ტრეფიკინგის წინააღმდეგ აქტიური ბრძოლა საქართველოს მთავრობამ 2003 წლიდან დაიწყო − ტრეფიკინგის კრიმინალიზაცია, ტრეფიკინგის წინააღმდეგ ბრძოლის შესახებ საერთაშორისო დოკუმენტების რატიფიკაცია და მათი შიდა კანონმდებლობაში იმპლემენტაცია მოახდინა, შეიქმნა სპეციალური უწყებათაშორისი საკოორდინაციო კომისია. ტრეფიკინგის წინააღმდეგ ბრძოლის ეფექტიანობის მიზნით ხელისუფლება მჭიდროდ თანამშრომლობს საერთაშორისო და ადგილობრივ არასამთავრობო ორგანიზაციებთან.
ტრეფიკინგის წინააღმდეგ ბრძოლის უწყებათაშორის საბჭოს საქართველოს იუსტიციის მინისტრი ხელმძღვანელობს. საბჭოს სამდივნოდ განსაზღვრულია იუსტიციის სამინისტროს სტრუქტურული ქვედანაყოფი.
ადამიანით ვაჭრობის დანაშაულთან საბრძოლველად 2013 წლის დასაწყისში საბჭომ, არასამთავრობო და საერთაშორისო ორგანიზაციებთან თანამშრომლობით, შეიმუშავა ტრეფიკინგის წინააღმდეგ ბრძოლის 2013-2014 წლების ეროვნული სამოქმედო გეგმა, რომელიც ითვალისწინებს დანაშაულის პრევენციის, მსხვერპლთა დაცვისა და თანამშრომლობის ღონისძიებებს. ასევე, დანაშაულის წინააღმდეგ ეფექტიანი და პროაქტიური გამოძიებების წარმოებასა და დამნაშვეთა სისხლისსამართლებრივ პასუხისგებაში მიცემას.
სამოქმედო გეგმის პრაქტიკულმა იმპლემენტაციამ უკვე მოგვცა კონკრეტული შედეგები. ტრეფიკინგის ფაქტებზე გამოძიებებისა და სისხლისსამართლებრივი დევნის რაოდენობამ სამოქმედო გეგმის დამტკიცებიდან (2013 წლის მარტი) დღემდე გადააჭარბა გასული წლის მონაცემებს.
ტრეფიკინგის ევროპული დღის აღსანიშნავად საქართველოს იუსტიციის სამინისტრო, როგორც ტრეფიკინგის წინააღმდეგ მიმართული ღონისძიებების განმახორციელებელი უწყებათაშორისი საკოორდინაციო საბჭოს ხელმძღვანელი სამთავრობო უწყება, მიმდინარე წლის 23 ოქტომბერს გეგმავს საერთაშორისო და ადგილობრივ არასამთავრობო ორგანიზაციებთან შეხვედრას და 2013 წელს განხორციელებული საქმიანობების შესახებ ანგარიშის წარდგენას.
