როგორც ადგილობრივები ამბობენ, არჩევნებამდე მათთან მივიდა რაიონის ყოფილი გამგებელი გიორგი გოგუაძე, რომელმაც მოსახლეობას ჰკითხა, რა სურდათ, რომ ხელისუფლებას გაეკეთებინა მათთვის. თავდაპირველად ადგილობრივებმა ყოფილი ბამბუკის საამქროს აღდგენა მოითხოვეს, მაგრამ გოგუაძემ ამაზე უარი თქვა, “მაგას ვერ დაგპირდებით, ოპოზიცია ხელს შემიშლის და წამოსაძახებელი იქნებაო”. მოსახლეობამ მაშინ საყანე და საძოვარი ფართობების შემოღობვა მოითხოვა, რაზეც გოგუაძე დათანხმდა და არჩევნებამდე 25 დღით ადრე მოსახლეობას შესაღობავად საჭირო ბოძები და მავთულხლართები გაუგზავნა. ყოფილ გამგებელს შეხვედრისას თან ახლდა იმავე უბნის “ნაციონალური მოძრაობის” ზონის კოორდინატორი მერაბ ჩიჩუა, რომლის დახმარებითაც გოგუაძემ მოსახლეობას შესაღობი მასალა გაუგზავნა.
არჩევნებიდან ერთი კვირის შემდეგ, მერაბ ჩიჩუამ მავთულხლართები უკან წაიღო: “ბოძები არ გავატანეთ, არც არაფერს შეგვკითხვია, ისე წაიღო,” _ ამბობენ ადგილობრივები.
ფრაქცია “ქართული ოცნება დემოკრატიული ლანჩხუთის” თავმჯდომარემ, მარინე თურნავამ არა ერთხელ მოითხოვა საკრებულოს სხდომაზე ამ საკითხის გამოძიება, რასაც საკრებულოს თავმჯდომარე ასე პასუხობდა: “აღნიშნული საკითხის მოკვლევა დავალებული აქვს მუნიციპალიტეტის გამგეობას, რომელმაც უნდა წარმოადგინოს მოსაზრება ამ საკითხთან დაკავშირებით.”
ადგილობრივები აპრილის ბოლომდე აძლევს ვადას საკრებულოსა და გამგეობას: “თუ არ მოაგვარებენ ამ პრობლემას, ეს ყველაფერი კარგად არ დასრულდება,” _ ამბობს ორაგვისღელის მოსახლეობა.
გამგებლის მოადგილის, ვახტანგ ზენაიშვილის თქმით, ამ საკითხთან დაკავშირებით ორაგვისღელის მოსახლეობას განცხადების სახით არ მიუმართავს: _ საჭიროა შემოვიდეს განაცხადი, რის შემდეგაც გამგეობის აპარატი დაინტერესდება და გადახედავს ამ საკითხს, _ გვითხრა ზენაიშვილმა.
რაც შეეხება მერაბ ჩიჩუას, ის საერთოდ უარყოფს მსგავს ინფორმაციას და ამბობს, რომ მას არანაირი მავთულხლართები არც მიუტანია და არც წაუღია: “რა ჩემი საქმე იყო მავთულის ან მიტანა, ან წამოღება?” _ გაკვირვებული კითხულობს ჩიჩუა. .
აღნიშნული საქმესთან დაკავშირებით ქალაქის მერს, გივი მენაღარიშვილს გავესაუბრეთ.
_ ვინ და რატომ წაიღო უკან შესაღობი მასალა?
_ მე როგორც ვიცი, მავთულხლართები წამოღებულია იმიტომ, რომ მას, დასამაგრებლად, სჭირდებოდა ბოძები. როგორი ბოძებიც ახლა ადგილზეა მიტანილი, მათზე არ დამაგრდებოდა, მოსახლეობამ კი ვერ უზრუნველყო მათი დამზადება. მე როგორც ვიცი ის მავთული დასაწყობებულია, კონკრეტულად სად, არ ვიცი. პირობით არის ნათქვამი, რომ როდესაც მოსახლეობა დაამზადებს ბოძებს, დაუბრუნებენ მავთულხლართებს.
_ როგორც მოსახლეობა აცხადებს არჩევნების წინ მიუტანეს მავთულხლართები, არჩევნების შემდეგ კი უკან წამოიღეს. ნიშნავს თუ არა ეს ამომრჩევლის მოსყიდვას?
_ არ ვიცი, მაგის შესახებ ვერაფერს მოგახსენებთ.
როგორც ქალაქის მერის საუბრიდან ირკვევა, მავთულხლართების უკან წაღება და შენახვა ისევ წინა ხელისუფლების დავალებით მოხდა, მაგრამ სად არის შეინახეს და არის თუ არა საერთოდ შენახული, “გურია ნიუსმა” ჯერ ვერ დაადგინა. ამასობაში ხვნა-თესვის სეზონი მოახლოვდა, ორაგვისღელის მოსახლეობა კი ისევ შეუღობავ საყანე ფართობებსა და საძოვრებზე დარდობს.
