და ოფიციალურად დამტკიცდება შტაბები, _ გვითხრა შსს-ს ყოფილმა მაღალჩინოსანმა, ამჯერად საპრეზიდენტო კანდიდატის ნინო ბურჯანაძის აქტიურმა მხარდამჭერმა გურიაში, ზურაბ ჩხაიძემ, რომელიც ” გურია ნიუსის” წყაროს ინფორმაციით, “დემოკრატიული მოძრაობა _ ერთიანი საქართველოს” შტაბს უხელმძღვანელებს გურიაში.
_ ბატონო ზურაბ, ბოლო დღეებში ვრცელდება ინფორმაცია, რომ პარტია “ქართული ოცნება _ დემოკრატიული საქართველოს” მხარდამჭერები გურიაში უერთდებიან პარტია “დემოკრატიული მოძრაობა _ ერთიანი საქართველოს”. რა კომენტარს გააკეთებთ ამასთან დაკავშირებით?
_ აქ გასაკვირი არც არაფერია. გასული წლის ოქტომბერში ჩატარებული საპარლამენტო არჩევნებისას ამომრჩეველთა განსაკუთრებით დიდმა რაოდენობამ მხარი დაუჭირა “ქართულ ოცნებას”. ახლა კი შეიმჩნევა ტენდენცია “ქართული ოცნების” მხარდამჭერთა მასიური გადმოსვლისა, ქალბატონი ნინო ბურჯანაძის მხარეზე. ერთ-ერთი მაგალითი ვარ მე, რომელიც “ოცნების” მხარდამჭერი ვიყავი. ვინც მაშინ “ოცნებას” ხმა მისცა, მათი დიდი ნაწილი დღეს გადმოსულია ქალბატონი ნინოს მხარეს და ამას არჩევნებიც დაგვანახებს ოზურგეთში, და არა მარტო ოზურგეთში.
_ რატომ მიიღეთ ეს გადაწყვეტილება?
_ აქ მიზეზების მთელი კასკადია. ერთ-ერთია გარკვეული იმედგაცრუება, არა მარტო ჩემში, არამედ საზოგადოების იმ ნაწილში, რომლებიც, როგორც ვამბობ, მასობრივად გადმოდიან ქალბატონი ნინოს მხარეს.
_ იმედგაცრუება რაში დაინახეთ?
_ათი თვე გავიდა და რეალურად, პრობლემების ძალიან მცირე რაოდენობა გადაწყდა და ისიც ნაწილობრივ. თუნდაც, სამართლიანობის კუთხით, ძალიან დაბალია სამართლდამცავთა მუშაობის დონე, მათი პროფესიონალიზმი. პრაქტიკულად, ის შედეგები არ დგება, რასაც საზოგადოება ელის. პრაქტიკულად კვლავ “ნაციონალური მოძრაობის” ლიდერები მართავენ პროცესებს ქვეყანაში, ადგილობრივი ხელისუფლება ჯერ კიდევ მათი კონტროლის ქვეშაა; მათი კონტროლის ქვეშ რჩება უზენაესი სასამართლო მთლიანად, აუდიტის სამსახური, ეროვნული ბანკი… რომელი ერთი ჩამოვთვალო? ზუსტად ეს იწვევს იმ სტაგნაციას, რაც ასახულია უკვე, თუნდაც, ეკონომიკაში. ყველა პრობლემა, დაწყებული საკადრო პოლიტიკიდან, დამთავრებული ეკონომიკური მდგომარეობით, რის გადაწყვეტასაც რომელსაც „ ოცნება” ჰპირდებოდა ამომრჩევლებს, დღესდღეობით პრაქტიკულად გადაუწყვეტელია. ერთადერთი, რაც მოგვარდა, ისაა, რომ ადამიანებს მიეცათ საშუალება, თავისუფლად გამოთქვან საკუთარი მოსაზრებები. ყოველ შემთხვევაში, ჯერჯერობით, ამ კუთხით, ხელისუფლების მხრიდან ზეწოლა არ შეიმჩნევა.
_ რა შედეგს ელოდებით გურიაში?
_ ჩვენ იმედიანად ვართ განწყობილები. მე, პირადად, მაქვს უამრავი შეხვედრა გურიის მოსახლეობასთან. გურიაში საერთოდ, ვიცნობ საზოგადოების აზრს და ვიცი, რომ ძალიან მაღალია ჩვენი პარტიის რეიტინგი როგორც გურიაში, ასევე აჭარაში და ა.შ. რამდენადაც ვფლობ ინფორმაციას, ჩვენი მხარდამჭერების რაოდენობა დღითიდღე მატულობს,
_ ვინ არიან ოზურგეთის შტაბის წვერები?
_ ოზურგეთის შტაბში არიან ქალბატონები თამარი ნადირიძე, ლელა ნაცვალაძე, ბატონები ვიქტორ გობრონიძე, ვანო ხომერიკი, ზურაბ ვაშალომიძე, აკაკი თოიძე, ლეო თოიძე, კახა კეჭაყმაძე. ასე რომ, შტაბი ძალიან საინტერესო პიროვნებებით არის დაკომპლექტებული და რაიონის მოსახლეობა თითოეულ მათგანს ძალიან კარგად იცნობს.
_ როდის დაიწყებთ აქტიურ საარჩევნო კამპანიას?
_ განსაკუთრებული აქტიურობა დაიწყება სექტემბრის პირველ რიცხვებში. მას შემდეგ, რაც შტაბი ოფიციალურად დაფუძნდება. ჩვენ ამ დროისთვის გურიაში ველოდებით ქალბატონ ნინო ბურჯანაძეს, მოხდება მასთან შეხვედრა და ამის შემდეგ აქტიურობაც უფრო საგრძნობი გახდება.
