“გურია ნიუსის” სტატიას გუბერნატორი გამოეხმაურა

ე. წ. “ჩოხატაურის სპორტკომპლექსში” მცხოვრებ შვიდ ოჯახს გუბერნატორმა პროდუქტები და სხვადასხვა სახის საჩუქრები გადასცა. ერთ-ერთ რესპონდენტს  _ 10 წლის ბიჭს კი ნატვრა აუხდა. კეთილმა ადამიანმა, რომელმაც ვინაობა არ გაახმაურა, ტელევიზორი გაუგზავნა. გუბერნატორმა კი სხვა საჩუქრებთან ერთად დივიდი და მულტფილმების დისკები მიუტანა. ამ ოჯახს, ჩოხატაურის გამგებლისგან, თამაზ ჯინჭრაძისგან სატელიტური ანტენაც გადაეცა.

ტელევიზორი, სხვა საჩუქრებთან ერთად ყარაჯაშვილების ოჯახსაც ერგო. ლუიზა ყარაჯაშვილს კი, რომელსაც ოპერაცია ესაჭიროება და მისი თქმით, დაზღვევა სრულად არ უფინანსებს, გიორგი ჩხაიძემ დახმარება აღუთქვა.

 _ ეს, რაც ვნახე, საშინელებაა. წარმოუდგენელია ამ პირობებში ადამიანების ცხოვრება. სახელმწიფო, შესაძლებლობების ფარგლებში, ყველანაირად დაეხმარება ამ ოჯახებს, _ აღნიშნა გუბერნატორმა და შვიდივე ოჯახს დროებით ქირით გადასვლა შესთავაზა:

_ გთავაზობთ, რომ გადახვიდეთ ქირით. სახელმწიფო გადაიხდის ქირას მანამ, სანამ არ მოხდება თქვენთვის ბინების შეძენა. სამწუხაროდ, უსახლკარო ოჯახების რიცხვი, გურიაში, 400-ს აღწევს. ჩვენ ამასთან დაკავშირებით გვაქვს ჩამოყალიბებული პოზიცია _ ეტაპობრივად უნდა მოხდეს ყველა ოჯახის დაკმაყოფილება. ბიუჯეტს ამ ეტაპზე არა აქვს საშუალება, ყველა ოჯახი დააკმაყოფილოს, ამიტომაც მიმდინარეობს მუშაობა საერთაშორისო ორგანიზაციებთან, _ აღნიშნა გუბერნატორმა.

გიორგი ჩხაიძის ამ წინადადებას მხოლოდ ორი ოჯახი არ დაეთანხმა. ისინი შენობის გადახურვას და ფართის დაკანონებას ითხოვენ:

_ შენობის გადახურვას დიდი თანხა დასჭირდება. ამ თანხით სრულიად შესაძლებელი იქნება, თქვენთვის სახლების შეძენა. მე გთავზობთ, ხვალიდანვე გადახვიდეთ ქირით. სახელმწიფო აიღებს ქირის გადახდაზე პასუხისმგებლობას, ეს გაფორდება იურიდიულად და მაქსიმალურად ვეცდებით, უმოკლეს დროში შეგიძინოთ სახლები, _ აღნიშნა მხარის პირველმა პირმა.

_ ასეთი შემოთავაზება ამ დრომდე არ ყოფილა და ეს მისასალმებელია. ამ პირობებში წარმოუდგენელია ბავშვების გაზრდა, ცხოვრება. ყველას უნდა საკუთარი ჭერი და ეზო ჰქონდეს. თუმცა, ამ ეტაპისთვის ეს ძალიან კარგია და მადლობა თქვენ ამისთვის, _ აღნიშნა ლუიზა ყარაჯაშვილმა.

ნარგიზა ჩხაიძის თქმით, ეს შემოთავაზება მისთვის მისაღებია:

_ ყოველ ღამით იმ შიშით ვწვები, რომ ჭერი არ ჩამოინგრეს და ბავშვებს არაფერი დაუშავდეს. მადლობის მეტი რა მეთქმის. მადლობა თქვენს რედაქციას, რომ ჩვენი პრობლემით დაინტერსდით და იმ ადამიანებამდე მიიტანეთ, რომლებსაც ჩვენი პრობლემის მოგვარება შეუძლიათ. მადლობა გურიის გუბერნატორს, ჩემი შვილის ოცნების ასრულებისთვის და იმისთვის, რომ მექნება ჭერი, საიდანაც წყალი არ ჩამოვა, _ გვითხრა ნარგიზა ჩხაიძემ.

ავარიულ კომპლექსში მცხოვრებმა ადამიანებმა ისიც აღნიშნეს, რომ დაპირებები მათი საცხოვრებლით უზრუნველყოფის შესახებ დიდი ხანია, ესმით, თუმცა, 22 წელია, შედეგი არ ჩანს. ამის შესაბამისია, რომ მათ ხელისუფლების დაპირების არ სჯერათ:

_ მესმის თქვენი. წინა წლებში სახელმწიფოს არ ჰქონდა ამაზე ჩამოყალიბებული პოზიცია. 22 წლის განმავლობაში შეიძლებოდა ამის მოგვარება. თითო წელს ათი ოჯახი რომ დამაყოფილებულიყო, დღეს უსახლკაროების რიცხვი ბევრად დაბალი იქნებოდა, თუმცა, ასე არ მოხდა. რაც შეეხება დღევანდელს _ არა აქვს მნიშვნელობა მე ვიქნები გუბერნატორი თუ სხვა. სახელმწიფო იღებს ვალდებულებას, რომ თქვენი ბინის ქირა გადაიხადოს მანამ, სანამ არ მოხდება თქვენი სახლებით უზრუნველყოფა. ეტაპობრივად ყველა უსახლკარო ოჯახს ექნება საკუთარი ჭერი, _ აღნიშნა გუბერნატორმა.