ეს სასამართლო პროცესზე გახდება ცნობილი. შიდა ქართლის ყოფილმა გუბერნატორმა, პარლამენტის ყოფილმა წევრმა, შსს, ფინანსთა სამინისტროს ფინანსური პოლიციის და შემოსავლების სამსახურის ყოფილმა თანამშრომელმა, თბილისის მერის ყოფილმა მოადგილემ, ეროვნული გვარდიის დეპარტამენტის ყოფილმა უფროსმა, ენერგეტიკისა და ბუნებრივი რესურსების მინისტრის ყოფილმა მოადგილემ და ბოლოს “თელასის” ყოფილმა კომერციულმა დირექტორმა, ზურაბ არსოშვილმა თავდაცვის და შსს ყოფილი მინისტრის ბაჩო ახალაიას წინააღმდეგ უკვე მისცა ჩვენება.
როგორც “გურია ნიუსს” ახალაიას დამცველმა გიორგი ონიანმა უთხრა, “ბაჩო ახალაია აცხადებს, რომ, სამწუხაროდ, ყველა გუნდში არსებობენ მოღალატეები, რომლებიც ფულის ან რამეს სანაცვლოდ, ყოველთვის დაწერენ ტყუილს.”
კითხვაზე, თუ რომელ ეპიზოდთან დაკავშირებით მისცა არსოშვილმა ახალაიას წინააღმდეგ ჩვენება “გურია ნიუსს” ონიანმა უპასუხა, რომ “ზურაბ არსოშვილი სასამართლო პროცესზე ბრალდების მოწმეა. მან ჩვენება მისცა ე.წ. სენაკის ეპიზოდში. იმ პერიოდში, იგი თუ არ ვცდები, გვარდიის მეთაური, ანუ რეზერვისტების შტაბის ხელმძღვანელი იყო. არსოშვილი ბაჩო ახალაიას წინააღმდეგ ირიბ ჩვენებას იძლევა. თუ გახსოვთ, “ქართულმა ოცნებამ” ხელისუფლებაში მოსვლის წინა პერიოდში, 500 მოქალაქე გამოიყვანა “თელასიდან” თითქოს ისინი არსოშვილმა გაათავისუფლა. ყველა მას ადებდა ხელს. ამ საქმიდან გამომდინარე, მასზე არის ზეწოლა დ არსოშვილის წინააღმდეგ აღძრულია სისხლის სამართლის საქმე. შეიძლება ზეწოლა უკავშირდება ამ ე.წ. სკანდალს.”
“გურია ნიუსი” შეეცადა ზურაბ არსოშვილთან დაკავშირებას, თუმცა, ჯერჯერობით, ეს ვერ მოხერხდა და მისი კომენტარის მოპოვებას უახლოეს პერიოდში ვეცდებით.
