მდინარის სიგრძე 14 კილომეტრია, სიღრმე კი 20-დან 100 მეტრამდე მერყეობს. კანიონს ამშვენებს რამდენიმე წყალუხვი ჩანჩქერი. კანიონს გააჩნია ასევე მღვიმეები, საიდანაც გამოედინება კარსტული წყლები.
დაცული ტერიტორიების სააგენტომ, 10 ივლისს, ოკაცეს კანიონზე მიმდინარე ტურისტული ინფრასტრუქტურული სამუშაოების ანგარიში წარმოადგინა.
პროექტის არქიტექტორმა ალექსანდრე ნატროშვილმა კანიონის მიმდებარე ტერიტორიაზე განთავსებული საფეხმავლო ბილიკები, ექსტრემალური ტურიზმის მოყვარულთათვის შეთავაზებული სერვისები, პროექტის მშენებლობაზე გამოყენებული მასალები, შენობათა დიზაინი და პანორამული გადმოსახედები განიხილა.
ნატროშვილის თქმით, პროექტის ფარგლებში იგეგმება ვიზიტორთა ცენტრის, გამშვები პუნქტის და სხვა ტურისტული ინფრასტრუქტურის მშენებლობა. დადიანების ტყე-პარკში, რომელიც კანიონისკენ მიმავალ გზაზე აუცილებლად უნდა გაიარონ ვიზიტორებმა, მოეწყობა ეთნოგრაფიული მუზეუმი, რესტავრაცია ჩაუტარდება თავად სასახლეს. ვიზიტორთა ცენტრში, რომლითაც იწყება ტურისტული მარშრუტი, განთავსებული იქნება კაფე, ბარგის შესანახი ოთახი, ამფითეატრის ტიპის სალექციო დარბაზი, სადაც ექსკურსიებზე ჩასული მოსწავლეები ღია გაკვეთილის ჩატარებასაც შეძლებენ.
ოკაცეს კანიონზე მიმდინარე სამუშაოებისთვის ცენტრალური ბიუჯეტიდან 4 850 000 ლარია გამოყოფილი, აქედან, 2012 წელს 3 920 000 ავანსად გაიცა, დარჩენილი თანხა პროექტს 2013 წელს გადაეცემა ეტაპობრივად. მშენებლობების დასრულება ოქტომბრის ბოლოსთვის იგეგმება.
თუმცა, შეხვედრაზე დამსწრე სპეციალისტების მიერ პროექტის მიმართ მნიშვნელოვანი შენიშვნები გამოითქვა. უფრო მეტიც, თუ ეს ყველაფერი არ გაითვალისწინეს, სამუშაოების შეჩერება აუცილებელი იქნება.
გია გიორგაძე, არქიტექტორ-დამგეგმარებელი, ევროკავშირის ექსპერტი: “ჩემი აზრით, პროექტში დიდი შრომაა გაწეული. ჩემი შენიშვნები ეხება ადმინისტრირებას. ეს ძალიან ძვირი პროექტია და დასახელებული 4 ნახევარი მილიონი ლარი მარტო ბილიკებს არ ეყოფა. რაც მთავარია, ამ ყველაფრის ფინანსური მონიტორინგი უნდა მოხდეს. გარდა ამისა, საპროექტო დავალება არ არსებობს, რომელიც თავად პროექტს უნდა ესადაგებოდეს. შემდეგ თავად ზედამხედველმა უწყებამ უნდა გააკონტროლოს, რამდენად კარგად სრულდება საპროექტო დავალება. კითხვებია ლოჯისტიკასთან, საინჟინრო ინფრასტრუქტურის უსაფრთხოებასთან და ა.შ. კანიონებზე ბილიკების მშენებლობა ვერტმფრენებით რომ ხორციელდება, ლოჯისტიკურად გათვლილი უნდა იყოს, სად უნდა დასხდნენ ეს ვერტმფრენები, სად უნდა დალაგდეს კონსტრუქციები. არ არის ასევე გამოკვლეული, მზად არის თუ არა საერთოდ კანიონი მსგავსი ტიპის მშენებლობისთვის. კითხვები არ არის გაცემული იმაზე, ხომ არ გამოიწვევს ამგვარი ჩარევა, ბუნების ძეგლის განადგურებას და ა.შ. თუ ამ კითხვებს პასუხები არ გაეცემა, ჩემი აზრით, პროექტი უნდა შეჩერდეს.”
გიორგაძის თქმით, ამ ყველაფრის გათვალისწინება თავად დაცული ტერიტორიების სააგენტოსთვისაა აუცილებელი, რადგან კანიონზე მიმდინარე სამუშაოებზე ეს უწყებაა პასუხისმგებელი.
ამერიკის საერთაშორისო დახმარების პროგრამის წარმომადგენელი საქართველოში, პაატა შანშიაშვილიც უსაფრთხოებაზე აკეთებს აქცენტს. მისი თქმით, ბუნებრივი ძეგლის დევალვირების საფრთხესთან ერთად, ჩამონგრევის საფრთხეც არსებობს. შანშიაშვილის აზრით, უნდა მოხდეს არამარტო მშენებლობის შეფასება, არამედ, გარემოს სრულფასოვანი გამოკვლევა, თუნდაც გეოლოგიური თვალსაზრისით. არის თუ არა, მიწისძვრებზე გათვლილი, რა გავლენას მოახდენს კანიონზე ხელოვნური ჩარევა ადგილობრივ ბიომრავალფეროვნებაზე და ა.შ.
როგორც პროექტის არქიტექტორი ალექსანდრე ნატროშვილი აცხადებს, მშენებლობა სეისმურად 8 ბალზეა გათვლილი. გარდა ამისა, პროექტმა ექსპერტიზა უსაფრთხოებაზე ლევან სამხარაულის სახელობის სასამართლო ექსპერტიზის ეროვნულ ბიუროში გაიარა. თუმცა სპეციალისტების თქმით, ეს არ არის საკმარისი და მსგავსი ტიპის მშენებლობას სპეციალურად შექმნილი სახელმწიფო კომისია აფასებს.
დაცული ტერიტორიების სააგენტოს თავმჯდომარე რატი ჯაფარიძე ამბობს, რომ მათ უწყებას უკვე დაგეგმილი პროექტი გადაეცა და მის მიხედვით მშენებლობას განაგრძობენ. ხოლო პროექტის თავიდან შეფასება და იმ მოთხოვნების გათვალისწინება, რაც აქვთ სპეციალისტებს, დიდ დროს და გაცილებით მეტ თანხებს მოითხოვს. ეს კი, მისი ვარაუდით, საერთოდ, მშენებლობის გაჩერებას გამოიწვევს და ბუნების ამ შესანიშნავ ძეგლს ვიზიტორები ვერ ნახავენ.
შეხვედრაზე გადაწყდა, რომ სასურველია მოხდეს პროექტის მცირედი კორექტირება, ჩატარდეს თანხის შიდა გადანაწილება და მენეჯმენტის ახალი სქემის შემუშავება.
