თბილისში ბახტრიონის 16-ში მდებარე სახლში, რომლის მეხუთე სართულზეც ჭიკაიძეები ცხოვრობენ, დღის მეორე ნახევრიდან დაცვის მობილიზება შეინიშნება.
“უცებ გაივსო სადარბაზო დაცვით, კაცი ვერ გაივლიდა. ლექსომ უთხრა, არ მჭირდება ამდენი ხალხი და ორნი დარჩითო. ძალიან კარგი მეზობელია, ცუდს ნამდვილად ვერ ვიტყვით, მაგრამ გაგვიკვირდა, ჯერ არ დანიშნულა და უკვე ასეთი ამბავია სადარბაზოში,” _ უთხრა “გურია ნიუსს” მომავალი მინისტრის მეზობელმა.
ალექსანდრე ჭიკაიძეს მეზობლები დადებითად ახასიათებენ.
“ძალიან კონტაქტური ადამიანია, მეზობლებთან აქტიურად ურთიერთობს, ჭირია თუ ლხინი ყველგანაა, ყველას ამბავი და გასაჭირი აინტერესებს,” _ ამბობენ მეზობლები.
შეგახსენებთ, რომ დღეს შს მინისტრმა და მომავალმა პრემიერმა ირაკლი ღარიბაშვილმა თავის შემცვლელად შსს-ს თბილისის მთავარი სამმართველოს უფროსი ალექსანდრე ჭიკაიძე დაასახელა. ღარიბაშვილის თქმით, “ლექსო გაიზარდა ღირსეული პოლიციელის ოჯახში. მას ძალიან კარგი მამა ჰყავდა – ის იყო ღირსეული პოლიციელი”.
“ლექსომ ჩვენს სამინისტროში რამდენიმე წლის წინ დაიწყო მუშაობა და ყველა ეტაპი ძალიან წარმატებით გაიარა – იყო დამწყები ოპერატიული თანამშრომელი, შემდეგ კი გახდა გამომძიებელი. ამის მერე თბილისში პოლიციის ერთ-ერთი განყოფილების უფროსად გადავიდა, შემდეგ კი მე დავნიშნე კახეთის სამხარეო პოლიციის უფროსად და ბრწინვალედ გაართვა თავი დაკისრებულ მოვალეობას. მან საათივით ააწყო და გამართა სისტემა კახეთის სამმართველოში. გაზაფხულზე გადმოვიყვანე თბილისში და მძიმე მდგომარეობაში ჩაიბარა მთავარი სამმართველო. ლექსომ რამდენიმე თვეში ასევე საათივით ააწყო და გამართა თბილისის სამმართველო. ლექსომ აჩვენა რომ მას შეუძლია მართვა. ისაა ღირსეული და წარმატებული პოლიციელი და დარწმუნებული ვარ, რომ იქნება წარმატებული მინისტრი,“ _ განაცხადა ღარიბაშვილმა.
