული მედია და არასამთავრობო ორგანიზაციების განაცხადებს თებერვლიდან მიიღებენ. ერთ-ერთი პირობა პროექტის აპოლიტიკურობაა ანუ ის არ უნდა ემსახურებოდეს რომელიმე პოლიტიკური პარტიის ინტერესებს და არც კონკურსანტი ორგანიზაცია უნდა ასოცირდებოდეს რომელიმე პარტიასთან.
როგორც ჩანს პრეზიდენტმა ფულის განაწილება გია ნოდიას ორგანიზაციას მიანდო, რომელიც თავის მხრივ, 800 ათას ლარს პატარ პატარა გრანტებად დაარიგებს.
ტიპური გრანტის ოდენობა არ აღემატება 25-30 ათას ლარს. გრანტების მიღება შეუძლიათ არასამთავრობო ორგანიზაციებს და მედია-საშუალებებს. რაც შეეხება მეორე გამარჯვებულს, ის ნინო დარასელის ფონდია.
“ზაზა დარასელის სახელობის ჟურნალისტიკის განვითარებისა და ხელშეწყობის საქველმოქმედო ფონდი “სიცოცხლე მშვენიერია” საჯარო რეესტრის მიხედვით 2001 წელს დაარსებულა, თუმცა ამონაწერი 2012 წლის 21 დეკემბრით თარიღდება, როდესაც პრეზიდენტის ადმინისტრაციიამ კონკურსი გამოაცხადა. ფონდს გამგეობა ჰყავს, რომელიც სამი წევრისაგან შედგება: ნინო დარასელი, მისი დედა რუსუდან კერვალიშვილი და ნიკოლოზ ბერიძე. აღნიშნული ფონდის მიერ წარსულში გახორციელებული პრექტების შესახებ ინფორმაციის მოძიება შეუძლებელია.
პრეზიდენტის ადმინისტრაციასთან არსებული საკონკურსო კომიის ერთ-ერთი წევრი ვან ბაიბურთი “გურია ნიუსთან” საუბარში ამბობს, რომ ნინო დარასელის პროექტი ტელევიზიას შეეხებოდა, რაშიც ის ნაკლებად ერკვევა და დეტალები არ ახსოვს.
“გია ნოდიას პროექტი ძაან პროფესიულად იყო შედგენილი, თუმცა როცა ეს პროექტი წავიკითხე, არ ვიცოდი რომ ნოდიასი იყო. ეხლა თქვენ მეკითხებით, რატომ შემოიტანა განაცხადი მხოლოდ ოთხმა ორგანიზაციამო? ეს ალბათ იმიტომ რომ ვადები იყო ძალიან შეზღუდული და პროექტის დაწერას მხოლოდ ისეთი პროფესიული ორგანიზაცია მოასწრებდა, როგორიც გია ნოდიას ინსტიტუტია”
როგორც პრეზიდენტის მრჩეველმა, პრეზიდენტის ადმინისტრაციასთან არსებული შესარჩევი კომისიის წევრმა ვერა ქობალიამ ერთ-ერთ მედიასაშუალებასთან განაცხადა, საკონკურსო განაცხადი მხოლოდ ოთხმა ორგანიზაციამ შეიტანა. მათგან ერთ-ერთი უკვალოდ დაიკარგა და კომისიასთან კონტაქტზე აღარ გამოვიდა, ერთი კომისიამ დაიწუნა, ხოლო დანარჩენი ორი გამარჯვებულად გამოცხადდა.
