როგორც დავით ნარმანიამ ჟურნალისტებთან საუბრისას განაცხადა, აღნიშნული მონაკვეთი 1991 წლის შემდეგ არ შეკეთებულა, ახლა მოხდა მისი სრული რეაბილიტაცია და ფუნდამენტურად გაკეთდა. 20-კილომეტრიანი გზის რეაბილიტაცია 25 მილიონი ლარი დაჯდა.
სარეაბილიტაციო სამუშაოები სახელმწიფო სამშენებლო კომპანიამ ჩაატარა, ხოლო გვირაბების რეაბილიტაცია შპს “მამისონმა” განახორციელა.
“წელს ჩვენ ადრე დავიწყეთ სამშენებლო სამუშაოები. ძირითადი სამუშაოები სახელმწიფო სამშენებლო კომპანიამ შეასრულა, ხოლო გვირაბის რეაბილიტაციასთან დაკავშირებით გვყავდა ასევე ტენდერში გამარჯვებული კომპანია. პარალელურ რეჟიმში მიმდინარეობდა როგორც გზების, ასევე გვირაბის სარეაბილიტაციო სამუშაოები. 20-კილომეტრიანი მონაკვეთი ფუნდამენტურად გაკეთდა, საკმაოდ სქელი გზის საფარი დაიგო და უფრო მედეგია ყინვასთან მიმართებაში. ამ გზის დაგება სპეციალური ტექნოლოგიით მოხდა. ამასთან, ცალკეულ მონაკვეთებში გავაფართოვეთ გზა,” _ განაცხადა დავით ნარმანიამ.
მისივე თქმით, სამუშაოები რამდენიმე დღის წინ დასრულდა. ამ გზის მნიშვნელობაზე საუბრობს ყაზბეგის მაჟორიტარი დეპუტატი მირიან წიკლაური. მისი თქმით, აღნიშნული გზის შეკეთება ამ რეგიონისთვის ძალიან მნიშვნელოვანია.
“ამ გზის გავლას სჭირდებოდა დაახლოებით ორი საათი, დღეს ოცი წუთი სრულიად საკმარისია, რომ ეს გზა გადალახო და ყაზბეგში ჩახვიდე. 1991 წლის შემდეგ ამ გზას ხელი არ შევლებია, მიუხედავად იმისა, რომ პერიოდულად თანხები იყო გამოყოფილი,” _ განაცხადა მირიან წიკლაურმა.
როგორც ენერგეტიკის მინისტრი კახი კალაძე აღნიშნავს, რეაბილიტირებული გზა უკვე თანამედროვე სტანდარტებს შეესაბამება და ეს ძალიან მნიშვნელოვანია როგორც ტრანზიტული, ასევე სავაჭრო მისიით გადაადგილებისათვის.
“ეს გზა სტრატეგიული მნიშვნელობის არის. ბოლო 10-15 წლის განმავლობაში სავალალო მდგომარეობაში იყო, ერთი წლის განმავლობაში მნიშვნელოვანი სარეაბილიტაციო სამუშაოები ჩატარდა როგორც გზის საფარის, ასევე გვირაბის. დღეს გვაქვს თანამედროვე სტანდარტების გზა. ამ გზით ბევრი ადამიანი სარგებლობს, მათ შორის ისინი, ვინც რუსეთის მიმართულებით გადაადგილდებიან,” _ განაცხადა კახი კალაძემ.
