ნინო ლომჯარია. არასამთავრობო ორგანიზაცია “სამართლიანი არჩევნები”
“101 ინციდენტი დავაფიქსირეთ, მაგრამ ეს არ არის ისეთი სიმძიმის შემთხევები, რომ არჩევნებზე მოახდინოს გავლენა, ან მთლიანად ეჭვქვეშ დააყენოს შედეგები. წინა არჩევნებთან მნიშვნელოვნად არის შემცირებული დარღვევები. მცირე რაოდენობის საჩივარი გვაქვს დაწერილი და ამ შემთხვევაში არცერთი უბნის შედეგების გაუქმების მოთხოვნა არ გვაქვს დაყენებული. თუმცა, არის ისეთი შემთხვევები, რაც არ უნდა ხდებოდეს საქართველოში, ეს არის არასათანადო დოკუმენტებით ხმის მიცემის ფაქტები და არასწორი პროცედურები”.
ეთნიკური უმცირესობებით დასახლებულ რეგიონებში არჩევნებს აკვირდებოდა არასამთავრობო ორგანიზაცია “მრავალეროვანი საქართველო”. ორგანიზაციის წარმომადგენლის ალექსანდრა კალატოზიშვილის თქმით, ამ რეგიონებში ყველაზე მთავარ პრობლემად ამომრჩევლის დაბალი სამოქალაქო თვითშეგნება წარმოჩინდა:
“არჩევნები ეთნიკური უმცირესობებით დასახლებულ რეგიონებში გარკვეული ხარვეზებით ჩატარდა. ჩვენს ამომრჩევლებზე იყო ზეწოლა-მუქარის ფაქტი. წინასწარ იყო ხელმოწერები გაკეთებული ამომრჩევლის სახელის და გვარის გასწვრივ. ხმის მიცემის ფარულობა დაირღვა ერთ უბანზე. ამომრჩევლის მიერ მარკირების გარეშე დაფიქსირდა ასევე ერთი ფაქტი და კომისიის წევრების მიერ საარჩევნო ყუთში ბიულეტენების ჩაყრის შემთხვევა.
ეთნიკურად დასახლებულ რეგიონებში დაფიქსირდა დაბალი აქტივობა. რაც უფრო დაბალი სამოქალაქო თვითშეგნების შედეგი უნდა იყოს. ყურადღებას გავამახვილებდი არა რაოდენობრივ, არამედ ხარისხობრივ მაჩვენებელზე. ის მონაცემები, რაც დაფიქსირდა ძალიან ახლოს არის რეალობასთან. გაცილებით მნიშვნელოვანია ის, რომ ეთნიკური უმცირესობების წარმომადგენლები აკეთებენ გააზრებულ არჩევანს და ისინი გამოცხადდნენ არჩევნებზე, რომლებსაც აქტიური მონაწილეობის მიღება სურთ ქვეყნის საზოგადოებრივ ცხოვრებაში,” _ აღნიშნა ალექსანდრა კალატოზიშვილმა.
არასამთავრობოები, მათ შორის “საერთაშორისო გამჭვირვალობა-საქართველო” და “საქართველოს ახალგაზრდა იურისტთა ასოციაცია” ცესკოს ურჩევენ კვალიფიკაციური კადრების მომზადების მიზნით თანამშრომლებს ტრენინგები ჩაუტარონ, რათა მომავალში ის დარღვევებიც ამოიფხვრას, რაც პროცედურულ გადაცდომებს ეხებოდა.
ეკა გიგაური, საერთაშორისო გამჭვირვალობა-საქართველო.
“ჯამში, დადებითად შევაფასებდი საპრეზიდენტო არჩევნებს. არჩევნების დღე თავისუფლად და დემოკრატიულად მიმდინარეობდა. იყო პროცედურული დარღვევები, მაგრამ ეს იმას მიუთითებს, რომ დამატებითი ტრენინგები არის საჭირო ცესკოს წევრებისთვის. ზოგადად, ვფიქრობთ, რომ არჩევნების შედეგებზე ეს დარღვევები გავლენას არ მოახდენს.
ჩვენი მთავარი მიღწევა ის არის, რომ ცესკო მიუკერძიებლობას ინარჩუნებდა და ის, რომ ეს უწყება გათავისუფლდა პოლიტიკური ზეწოლისგან. ახლა კი ცესკოს შემდეგი ნაბიჯი უნდა იყოს, მათი თანამშრომლების კვალიფიკაციის ამაღლებაზე ზრუნვა”.
კახა კოჟორიძე, საქართველოს ახალგაზრდა იურისტთა ასოციაცია.
“საპრეზიდენტო არჩევნებს ვაფასებთ დადებითად და მიგვაჩნია, რომ ეს მნიშვნელოვანი წინ გადადგმული ნაბიჯია ჩვენი ქვეყნის ცხოვრებაში. ესაა დამკვირვებლების საერთო პოზიცია და საერთო აზრი, რაც რასაკვირველია, მისალოცი ამბავია. ჩვენი თვითმიზანი არ იყო, მაინც და მაინც ბევრი საჩივრის დაწერა. როდესაც დარღვევის შესახებ ვაცნობებდით კომისიის წევრებს, მინდა გითხრათ, ისინი საიას შენიშვნებზე მაშინვე რეაგირებდნენ და გამოსწორებასაც ცდილობდნენ. უმნიშვნელო რამეზე, ან უსაფუძვლოდ ჩვენ აქცენტი არაფერზე გაგვიკითებია. თუ არაა დარღვევა, მტერი უნდა იყო ქვეყნისთვის, რომ ვიძახოთ ამის შესახებ”.
