გაუხსნელი დანაშაულობების ქრონიკა და მთავარი პოლიცმაისტერის კომენტარი: _”მდგომარეობა სტაბილურია”

საინტერესოა, რა შედეგებს და გახსნილი დანაშაულობების როგორ სტატისტიკას აჩვენებს შსს გურიის სამხარეო მთავარი სამმართველოს უფროსი.

“გურია ნიუსი” ბოლო ერთი წლის განმავლობაში მომხდარი მძიმე და გაუხსნელი დანაშაულობების შესახებ, არაერთხელ წერდა.

_ ოზურგეთში, ე. წ. “ზვანის” უბანში, ცენტრალური გზისა და კიტა მეგრელიძის ქუჩის გასასვლელში ახალგაზრდა მამაკაცი, 5 დეკემბერს, დილით, 10 -ის ნახევარზე, ჯერჯერობით დაუდგენელმა ნიღბიანმა პირებმა ცეცხლსასროლი იარაღით მძიმედ დაჭრეს და მისგან 4385 ლარი წაიღეს.

როგორც დაზარალებული ამირან სიხარულიძე “გურია ნიუსთან” აღნიშნავს, ცეცხლსასროლი იარაღიდან სამჯერ ესროლეს: “ერთი კვირის წინ, ამ გადასასვლელთან დილით, ადრე 9 საათზე მეზობლის ბიჭმა დაინახა ორი ნიღბიანი ახალგაზრდა ბიჭი იარაღით, რომელიც მის დანახვაზე გაიქცნენ. მეც ამ გზაზე დავდივარ, მაშინვე მითხრა, ასე იყოო. მე პოლიციას შევატყობინე ეს ამბავი, მაგრამ ყურადღება არ მომაქციეს, შენ ოფიციალურად რადგან არ მოგვმართე, ჩვენ რეაგირება არ გავაკეთეთო, _ მითხრეს. დანაშაული გაუხსნელია, არაფერი არ ვიცი, რა ხდება. გამომძიებელმა მითხრა, ჟურნალისტებთან ნუ დაიწყებ პოზირებასო. რამდენიმე დღე კი მიცავდა პოლიცია, მაგრამ ისე ჩაიარა ყველაფერმა, არაფერი გარკვეულა. გავარდა ხმა, რომ თითქოს მე ყაჩაღს ნიღაბი ჩამოვხსენი და ვიცანი, ვინ იყო, მაგრამ ეს ტყუილია. მაინც მეშინია ახლა, მაგრამ მგონია, სახლში მოსაკლავად არ მომაკითხავენ. ძლივს გადავრჩი სიკვდილს, ახლა ფიზიკურად უუნარო ვარ,” _ თქვა ამირან სიხარულიძემ.

_ 5 აგვისტოს, ღამის თერთმეტ საათზე, ოზურგეთის მუნიციპალიტეტში შემზარავი მკვლელობა მოხდა _ გოჩა გუჯაბიძე საკუთარ სახლთან დაუდგენელმა პირებმა ავტომატებით ჩაცხრილეს. გუჯაბიძის მამა “გურია ნიუსთან” ამბობს, რომ მის შვილს ავტომატის რამდენიმე ჯერი სახლთან გვიან ღამით დააცალეს. მიუხედავად, იმისა, რომ ვარდენ გუჯაბიძეს მკვლელებთან დაკავშირებით ვერსიები აქვს, რის შესახებაც “გურია ნიუსი” რამდენჯერმე წერდა, დანაშაული დღემდე გაუხსნელია.

_ ოზურგეთის მუნიციპალიტეტის სოფელ ლიხაურში მცხოვრებ დავით დოლიძეს 30 მარტს საკუთარ სახლში, ღამით, ყაჩაღებმა ცეცხლსასროლი იარაღით რამდენიმე მძიმე ჭრილობა მიაყენეს.

“მინდა შევხვდე ირაკლი ღარიბაშვილს _ მაინტერესებს ვარ თუ არა დაცული? რატომ უნდა მეშინოდეს სახლში ღამის გათევის, სულ შიშში როგორ ვიცხოვრო? ოჯახი მყავს, ყველა უმუშევარია, ჩემთან შემოსავლის სხვა არც ერთი წყარო არაა, თუ მე არ ვიმუშავე. როდის აღვიდგენ ჯანმრთელობას? ნახევარი კაცი დავრჩი, ღმერთმა გადამარჩინა, ორი წუთი რომ დაგვიანებოდათ ჩემი საავადმყოფოში მიყვანა, ახლა მკვდარი ვიქნებოდი. იმდენი ტყვია მაქვს მაქვს ნასროლი, 100 კაცში მხოლოდ ერთი არ გადარჩებოდა. რამდენი ათასი ლარი დამიჯდა სიკვდილს გადარჩენა, ვინ იცის! რატომ? რა დავაშავე ასეთი? ყველაზე მთავარი ისაა, რომ ჩემი მკვლელები ქუჩაში ჩვეულებრივად დადიან,” _ამბობდა “გურია ნიუსთან” დაჭრილი დავით დოლიძე. აღნიშნული საქმე დღემდე გაუხსნელია.

