და ჟურნალისტებს კლუბის ახალი მთავარი მწვრთნელობის კანდიდატი წარუდგინეს.
გამგებელმა, რომლის უკრაინული კონტაქტების შესახებ კარგადაა ინფორმირებული საზოგადოება, “გურიას” გასაწრთვნელად უკრაინიდან მოიწვია რომან პოკორა.
ახალი მწვრთნელი, ფაქტობრივად, დამტკიცებულია ამ თანამდებობაზე, თუმცა 21 სექტემბერს რუსთავში ჩასატარებელი თამაშისთვის გუნდს მხოლოდ დააკვირდება.
რადგან ქართველი საზოგადოებისა და ჟურნალისტებისთვის ნაკლებადაა ცნობილი პოკორას საფეხბურთო და სამწვრთნელო კარიერის შესახებ, გუნდის პრესცენტრმა მისი რეზიუმეც მოამზადა, რომლის მიხედვითაც 50 წლის უკრაინელი წვრთნიდა სხვადასხვა უკრაინულ, მოლდაურ და აზერბაიჯანულ გუნდს, აგრეთვე უკრაინის ახალგაზრდულ ნაკრებს.
როგორც პრესრელიზიდან ირკვევა, რომან პოკორას ყველაზე დიდი სამწვრთნელო მიღწევა აზერბაიჯანული კლუბის “სიმურგის” მესამე ადგილია აზერბაიჯანის პრემიერ ლიგაში, რომლის შემდეგაც გუნდმა 2009-2010 წლის ევროპის ლიგაზე ითამაშა.
ზაზა ურუშაძის თქმით , “გურიას” ყოფილი მწვრთნელი დავით მახარაძე გათავისუფლებული არ არის. მას შეუძლია გუნდში დარჩეს იგივე ანაზღაურებით და იმუშაოს სხვა თანამდებობაზე. დღეს ჩვენთვის ცნობილი გახდა, რომ მახარაძემ სრულიად შემთხვევით, ნაცნობისაგან გაიგო გათავისუფლების შესახებ, რომელმაც ეს ინფორმაცია ერთ-ერთ ვებგვერდზე წაიკითხა.
გვინდოდა ზაზა ურუშაძისგან გაგვეგო, რა პირობებით მოახერხა მან უკრაინელის დათანხმება, მაგრამ მან მოხერხებულად აიცილა ეს შეკითხვა და მხოლოდ ახალი მწვრთნელის ხელფასი გაგვიმხილა, რომელიც, თურმე, თავდაპირველად იგივე დარჩება, რასაც გუნდის ყოფილ თავკაცს უხდიდნენ, ანუ 2 000 ლარი.
ცოტა ძნელი გასაგებია რატომ დატოვა რომან პოკორამ სამშობლო და ასეთი მიზერული ანაზღაურებისთვის ლანჩხუთში გადმოიხვეწა…
ზაზა ურუშაძე კი ამტკიცებდა, რომ “გურია” ქართული ბრენდია და მთელ ყოფილ საბჭოეთში აქვს სახელი გავარდნილი, მაგრამ მხოლოდ ეს არგუმენტი პრესკონფერენციაზე მყოფი საზოგადოებისთვის მთლად დამაჯერებელი არ აღმოჩნდა.
ზაზა ურუშაძემ გუნდის სპონსორებთან დაკავშირებული კიდევ ერთი ახალი ინფორმაცია გაახმოვანა _ როგორც ირკვევა, რაიონის ხელმძღვანელები გუნდის გაყიდვასთან დაკავშირებით სამ სავარაუდო სპონსორთან აწარმოებენ მოლაპარაკებას. ამათგან ერთი რუსი, ერთი ბერძენი და ერთიც ქართველია… რომელ მათგანს დააინტერესებს “გურიას” წარსული დიდება და გრიგოლეთის სახელგანთქმული ბაზა, ამ თვის ბოლოს გახდება ცნობილი.
როგორც ირკვევა, ლანჩხუთის “გურიას” ახალი მწვრთნელი ჯერჯერობით გრიგოლეთის საფეხბურთო ბაზაზე იცხოვრებს, როგორც თავად ამბობს, გუნდთან რაც შეიძლება, ახლოს…
