კომისიას იუსტიციის მინისტრი თეა წულუკიანი ხელმძღვანელობს.
როგორც იუსტიციის მინისტრმა შეხვედრის დასრულების შემდეგ განაცხადა, კომისიამ პოლიტიკური პარტიებიდან შემოსული, მათ შორის “ერთიანი ნაციონალური მოძრაობის” 7 წერილი განიხილა, სადაც მიხეილ მაჭავარიანი სხვადასხვა ტიპის დარღვევებს აღწერს. მინისტრის განცხადებით, გამოვლინდა, რომ ამ დარღვევებიდან ნაწილი გასულ წელს მომხდარი ფაქტებია ან რამდენიმე თვის წინ დაწყებულ სისხლის სამართლის გამოძიებას ეხება და საერთო არაფერი აქვს მიმდინარე საარჩევნო პროცესთან. ნაწილი კი შესაბამისი უწყებების მიერ შესწავლას, ნაწილი კი დაზუსტებას საჭიროებს.
შეხვედრაზე განხილული იყო კომისიის ფორმატი. როგორც თეა წულუკიანმა განაცხადა, მის მიერ დაშვებული გამონაკლისის ძალით, “ნაციონალური მოძრაობა”, რომელსაც გამძაფრებული აქვს განცდა იმისა, რომ შესაძლოა დარღვევების მსხვერპლი იყოს, შეხვედრაზე ორი წევრით იქნა წარმოდგენილი, რაც სხვა პოლიტიკურმა პარტიებმა გააპროტესტეს. კომისიის თავმჯდომარემ ეს საკითხი კენჭისყრაზე დააყენა და 14 ხმის უმრავლესობით გადაწყდა, რომ ამიერიდან ნაციონალური მოძრაობა სხვა პარტიების მსგავსად, ერთი წევრით იქნება წარმოდგენილი.
“ჩვენ აგრეთვე მივიღეთ გადაწყვეტილება, რომ პარტიები ყოველთვის ერთი და იმავე პირით იყვნენ წარმოდგენილი შეხვედრებზე, გარდა შეფერხების განსაკუთრებული შემთხვევებისა. არასამთავრობო სექტორს კი ვთხოვ, რომ მათი განცხადებები თუ რეკომენდაციები, რომლებზედაც ისინი შეხვედრებზე ისაუბრებენ, წინასწარ გადმოუგზავნონ კომისიას, რათა უკვე მოწოდებული ინფორმაციის საფუძველზე შედგეს საკითხთა განხილვა,” _ განაცხადა თეა წულუკიანმა.
იუსტიციის მინისტრმა არჩევნებზე ადმინისტრაციული რესურსის გამოყენებასა და სხვადასხვა ღონისძიებებში გამგებლების მონაწილეობის შესახებაც ისაუბრა. თეა წულუკიანის განცხადებით, მართალია, მოქმედი კანონი არ უკრძალავს გამგებლებს ამა თუ იმ ღონისძიებაში ჩართვას, მაგრამ მისი, როგორც კომისიის თავმჯდომარის მოსაზრებით, უმჯობესი იქნება, თუკი ისინი რომელიმე ღონისძიების წამყვან ფიგურებად ქცევის ნაცვლად, მოსახლეობის ყოველდღიური პრობლემების მოგვარებით დაკავდებიან.
რაც შეეხება კომისიის განახლებულ შემადგენლობას, კომისიის თავმჯდომარემ აღნიშნა, რომ იუსტიციის სამინისტროს დაქვემდებარებაში გადასვლის შემდეგ, თავისუფალი და სამართლიანი არჩევნებისათვის უწყებათაშორისი კომისიის შემადგენლობას ორი სამინისტრო, ერთი არასამთავრობო ორგანიზაცია და ორი პარტია დაემატა.
“სხვა არასამთავრობო ორგანიზაციები, რომლებსაც საარჩევნო გარემოსთან მუშაობის გამოცდილება აქვთ და მოითხოვენ სხდომებზე დასწრებას, რა თქმა უნდა, იქნებიან დაშვებულნი. პოლიტიკური პარტიები კი, არა მარტო კვალიფიციური, არამედ ისინიც, რომლებსაც შეიძლება ჰყავდეთ კანდიდატი, ყველა წარმოდგენილია. დღეს კომისია არის უფრო წარმომადგენლობითი და გაცილებით უფრო გამჭვირვალეც,” _ დასძინა იუსტიციის მინისტრმა.
პრეზიდენტის მიერ ხელმოწერილი საკანონმდებლო ცვლილების საფუძველზე, რომელიც “საკანონმდებლო მაცნეში” მიმდინარე წლის 8 აგვისტოს გამოქვეყნდა, თავისუფალი და სამართლიანი არჩევნებისათვის უწყებათაშორისი კომისია ეროვნული უშიშროების საბჭოს ნაცვლად იუსტიციის სამინისტროსთან შეიქმნა.
თავისუფალი და სამართლიანი არჩევნებისათვის უწყებათაშორისი კომისია განიხილავს საკითხებს, რომლებიც უკავშირდება საჯარო მოსამსახურეების მიერ საქართველოს საარჩევნო კანონმდებლობის დარღვევის ფაქტებთან მიმართებით მედიით გავრცელებულ ინფორმაციას, აგრეთვე, დარღვევის შესახებ ინფორმაციას, რომელსაც უწყებათაშორის კომისიას აწვდიან პოლიტიკური გაერთიანებები (საარჩევნო სუბიექტები) ან დამკვირვებელი ორგანიზაციები. განხილვის შედეგად, კომისია გამოსცემს რეკომენდაციებს საჯარო მოსამსახურეებისა და საჯარო დაწესებულებების მიმართ. საარჩევნო დარღვევების შესახებ, ნებისმიერ დროს, კომისიის სამდივნო ინფორმაციას მიიღებს შემდეგ ნომერზე – 599 85 00 11. ასევე მოქმედებს კომისიის ელექტრონული ფოსტა, რომლის მისამართია IATF@justice.gov.ge
