გარდა ნაკლები ხარისხის ნიუანსისა ქართველი და რუსი ხალხის მეგობრობასა და მომავალი სიტუაციის ასე თუ ისე შეცვლისა.
მამუკა არეშიძე: “რაც გუშინ იყო თქმული და იყო საკმაოდ მნიშვნელოვანი, ეს იყო ქართველი და აფხაზი და ქართველი და ოსი ხალხის უშუალო დიალოგის აუცილებლობა. ერთი სიტყვით, ეს იყო ტრადიციული საუბარი გარკვეული ნიუანსით. მიუხედავად იმისა, რომ ნინო შუბლაძე ცდილობდა ღია დიალოგზე გამოეწვია მედვედევი, ეს არ გამოვიდა და არც გამოვიდოდა, რადგან ასეთი შინაარსის საუბარი იყო განსაზღვრული წინასწარ მედვედევის გუნდის მიერ. არაფერი ახალი არ თქმულა ნატოსთან დაკავშირებითაც, უბრალოდ, ღიად იყო დაფიქსირებული, რომ ნატოსთან მიმართებაში პოზიციის არჩევა არის ჩვენი გადასაწყვეტი, მათ კი მათი გადასაწყვეტი საკითხები აქვთ. ჩემი აზრით, ამ საუბარს ჰქონდა ერთი გზავნილი _ რუსეთი მზადაა მოლაპარაკებებზე, თუ საქართველოს ხელისუფლება დათმობაზე წამოვა. თუნდაც ის, რომ მედვედევი “რუსთავი 2”-ის ჟურნალისტს შეხვდა და თქვენ იცით, როგორ აფასებენ ამ ტელეკომპანიის მუშაობას და პოლიტიკურ მრწამსს, ესეც სწორედ ამის ერთ-ერთი მანიშნებელია.
გუშინდელი საუბრიდან კიდევ ერთხელ გახდა ცნობილი, რომ მედვედევმა და სარკოზიმ მოაწერეს ხელი კიდევ რაღაც სხვა ტექსტს, რომელიც იცის მხოლოდ სააკაშვილმა, არ არის ჩვენთვის ცნობილი და კარგი იქნება, თუ ამ კითხვას სააკაშვილს დავუსვამთ _ რა ტექსტზეა საუბარი.
გუშინ მედვედევს წამოსცდა თუ სპეციალურად თქვა, რომ რუსეთის ეკონომიკა იყო კარგი, მაგრამ დღეს სიტუაცია გართულებულია. ეს ჩვენთვისაც ცნობილია, რომ 2014 წლისთვის რუსეთის ეკონომიკას საკმაოდ დიდი ვარდნა ექნება. ახლა რუსეთი ცდილობს საერთაშორისო საზოგადოებების თვალში აღარ იყოს როგორც ოკუპანტი და უნდა აიძულოს საქართველოს ხელისუფლება, შეურიგდეს რეალობას და საერთოდ მოისპოს ტერმინი _ ოკუპანტი. ყოველ შემთხვევაში, მისი დიდი სურვილია ოკუპაციაზე ლაპარაკი გადაიდოს რამდენიმე ხნით.
ჩვენ არ გვაქვს პასუხი კითხვაზე _ რა გვინდა. აქედან გამომდინარე, არ გვაქვს განსაზღვრული ფუნქცია, ამიტომ ძალიან რთულია გეოპოლიტიკური მოთამაშის როლი შეასრულო. ქვეყანას უნდა ჰქონდეს აქტივობაზე აგებული ინიციატივა, თორემ მარტო იმის თქმა, რომ მინდა სოხუმში ვიყო, მინდა ცხინვალში ვიყო, ამაზე პასუხი იქნება – გინდოდეს! მხოლოდ სურვილი არ კმარა, უნდა გქონდეს გეგმა, თუ როგორ გინდა ეს განახორციელო. ასე რომ, სანამ ფუნქცია არ გვექნება, არანაირ გეოპოლიტიკურ მოთამაშეობაზე ლაპარაკი არ შეიძლება.”
მამუკა არეშიძე შეეხო აბაშიძისა და კარასინის შეხვედრებს: “მიუხედავად იმისა, რომ ასეთი ტიპის შეხვედრები პოლიტიკური თვალსაზრისით ბევრს ვერაფერს წყვეტს, მაინც წინგადადგმული ნაბიჯია, რადგან ტრანსპორტის და სავაჭრო ბაზარზე ურთიერთობების დალაგება მაინც პოლიტიკაზე მუშაობს.”
მამუკა არეშიძის შეფასებით, მედვედევის საუბარი იყო მოზომილი და ფრთხილი გზავნილებით გაჯერებული, რათა ვინმეს არ გაუჩნდეს რაიმეს ილუზია.
