“გურია ნიუსის” მიერ ოფიციალურად გამოთხოვილ დოკუმენტაციებში ნათლად ჩანს, როგორ ინიშნებიან ადამიანები თანამდებობაზე.
მაგალითად, გამგებლის მოვალეობის შემსრულებლის სახელზე დაწერილ განცხადებაში დავით შეიზაშვილი წერს:
_ “ვარ პარტია “ქართული ოცნება-დემოკრატიული საქართველოს” წევრი და აქტიური მხარდამჭერი. ვინაიდან აქტიურად ვიყავი ჩართული ყოფილი მმართველი გუნდის მიმართ ოპოზიციურ საქმიანობაში. არასოდეს მიმუშავია სახელმწიფო სამსახურში. გთხოვთ, გაითვალისწინოთ ჩემი შესაძლებლობა, დამსახურება და დამასაქმოთ”.
აღნიშნული განცხადების საფუძველზე, შეიზაშვილი ლანჩხუთის მუნიციპალიტეტის გამგეობის ინფრასტრუქტურისა და არქიტექტურის სამსახურის საპროექტო განყოფილების მთავარ სპეციალისტად დაინიშნა.
შეიზაშვილის პირად საქმეში მხოლოდ ცნობა დევს იმის დასტურად, რომ 1983-84 წლებში სკოლა ნამდვილად დაამთავრა და ატესტატი მიიღო.
ზაალ სანაძე ლანჩხუთის მუნიციპალიტეტის გამგეობის შიდა აუდიტის სამსახურის ზედამხედველობის განყოფილების უფროსის მოვალეობის შემსრულებელია და მისი ხელფასი 500 ლარია.
განცხადებაში, რომლის საფუძველზეც ის აღნიშნულ თანამდებობაზე დაინიშნა, ვკითხულობთ:
_ ვარ პარტია “ქართული ოცნება-დემოკრატიული საქართველოს” წევრი და აქტიური მხარდამჭერი. მაქვს საკმაო გამოცდილება საარჩევნო და პარტიულ საქმიანობაში. ასევე, კარგად ვიცნობ ქალაქ ლანჩხუთის მოსახლეობას და ვიცი მათი პრობლემატიკაც. გთხოვთ, გაითვალისწინოთ და დამასაქმოთ”.
წარმოდგენილი დოკუმენტაციის თანახმად, ლანჩხუთის მუნიციპალიტეტის გამგეობის სპორტისა და ახალგაზრდობის საქმეთა სამსახურის სპორტის განყოფილების უფროსის მოვალეობის შემსრულებელი, კახაბერ გუჯაბიძე ისეა დანიშნული, რომ დასაქმების თხოვნით განცხადებაც კი არ დაუწერია. გუჯაბიძის ხელფასი 500 ლარს შეადგენს.
_ “ვარ პარტია “ქართული ოცნება-დემოკრატიული საქართველოს” წევრი და აქტიური მხარდამჭერი დაარსების დღიდანვე. წინასაარჩევნო პერიოდში ვიყავი სოფელ ლესის მთავარი კოორდინატორი, პარტიის შტაბის უფროსი და არჩევნებზე კაპიტანი საარჩევნო უბანზე. მოგეხსენებათ თუ რა დევნის და წნეხის ქვეშ იქნებოდა ჩემი ოჯახი აღნიშნულის გამო. ვარ დროებით უმუშევარი. სოფელი პატივს მცემს და ჯერა ჩემი. გთხოვთ, დამასაქმოთ და გაითვალისწინოთ ჩემი შესაძლებლობა, _ ვკითხულობთ სოფელ ლესის მცხოვრები დავით ლომაძის განცხადებაში.
აღნიშნული განცხადება 2013 წლის 13 თებერვალს არის დაწერილი. ლანჩხუთის გამგებლის მოვალეობის შემსრულებელს, ზაზა ურუშაძეს ლომაძის ლესის ტერიტორიული ორგანოს რწმუნებულის მოვალეობის შემსრულებლად დანიშვნის ბრძანება კი 21 თებერვალს აქვს ხელმოწერილი. ლომაძის ხელფასი 700 ლარს შეადგენს.
