დიდი ხანი არ არის, რაც ოზურგეთში მცხოვრებმა სოსო და გალინა წიტაიშვილებმა ხის მასალით სხვადასხვა საოჯახო ნივთების დამზადება დაიწყეს_ მათ სხვადასხვა წვრილი ხელსაქმე არაეთხელ უკეთებიათ.
პროფესიით ფარმაცევტ ქალბატონსა და წარსულში რუსეთში სამხედრო თანამდებობაზე ნამუშევარ სოსო წიტაიშვილს ერთმანეთი შორეულ ვოლოგდაში შეუყვარდათ. ეროვნებით რუსმა ქალბატონმა უმოკლეს დროში ისწავლა ქართული წერა-კითხვა და როცა ქმართან ერთად, საქართველოში დაბრუნდა, არა ერთი საკუთარი ხელობა საქმედ, შემდეგ კი შემოსავლის წყაროდ აქცია. ოთხი შვილის ახალგაზრდა მშობლებს ინტერესის გაჩენისთანავე დაებადათ სურვილი, რაც შეიძლება მალე ეკოლოგიურად სუფთა და ხარისხიანი მერქნისგან დაემზადებინათ სხვადასხვა საოჯახო ნივთები: ხაჭაპურის დასადები და დასაჭრელი დაფები, პურის შესანახი ყუთი, საკანფეტე, კვერცხების ჩასალაგებელი სპეციალური, ფორმებიანი ყუთი…
_ აბა, ნახეთ, როცა ამდენს საუბრობენ ეკოლოგიურად სუფთა პროდუქტზე, თვით ეს პროდუქტი რაში დევს? ცარიელი პლასტმასის ჭურჭელშია ყველაფერი მოთავსებული. ახლა ჩვენი ხელობა ნახეთ და დააკვირდით ნამუშევრებს, რაშიც პროდუქტი უნდა ჩადოთ თუ ზედ უნდა დაჭრათ ან გააბრტყელოთ, _ გვეუბნება გალინა წიტაიშვილი და მეუღლესთან ერთად, საკუთარი ხელით ნაკეთებ ნაირ-ნაირ ნივთებს გვაჩვენებს.
სამუშაო იარაღები მოფიქრებისთანავე შეიძინეს: ხელის ელექტრობურღი, შალაშინი, ზუმფარის ქაღალდი. სამუშაოდ კოპიტისა და არყის ხის მასალას იყენებენ. საკმაოდ შრომატევად საქმეს მარტო ასრულებენ და გაკეთებულ ნივთებს არცთუ ძვირად ყიდიან: საკანფეტე 5-6 ლარი ღირს, კვერცხების ჩასალაგებელი _ 5 ლარი. ხაჭაპურის დასადები სპეციალური დაფა, რომელიც ორმაგია და ზედა ფენა ნაჩვრეტებიანია _ 10 ლარი. 25 ლარი ღირს პურის შესანახი ყუთი, ზოგიც _ 40 ლარამდე, გააჩნია ტევადობას და დიზაინს. ყველა ეს ნივთი გამორჩეულია სილამაზით და პრაქტიკული გამოყენების თვალსაზრისითაც.
როგორც გალინა წიტაიშვილი ამბობს, ეკოლოგიურად სუფთა მასალისგან დამზადებული ჭურჭელი აუცილებელია. მიაჩნია, რომ დღევანდელი მიდგომა, რომ ეკოლოგიურად სუფთა პროდუქტზე უნდა ვიზრუნოთ, სწორია, მაგრამ სუფთა პროდუქტი ასევე ეკოლოგიურად სუფთა ჭურჭელში უნდა ჩადო _ ასეთია მისი აზრი და ამ იდეამ საკმაოდ გაუმართლა. ოჯახის ნამუშევრებს საკმაო კლიენტი ჰყავს და როგორც წიტაიშვილები ამბობენ, ათი რიცხვი დღითი-დღე იზრდება.
_ თქვენ ვერ წარმოიდგენთ, როგორი პიკანტური გემო აქვს პურს, როცა მას არყის ხის მასალისგან დამზადებულ სპეციალურ ყუთში ვათავსებთ _ ერთი კვირის მანძილზე არ ფუჭდება, ობს არ იკეთებს, _ ამბობს ქალბატონი გალინა.
იგი თვითნასწავლი დიზაინერიცაა. საკუთარი ნამუშევრებისთვის თვითონ ქმნის ესკიზებს, შემდეგ კი მხოლოდ ეკოლოგიური გუაშით აფერადებს და ხატავს. ყველაფერი ეკოლოგიურად სუფთა უნდა იყოს, ისეთი, რომ ადამიანს არანაირად არ ავნოს, ზედაპირი იფარება სპეციალური ლაქით, რომელიც ეკოლოგიურად სუფთაა, ჯანმრთელობისთვის საშიში არ არის _ ასეთია მათი მოწოდება. ხის მასალას და საღებავებს მხოლოდ შეკვეთით და სანდო კლიენტისგან ყიდულობენ.
_ სანდოობის მოპოვებას დიდი დრო სჭირდება, დაკარგვა კი უცებ იქნება. ამიტომ ვუფრთხილდებით ჩვენს ნამუშევარს, მის ხარისხს. მხოლოდ პურის ფული გვრჩება, მეტი არაფერი, მაგრამ ასე ნაშოვარი პური ძალიან გემრიელია, _ ამბობს ჩვენი რესპონდენტი ქალბატონი.
გალინა წიტაიშვილი საუკეთესო კულინარიცაა. სააღდგომოდ ძალიან ბევრ შეკვეთებს იღებს და ახლა პასკის ფესტივალზე გამოფენისთვისაც ემზადება.
_ ფესტივალზე მრავალმხრივი გამოფენით წარვდგებით, გამოვფენთ და გასაყიდად გამოვიტანთ ჩვენს ნამუშევრებს. ასევე, მექნება კულინარული კუთხე, სადაც მრავალნაირი ზომის ულამაზეს პასკებს დავალაგებ. ამ დღეს საზეიმო განწყობით ველოდები და ვნახოთ, რა გამოვა, გული კარგს მეუბნება, _ გადამდები ხალისით გვესაუბრება ქალბატონი გალინა. ისეა შინაგანად დამუხტული, თითქოს, არ იცის, სად წაიღოს ამდენი ენერგია.
კიდევ ერთი შტრიხი მისი ბიოგრაფიისა _ გალინა წიტაიშვილმა ახლახან დაიწყო “გურია ნიუსთან” თანამშრომლობა და ეს ძალიან უხარია, სურს, გაზეთის წარმატების თანამონაწილე გახდეს.
