სწორედ აქ გადის გაზის მაგისტრალური მილსადენი, რომლითაც აჭარა მარაგდება.
ამ სამუშაოების დათვალიერების შემდეგ კახი კალაძემ “გურია ნიუსის” კითხვებს უპასუხა.
_ ბატონო კახა, ფლობთ თუ არა ინფორმაციას, “ოზურგეთის მუნიციპალიტეტისთვის 23 მარტს სტიქიით დაზარალებულთა დასახმარებლად გამოყოფილი 450 000 ლარის ხარჯვის მიზნობრიობასთან დაკავშირებით? ჩვენი ინფორმაციით, არ არსებობს სტიქიით მიყენებული ზიანის დამთვლელი კომისიის დასკვნა ზარალის ოდენობის შესახებ. მაშინ, მუნიციპალიტეტს სარეაბილიტაციო მასალებით დახმარება საქველმოქმედო ფონდმა “ქართუმ” და ფინანსთა სამინისტროს მომსახურების სააგენტომ გაუწიეს და ზარალის სალიკვიდაციო სამუშაოების გახორციელებისთვის გამოყოფილი იქნა 2 000 ლიტრი დიზელი და ასევე, 1 000 ლიტრი ბენზინი, რომელიც, დოკუმენტის თანახმად, ზარალის დამთვლელი კომისიის მოძრაობას მოხმარდა. ამ საკითხზე პრემიერ–მინისტრის დავალებით შექმნილი საგანგებო შტაბი მუშაობდა, რომლის ხელმძღვანელიც თქვენ ბრძანდებოდით.
_ ზეპირად არ მახსოვს თანხის ოდენობა, მგონი, ცოტა მეტი იყო, რადგან მერე ურეკიც დაემატა, მე რა ინფორმაციაც მომაწოდეს, ყველა სამუშაოებია შესრულებული.
_ ბატონო კახა, როგორ ფიქრობთ, რამდენად რეალურია ის ინფორმაცია, რაც მოგაწოდეს და მიგაჩნიათ, რომ სამუშაოები სრულყოფილად არის შესრულებული? ჩვენ გაგვაჩნია დოკუმენტები, სადაც თანხები გაწერილია, თუმცა, სამუშაოები შესრულებული არ არის, ასევე დოკუმენტების თანახმად ძალიან ბევრმა მიმართა გამგეობას დასახმარებლად და დახმარება ცოტას გაეწია, მაგალითად ქალაქ ოზურგეთში 92 დაზიანებული სახლიდან მხოლოდ 17-ია რეაბილიტირებული; უფრო რთული სიტუაციაა სოფლებში _ უკვე ერთი თვეა ვითხოვთ მოგვაწოდონ დოკუმენტაცია, თუმცა, ჯერ არ მიგვიღია… თქვენ თუ მოიკითხეთ, რამდენად კანონიერად ახორციელებს მუნიციპალიტეტის გამგეობა ამ სამუშაოებს?
_ კიდევ ერთხელ გეტყვით _ რა თანხებიც იყო მოთხოვნილი, ჩვენ დავაკმაყოფილეთ, რადგანაც ადგილობრივი ბიუჯეტი ამ სამუშაოებს ვერ განახორციელებდა, ჩვენი მხრიდან ყველაფერი იქნა მიწოდებული და რა ვიცი, მგონი ყველაფერი კარგადა გაკეთებული.
_ თქვენმა სამსახურმა მონიტორინგი გაუწია ამ სამუშაოებს?
_ კი, კი.
_ ბატონო კახა, ფლობთ თუ არა ინფორმაციას, რომ ოზურგეთის მუნიციპალიტეტის გამგებლის მოვალეობის შემსრულებელს ბატონ კოტე შარაშენიძეს აღნიშნულ ფაქტთან დაკავშირებით პროკურატურაში აქვს საქმე და ამ სამუშაოებსა და თანხების არამიზნობრივად ხარჯვებთან დაკავშირებით პროკურატურა წინასაგამოძიებო მოკვლევას აწარმოებს? ამის შესახებ “გურია ნიუსი” არა ერთხელ წერდა.
