“ჩემი მეუღლის ოჯახში დაიწვა ტექნიკა და დავინტერესდი, რა მოხდა. შემდეგ აღმოჩნდა, რომ მხოლოდ ჩვენს ოჯახში არ ყოფილა ეს ამბავი მომხდარი. ზარალი საკმაოდ დიდია, რაც მოსახლეობისგან გავიგე. უბანში ხალხმა მოიყარა თავი, საკმაო რაოდენობა იყო. პირველ რიგში “ენერგო პრო ჯორჯიას” ოზურგეთის სერვის ცენტრში დავრეკე და ვთხოვეთ, მოსულიყვნენ ადგილზე და ჩვენთვის მოესმინათ. მათ კი გვითხრეს, რომ განცხადება დაგვეწერა ამის შესახებ. შემდეგ “სემეკში“” დავრეკე ორჯერ და ვთხოვე, რამენაირად რეაგირება მოეხდინათ. ასევე გვინდოდა ტრანსფორმატორის მოხსნა და შემოწმება, მაგრამ არც ეს მოხდა. ტრანსფორმატორში მოხდა ძალიან სერიოზული პრობლემა, რომელმაც გამოიწვია მოკლე ჩართვა და გადაწვა ეს საოჯახო ტექნიკა, რაც ხალხს გააჩნდა”, _ ამბობს ჩვენთან საუბრის დროს ოზურგეთელი კახა ჩავლეშვილი.
მისივე თქმით, ამ შემთხვევაში, როდესაც მომხარებელს პრობლემა აქვს, აუცილებელია კომპანიისგან სწრაფი რეაგირება.
“სემეკში გვითხრეს, თუ განცხადებას არ შევიტანდით ქუთაისში და არ აღვწერდით ყველაფერს, ისე ვერ დაგვეხმარებოდნენ, განცხადების დაწერას და აღწერას დრო უნდა და ასევე ქუთაისში გაგზავნას. ცხელი ხაზი ხომ გაგვიგონია ყველას, ცხელ ხაზზე რეკავ მაშინ, როდესაც პრობლემაა საკმაოდ სერიოზული და ხდება სწრაფი რეაგირება. აღმოჩნდა, რომ ეს ყოფილა ძალიან შეუძლებელი, ფაქტიურად, გადაულახავი ბარიერი და ენერგო ომბუდსმენისგან გვესმის, რომ ოფიციალური განცხადების შეტანას, მოსახლეობა კი სწრაფ რეაგირებას ითხოვს. ყველაფერს რომ თავი დავანებოთ, წმინდა ადამიანური ფაქტორიდან გამომდინარე უნდა მომხდარიყო სწრაფი რეაგირება. აბსოლუტურად ადეკვატური იყო ენერგეტიკის მინისტრის რეაქცია, რაც შეიძლება სეწმეკსაც გაეკეთებინა, შეექმნა კომისია და შეესწავლა რაც მოხდა 15 იანვარს ოზურგეთში. ძალიან ცუდი მდგომარეობა იყო, ისეთი ადამიანების ტექნიკა დაზიანდა, ვისაც ფული ბოლომდე არ აქვს გადახდილი და განვადებით ჰქონდათ გამოტანილი ტელევიზორი თუ სხვა რამ. როდესაც “ენერგო პრო ჯორჯია” უსწრაფესად იღებს დანახარჯ თანხას მოსახლეობისგან, ასევე სწრაფად რატომ არ მოქმედებს, როდესაც მისი აბონენტები ზარალდებიან? რატომ არ არის სწრაფი რეაგირება? ეს ძალიან დამცინავია”, _ თქვა კახა ჩავლეშვილმა.
კიდევ ერთი დაზარალებული, ქეთევან ცეცხლაძე ელოდება ოფიციალურ პასუხს “ენერგო პრო ჯორჯიას” წარმომადგენლებისგან, მოხდება თუ არა გაფუჭებული ტექნიკის ანაზღაურება.
