“წყალი მარგებლის” პასუხი “გურია ნიუსს”

ციტატა სტატიიდან: „დაუზუსტებელი ინფორმაციით, ბევრი ჩოხატაურელი მოქალაქე “ნაბეღლავის” ქარხანაში გაფორმდნენ და მათი თანხა სწორედ ამ კომპანიამ გადაუხადა, თუმცა, ხელშეკრულებები, რომლებიც ეგრეთ წოდებულ “დასაქმებულ პირებს” გაუფორმდათ, გამქრალია და კომენტარების მოპოვება, ამ ეტაპზე, “ნაბეღლავის” ქარხნის ხელმძღვანელობიდან შეუძლებელი აღმოჩნდა.“

მოგახსენებთ ჩვენი კომპანიის პოზიციას და ზემოთ ხსენებული სტატიის პასუხად გწერთ:

სრულიად უარვყოფთ თქვენს მიერ გამოქვეყნებული „დაუზუსტებელი ინფორმაციის„ სინამდვილეს. გვინდა მოგცეთ მცირედი განმარტება კომპანიაში ხელფასების გაცემის პოლიტიკის შესახებ:

კომპანია „წყალი მარგებელი“ არის ქართულ-შვეიცარიული კომპანია, რომლის აუდირება ხდება „დიდი ოთხეულის“ მიერ. შესაბამისად ყველა დეპარტამენტში დანერგილია ევროპული სტანდარტები. ჩვენს კომპანიაში ხელფასების გაცემა ხდება მხოლოდ უნაღდო ანგარიშსწორებით. ნებისმიერი დაქირავებული კადრი, რომელიც ჩვენი კომპანიისგან იღებს შრომით ანაზღაურებას, ფიქსირდება კომპანიის საკადრო ბაზაში და შესაბამისი ხელშეკრულებაც გაფორმებულია.

ამის გადამოწმება ადვილია. ყველა ხელფასის უწყისი, კონკრეტული სახელით და გვარით იგზავნება შემოსავლების სამსახურში და მოწმდება სახელმწიფოს მიერ. ინფორმაცია იგზავნება ყოველთვიურად, ელექტრონული ფორმით.

დამატებით მოგახსენებთ, რომ ჩვენს ოფისთან დაკავშირება მარტივადაა შესაძლებელია, მითუმეტეს გურია Nეწს-თვის, როგორც ტელეფონის ასევე ელექტრონული ფოსტის საშუალებით.

თბილისის ოფისის ნომერი: +995 322 24 23 24

ელ ფოსტა: info@healthywater.ge

სამომავლოდ ვისურვებდით, რომ ნებისმიერი ინფორმაციის გადამოწმება მოხდეს კომპანიის წარმომადგენლებთან, ზემოთ ხსენებული საკონტაქტო ინფორმაციის გამოყენებით.

და ბოლოს მოგახსენებთ, რომ კომპანიის სახელით ვითხოვთ ჩვენი კომენტარის გამოქვეყნებას თქვენს ვებ-გვერდზე.

პატივისცემით,

კომპანია „წყალი მარგებლის“ საზოგადოებასთან ურთიერთობის დეპარტამენტი

ავტორისგან: სტატიის მომზადების დროს, კომპანია “წყალი მარგებლის” ხელმძღვანელობასთან დაკავშირება რამდენჯერმე ვცადეთ. მათ შორის მიხეილ სვიმონიშვილთან, რომლის ტელეფონი გამორთული აღმოჩნდა; ვერ დავუკავშირდით ვერც ლევან გოგოლაძეს _ იგი უცხო ნომრებს არ პასუხობს.

რაც შეეხება ჩვენს მიერ გამოქვეყნებულ “დაუზუსტებელ ინფორმაციას” მოწოდებულია იმ ადამიანების მიერ, რომლებიც პოლიციამ დაკითხვაზე დაიბარა. მათ ჩვენთან საუბარში აღნიშნეს, რომ მათი ინფორმაციით კომპანია “წყალი მარგებელში” იყვნენ გაფორმებული. და კიდევ ერთი დეტალი. ჩვენს კითხვაზე _ რატომ გაფორმდნენ ადამიანები “წყალი მარგებელში” სოციალური მომსახურების სააგენტოს ჩოხატაურის ფილიალის უფროსმა, ზურაბ კალანდაძემ, რომლის მიერ ფორმდებოდა ხელშეკრულებები, ასე უპასუხა: “მე არ ვიცი, ეს მათ ჰკითხეთ”.

ნატო გოგელია