_ პირველად მესმის და ძალიან კარგი, თუ აშუქებთ ამ ყველაფერს. თუ პროკურატურაშია საქმე, მაშინ პასუხი პროკურატურამ უნდა გაგცეთ. კი, ბატონო, თუ კითხვები არსებობს ამასთან დაკავშირებით, გააგრძელებს პროკურატურა თავის საქმეს და მუშაობას. დაველოდოთ მის დასკვნას.
_ ბატონო კახა, როდის განახლდება ოზურგეთის მუნიციპალიტეტში წინასაარჩევნოდ დაწყებული და შეწყვეტილი გაზიფიცირება?
_ გაზიფიცირების სამუშაოები უკვე მასშტაბურ ხასიათს იღებს. ალბათ, უკვე სექტემბრიდან გაიხსნება ფრონტი ყველა მიმართულებით. დავიწყეთ ოზურგეთის რაიონიდან და ვფიქრობ, 2015 წლის ბოლოსთვის ქვეყნის მასშტაბით გაზიფიცირება დასრულდება.
_ მოსახლეობა ამ პროცესებს მოუთმენლად ელოდება, თუმცა, კითხვებზე ჯერ პასუხები არ აქვთ.
_ მესმის. ჩვენც მაგიტომ ვმუშაობთ და ყველაფერს ვაკეთებთ, რომ მოსახლეობა კმაყოფილი გვყავდეს. ჩვენი ინტერესია, ნებისმიერმა მოსახლემ მიიღოს გაზი. ის, რაც ხდებოდა წინასაარჩევნოდ, იყო “ნაციონალური მოძრაობის” მიერ გაკეთებული პიარ-აქცია, იმიტომ, რომ სინამდვილეში, იქ მოსახლეობისთვის არაფერი არ კეთდებოდა. თითქოს, მათ რეგიონებში ყველა მიმართულებით დაიწყეს გაზიფიკაცია, მაგრამ, თქვენც გეცოდინებათ, ბევრ სოფლებში, რომლებიც მე პირადად ფეხით მაქვს შემოვლილი, ყრია მილები, გადათხრილია ქუჩები, ზოგ შემთხვევაში შესრულებულია სამუშაოები, მაგრამ არის კატასტროფული მდგომარეობა _ მილები უვარგისია, ისეთი, რომ ექსპლუატაციაში წარმოუდგენელია. ამ სამუშაოებს ახორციელებდნენ ადგილობრივი მუნიციპალიტეტები, რომლებსაც არანაირი გამოცდილება არ ჰქონდათ ამ სფეროში. ვიმეორებ, რომ არის ძალიან ცუდი მდგომარეობა, მაგრამ ჩვენ ნელ-ნელა ყველაფერს გამოვასწორებთ.
_ გაზიფიცირება, ძირითადად, ცენტრალურ უბნებში ხდებოდა და მოსახლეობის უმეტესობამ, მძიმე სოციალური ფონის გამო გაზის სახლში შეყვანა ვერ მოახერხა. რაიმე უკეთესობა ხომ არ იგეგმება ამ კუთხით?
_ მაგ მიმართულებებითაც, ჩვენ მივიღეთ გადაწყვეტილება. გვესმის, როგორი მძიმე სოციალური მდგომარეობაა ქვეყანაში, რეგიონებში, სოფლებში, როგორ უჭირს ხალხს. 25 ლარის გადახდის შემდეგ, აკეთებს აბონენტი განაცხადს და კომპანია ვალდებულია, გაზი შეუყვანოს სახლში. ზოგი სახლი ძალიან შორსაა ცენტრიდან, ზოგი _ არც ისე, ფასებიც მერყეობს აქედან გამომდინარე _ 200, 300, 400 ლარამდე და ამ თანხის ერთობლივად გადახდა რომ არ მოუწიოს აბონენტს, ეძლევა მას საშუალება, გადაიხადოს 25 ლარი და კომპანია, ვალდებულია, ვალი 2 წელზე გაუწეროს. ამით მოსახლეობას შეღავათი მივცემთ.
_ რომელი კომპანია შეასრულებს გაზიფიცირების სამუშაოებს ოზურგეთში?
_”სოკარი” და გაზის ტრანსპორტირების კომპანია.
_ როგორც ვიცით, “იტერა” და “სოკარი” შეერთდა.
_ კი, “სოკარმა იყიდა “იტერა”.