“პრობლემის წინაშე ვდგავართ თითქმის მთელი წელია, მაგრამ რაც სამი დღის წინ მოხდა, ამას რა ვუწოდო, აღარ ვიცი. ჩვენი გენერატორი ხან ფეთქდებოდა, ხან ითიშებოდა და ა.შ. იმ დღეს რამდენიმე ოჯახს გადაეწვა ტექნიკა, მაგალითად ტელევიზორი, მაცივარი. მოთმინებიდან გამოვედით და ამის გამო მოხდა მოსახლეობის შეკრება, მაგრამ პირველ შეკრებაზე არ მოვიდნენ, მხოლოდ ტელევიზია და ჟურნალისტები მოვიდნენ, შემდეგ ეს ყველაფერი გაჟღერდა, მოვიდნენ “ენერგო პრო ჯორჯიას” ოზურგეთის სერვისცენტრის უფროსი გია ნაკაიძე და ბათუმიდან იყვნენ კიდევ. გვითხრეს, რომ თქვენი საჩივარი გადაიხედება და გამოგვიგზავნიან ერთ კვირაში წერილს, წერილობით მოსულ პასუხს უნდა ველოდოთ ალბათ ერთი თვე, ორიო თვე და აქედან გამომდინარე, ეს არ გვაწყობს. გუშინ კიდევ იყვნენ აღწერაზე და დღეს კიდევ ველოდებით. როგორც გვითხრეს, ზარალის აღდგენას აპირებენ და ვნახოთ, რა იქნება. 13 იანვარს ისეთი აფეთქება იყო, რომ ძლივს გადავრჩით, ელემენტარული ხელსაწყოებიც არ აქვთ. თუ კი იმ დილას 15 წუთში გამოიცვალა გენერატორი, ხომ შეიძლებოდა მანამდე მომხდარიყო ეს ამბავი და არ მოხდებოდა ეს, რაც მოხდა. ეს არის ჩემთვის ეკონომიური ტრავმა, რადგან ტელევიზორი განვადებით მქონდა გამოტანილი და როგორ გადავიხდი, ახალს ყიდვის თავი არ მაქვს”, _ თქვა ქეთევან ცეცხლაძემ.
ამ ფაქტთან დაკავშირებით ენერგეტიკის მინისტრმა, კახა კალაძემ “ენერგო-პრო ჯორჯიას” წარმომადგენლებთან განცხადება გააკეთა:
“ელექტროენერგიის მოვარდნამ გამოიწვია ის, რომ რამდენიმე მოსახლეს დაუზიანდა საყოფაცხოვრებო ნივთები: ტელევიზორები, მაცივრები და არცერთი თქვენი თანამშრომელი არ მისულა ამ ადამიანებთან და არ გაუკეთებია განმარტება იმის შესახებ თუ რა გაკეთდებოდა. გამოვიდა, რომელიღაც პიარის თანამშრომელი და გააკეთა განცხადება, რომ შეიქმნებოდა კომისია. მე თქვენ გავალებთ, ბატონო ილია (უთხრა ილია ელოშვილს), რომ დღესვე დაიწყოთ მოკვლევა ამასთან დაკავშირებით და ყველა იმ ადამიანს, ვისაც ტექნიკა აქვს დაზიანებული კომპანიის მიზეზით, რადგან ამათი ბრალი იყო ეს ყველაფერი, აღუდგინოთ ტექნიკა და თუ აღდგენა არ მოხერხდა, ახალი შევუძინოთ”, _ თქვა კახა კალაძემ.
ავთო დვალიშვილი, “ენერგო პრო ჯორჯიას” საზოგადოებასთან ურთიერთობის სამსახურის უფროსი ამბობს, რომ ამ პრობლემის შესწავლა დროულად დაიწყო და აბონენტებს აუცილებლად დაეხმარებიან:
_ ეს ფაქტი როდესაც მოხდა, რეაგირება იყო ძალიან სწრაფი და ძალიან მალევე, როგორც ხდება წესით, უნდა შეიქმნას კომისია, რომ დაადგინოს ზუსტი გამომწვევი მიზეზები, აბონენტების რაოდენობა, რა დაუზიანდა სახლში და ა.შ. ყველაფერი უნდა გაიწეროს. რამდენიმე საათში შეიქმნა კომისია და დაიწყო საქმის შესწავლა. რა თქმა უნდა, საბოლოო დასკვნა დაიდება და აუნაზღაურდება ყველას, ვისაც რა ტექნიკა დაუზიანდა.
_ მოსახლეობა ამბობს, რომ ხშირად არის პრობლემები…
_ იცით, რა, პირველად მესმის, რადგან ამ მოსახლეობისგან მსგავს საკითხზე განცხადება ან საყვედური არ შემოსულა ჩვენს კომპანიაში. არაფერს გამოვრიცხავ, მაგრამ კონკრეტულად ამ საკითხზე მართლა არაფერი არ ვიცოდით.
_ დაზარალებულების თქმით, სამწუხაროდ, სწრაფი რეაგირება არ მომხდარა...
_ რეაგირება ნამდვილად დროული იყო. ვერ გეტყვით, რომ როგორც ეს პრობლემა მოხდა, ორ წუთში მივიდნენ ჩვენი წარმომადგენლები, მაგრამ გონებრივ ვადაში მივიდნენ “ენერგო პრო ჯორჯიას” წარმომადგენლები.
