კანონპროექტების შესაბამისად, 2014 წლის 1 თებერვლამდე ჩერდება სააღსრულებო პროცედურები იმ სააღსრულებო საქმეებზე, რომლებიც შეეხება სხვისი მფლობელობიდან/სარგებლობიდან უძრავი ქონების გამოთხოვას და კრედიტორის მფლობელობაში/სარგებლობაში გადაცემას ან/და უძრავი ქონებიდან პირთა გამოსახლებას, როდესაც აღსასრულებელი გადაწყვეტილება გამომდინარეობს სესხის ან/და იპოთეკის ხელშეკრულებიდან, ქონების შემძენის (სააღსრულებო წარმოებისას – აუქციონზე ქონების შემძენი, აუქციონის გარეშე ქონების შემძენი, ქონების ნატურით მიმღები) განცხადებიდან, აგრეთვე აღსასრულებელ გადაწყვეტილებებზე, რომლებიც გამომდინარეობს სესხის ან/და იპოთეკის ხელშეკრულებიდან და ითვალისწინებს უძრავი ქონების აუქციონზე რეალიზაციას.
ბიზნეს ომბუდსმენი განცხადებას ავრცელებს, რომელშიც ის გარემოებებია ჩამოთვლილი, რის საფუძველზეც აღნიშნული კნონპროექტის მიღება მიზანშეუწონლად მიაჩნია.
“მიგვაჩნია, რომ აღნიშნული კანონპროექტის მიღება არ არის მიზანშეწონილი, შემდეგ გარემობათა გამო:
– კანონპროექტის მიღება გააუარესებს ქვეყნის საინვესტიციო გარემოს და პრობლემებს შეუქმნის ბიზნეს სექსტორს ფინანსური რესურსების მოზიდვაში, რადგან მათ საკუთრებაში არსებული უძრავი ქონება არალიკვიდური გახდება.
– ცვლილებები პრობლემებს შეუქმნის საბანკო-საფინანსო სექტორს გაცემული იპოთეკური სესხების დაბრუნებაში და წაახალისებს მოვალის მიერ ნაკისრი ვალდებულებების შეუსრულებლობას (გადავადების პერიოდში).
– კრედიტის გაცემა სერიოზული რისკის მატარებელი გახდება, რადგან 7 თვის განმავლობაში მისი ამოღება ფაქტობრივად შეუძლებელი იქნება. შემცირდება კრედიტზე ხელმისაწვდომობა. ამავდროულად, ცვლილებები გამოიწვევს კრედიტის გაძვირებას და ნეგატიურად აისახება ქვეყნის ეკონომიკის განვითარებაზე, მომხმარებელზე და სამუშაო ადგილებზე.
– პრობლემა შეექმნება უძრავი ქონების ბაზარს, რადგან იპოთეკური სესხით უძრავი ქონების შეძენა გართულდება და უძრავი ქონება სესხის უზრუნველსაყოფად, პრაქტიკულად, გამოუსადეგარი გახდება.
– კანონპროექტი ასევე ვრცელდება ისეთ სასესხო ურთიერთობებზე, სადაც ხელშეკრულების ორივე მხარე მეწარმე სუბიექტია.
უფლებები, რომლებსაც კანონპროექტი ეხება, წარმოშობილია მოქმედი კანონმდებლობის საფუძველზე. დარღვევის არსებობისას კი დავა საქართველოს კანონმდებლობის შესაბამისად უნდა გადაწყდეს.
მიგვაჩნია, რომ ასეთი დროებითი ღონისძიებები ვერ მოაგვარებს იმ პირთა სოციალურ პრობლემებს, რომელთა დასახმარებლად აღნიშნული კანონპროექტის ინიცირება მოხდა და სერიოზულად შეაფერხებს ბიზნესის განვითარებას,” _ აღნიშნულია განცხადებაში.
