პრეზიდენტობის კანდიდატი დღეს ნინოწმინდას, ახალქალაქსა და ადიგენს ესტუმრა.
გიორგი მარგველაშვილი ახალქალაქში შეკრებილ საზოგადოებას ქვეყნის პრემიერ-მინისტრმა ბიძინა ივანიშვილმა წარუდგინა. პრემიერ-მინისტრმა ადგილობრივ მოსახლეობას მთავრობის ხედვა გააცნო ეროვნულ უმცირესობასთან დაკავშირებით. ბიძინა ივანიშვილმა სიტყვით გამოსვლისას ასევე აღნიშნა, რომ რეგიონში მცხოვრებ მოსახლეობას პრობლემები აქვს ქართულ ენასთან დაკავშირებით და მთავრობა მათ ხელშეწყობაზე მუშაობს: “თქვენი მომავალი პრეზიდენტი ყველაფერს გააკეთებს, რომ ენობრივი სირთულეები გადალახოთ, ყველა თანამდებობაზე, როგორც ადგილობრივ ასევე ცენტრალურ ხელისუფლებაში ეთნიკურმა სომხებმა უფრო მეტი ადგილი უნდა დაიკავონ”
ბიძინა ივანიშვილმა ასევე აღნიშნა, რომ მთავრობამ აპირებს ხელი შეუწყოს ადგილობრივი ბიზნესის განვითარებას.
სიტყვის დასასრულს ქვეყნის პრემიერ-მინისტრმა მოსახლეობას გიორგი მარგველაშვილის მხარდაჭერისაკენ მოუწოდა:
“მე ძალიან დიდი იმედი მაქვს, რომ თქვენ არ დაიზარებთ და აუცილებლად მხარს დაუჭერთ გიორგი მარგველაშვილს. ის თქვენი ღირსეული პრეზიდენტი იქნება და დარწმუნებული ვარ აუცილებლად შეგიყვარდებათ, რადგან ის იქნება პრეზიდენტი, რომელიც იზრუნებს თქვენზე და თქვენს მომავალზე.”
ბიძინა ივანიშვილმა სიტყვა კოალიციის კანდიდატს გიორგი მარგველაშვილს გადასცა, რომელმაც თავის მხრივ მოსახლეობას კიდევ ერთხელ მოუწოდა აქტიურად მიიღონ მონაწილეობა არჩევნებში. მისი თმით ხელისუფლების პოლიტიკური კურსის და წარმატებული რეფორმების გაგრძელებისათვის აუცილებელია მოქალაქეთა თანამონაწილეობა.
“იმისათვის, რომ განვავითაროთ ჩვენი სახელმწიფო, ჩვენ გვჭირდება თქვენი დახმარება. საჭიროა თქვენი ჩართულობა ამ პროცესებში. უნდა გავერთიანდეთ კოოპერატივებში, რომლებიც მიიღებენ უდიდეს მხარდაჭერას ჩვენი ხელისუფლების მხრიდან ლიზინგების, გრანტების, კრედიტების ფორმით. ეს არის ის, რაც ჩვენ ერთად უნდა გავაკეთოთ. მაგრამ ამ ყველაფრის დაწყებისათვის საჭიროა ძალიან ორგანიზებულად და კარგად მოვემზადოთ მომავალი არჩევნებისთვის. საქართველოს თითოეულმა მოქალაქემ უნდა მიიღოს მონაწილეობა ამ პროცესში. 27 ოქტომბერს შემოხაზოს 41, რადგან ეს იქნება ჩვენი ერთიანი გამარჯვება, ჩვენი სახელმწიფოს გამარჯვება,” _ განაცხადა გიორგი მარგველაშვილმა.
კოალიცია ქართული ოცნების პრეზიდენტობის კანდიდატი ხვალ ამომრჩევლებთან შეხვედრებს თბილისში გამართავს.
(R)