_ ოზურგეთის მუნიციპალიტეტის სოფელ დვაბზუში, 45 წლის ახალგაზრდა მამაკაცი 14 სექტემბერს, დილით, მეზობლებმა ქუჩაში გარდაცვლილი იპოვეს, მისი საცხოვრებელი სახლი კი დამწვარი ნახეს. გარდაცვლილი ალექსანდრე ღლონტის მეზობლები “გურია ნიუსთან” მკვლელობის ვერსიაზე საუბრობდნენ _ კიდევ ერთი გაუხსნელი დანაშაული.

რაც შეეხება ბოლო ერთი წლის განმავლობაში დაფიქსირებულ ქურდობის ფაქტებს:

_ 7 მაისს, გამთენიისას, სოფელ ოზურგეთში, სოფლის სპეციალისტის ჯაბა შუბითიძის ოჯახში ქურდობა მოხდა;

_ სოფელ ცხემლისხიდში ერთ-ერთი ოჯახიდან არყის სახდელი ქვაბი და სხვა საოჯახო ნივთები მოიპარეს;

_ სოფელ ხვარბეთში ჯორბენაძეების ოჯახიდან მოიპარეს ოქროს სხვადასხვა დასახელების ნივთები;

_ ა. წულაძის ქუჩაზე მდებარე აფთიაქ “კარიბჭის” მეორე სართულზე, ი. ხინთიბიძეს სამუშაო ოთახიდან მოპარეს 700 ლარი და პირადი ნივთები;

_ გაბრიელ ეპისკოპოსის ქუჩაზე მდებარე სტუდენტურ-ახალგაზრდული ოფისიდან მოიპარეს ოფისის კუთვნილი ველოსიპედი;

_ აპრილში დაფიქსირდა ოზურგეთის ერთ-ერთ ქუჩაზე ხანშიშესული ცოლ-ქმრის გაქურდვის ფაქტი;

_ სოფელ ძიმითში დაფიქსირდა ტელევიზორისა და სხვა საოჯახო ნივთების ქურდობის ფაქტები;

_ რამდენიმე დღის წინ, სოფელ ბახვში მაღაზია გაიქურდა, ხოლო სოფელ გურიანთაში, ცენტრალურ გზაზე ორი მაღაზია გატეხეს და გაქურდეს;

_ ქალაქ ოზურგეთის ცენტრში, ერთი თვის წინ, საღამოს 7 საათზე, ყაჩაღობა მოხდა _ ა. წულაძის ქუჩაზე #15-ში მდებარე ერთ-ერთ სუპერმარკეტში ნიღბიანები შეიჭრნენ და მაღაზიის გამყიდველი დააყაჩაღეს. როგორც გვითხრეს, დამნაშავე პოლიციამ დააკავა.

“გურია ნიუსთან” საუბარში შსს სამხარეო მთავარი სამმართველოს უფროსი გოჩა ფერსაშვილი ზემოთ აღნიშნული დანაშაულობების შესახებ აცხადებს, რომ ახალი დეტალები არ არის და გამოძიება მიმდინარეობს.

_ ახალს ვერაფერს ვერ გეტყვით _ გამოძიება მიმდინარეობს, მუშაობა მიდის. ერთი ყაჩაღობა, რომ გახსნილია ამის შესახებ იცით. არის რაღაც ქურდობა გახსნილი, მაგრამ დეტალური ინფორმაციებისთვის პრესსამსახურს უნდა მიმართოთ. ქურდობები იხსნება _ მეტი რა გითხრათ?

_ ბატონო გოჩა, ჩვენი წყაროს ინფორმაციით, რამდენიმე დღეში მინისტრთან გაქვთ შეხვედრა და თქვენ უნდა წარმოადგინოთ, თქვენს რეგიონში დანაშაულობების გახსნის პროცენტული მაჩვენებელი. როგორ ფიქრობთ, კმაყოფილი დარჩებიან თქვენს მიერ მიწოდებული სტატისტიკით?

_ ჯერ არაფერი არ ვიცი..

_ როგორ შეაფასებდით კრიმინოგენულ სიტუაციას ოზურგეთში ბოლო ერთი წლის განმავლობაში?

_ კომენტარს ვერ გავაკეთებ, მაგრამ გეტყვით, რომ წინა წლებთან შედარებით, ოზურგეთში კრიმინოგენული სიტუაცია არის სტაბილური. გადახედონ, რა ხდებოდა რამდენიმე წლის წინ და შეადარონ დღევანდელი სიტუაციას, _ გვითხრა ფერსაშვილმა.