სოფელ ნინოშვილის მცხოვრები, გვანცა ჩხარტიშვილის განცხადება მუნიციპალიტეტის გამგეობის ადმინისტრაციულ სამსახურს 28 თებერვალს აქვს გატარებული. იმავე დღეს არის დაწერილი ზაზა ურუშაძის ბრძანება, რომლის თანახმადაც, ჩხარტიშვილი ნინოშვილის ტერიტორიული ორგანოს რწმუნებულის მოვალეობის შემსრულებლად დაინიშნა.
_ მოგახსენებთ, რომ ვარ ამავე სოფლის მკვიდრი, უმაღლესი განათლებით, კერძოდ, სამართალმცოდნე, ამჟამად ვარ უმუშევარი. გთხოვთ, მომცეთ შესაძლებლობა, პატიოსნად და თავდადებით ვემსახურო სოფელს, რომლის ჭირ-ვარამი ჩემთვის ძალიან კარგად არის ცნობილი და დამნიშნოთ სოფლის რწმუნებულად, _ ეს განცხადება აღმოჩნდა საკმარისი ჩხარტიშვილის დასასაქმებლად.
განცხადებას ცნობა და ბრძანების ამონაწერი ახლავს. გურამ თავართქილაძის სასწავლო უნივერსიტეტის მიერ გაცემულ ცნობაში აღნიშნულია, რომ გვანცა ჩხარტიშვილი 2012 წლის 29 თებერვალს მობილობის წესით ჩაირიცხა გურამ თავართქილაძის სასწავლო უნივერსიტეტის სამართლის ფაკულტეტზე. ხოლო 2013 წლის 12 თებერვლის ბრძანებით (ფინანსური დავალიანება) სტუდენტის სტატუსი სწავლების მეოთხე წელს შეუჩერდა. ბრძანების ამონაწერი კი თბილისის დავით აღმაშენებლის სახელობის უნივერსიტეტის მიერაა გაცემული. ამონაწერში აღნიშნულია, რომ ჩხარტიშვილს სტუდენტის სტატუსი სწავლების მეოთხე წელზე შეუჩერდა,
“ვარ სამი შვილის დედა, ამჟამად უმუშევარი, გთხოვთ, შესაბამისად დამასაქმოდ”, _ წერია სოფელ ლესის მცხოვრები თეა დარჩიას განცხადებაში.
ამ განცხადების საფუძველზე, დარჩია ლესის ტერიტორიული ორგანოს სპეციალისტად დანიშნეს.
“გთხოვთ, განიხილოთ ჩემი კანდიდატურა ქ. ლანჩხუთში გამგებლის რწმუნებულის კანდიდატურაზე”, _ წერს ზაზა ურუშაძეს ვლადიმერ ნანაძე.
ურუშაძეს განცხადება განუხილავს და რამდენიმედღიანი ფიქრის შემდეგ ნანაძე მოთხოვნილ თანამდებობაზე დაუნიშნავს. ნანაძის თვიური ანაზღაურება 700 ლარია.
“მაქვს შესაბამისი განათლება და სურვილი, ჩემი სოფლის საკეთილდღეოდ გავხდე ს. შუხუთის რწმუნებული. გთხოვთ, გამითვალისწინოთ და დამასაქმოთ”, _ წერს გიორგი იმნაიშვილი გამგებლის მოვალეობის შემსრულებელს. იმნაიშვილის თხოვნა ზაზა ურუშაძემ განცხადების შეტანის დღესვე გაითვალისწინა (13.03,.2013) და სოფელ შუხუთის რწმუნებულად დანიშნა.
ლანჩხუთში მცხოვრები ირმა ჭკუასელი მხოლოდ სამი წინადადებით შემოიფარგლა განცხადების დაწერისას _ “გთხოვთ, დამეხმაროთ დასაქმებაში”.
ურუშაძეც დაეხმარა და ჭკუასელი ლანჩხუთის მუნიციპალიტეტის გამგეობის სამხედრო აღრიცხვის, გაწვევისა და მობილიზაციის სამსახურის რეზერვისტთა აღრიცხვის, გაწვევისა და მობილიზაციის განყოფილების წამყვან სპეციალისტად დანიშნა და ხელფასის სახით 370 ლარი განესაზღვრა.
აღსანიშნავია, რომ ბოლო ერთი წლის განმავლობაში დაწერილი განცხადებები, ზემოთ აღნიშნულის იდენტურია. ადამიანები, სასურველ თანამდებობას პირდაპირ ითხოვენ და გამგეობის მოვალეობის შემსრულებელიც თხოვნებს ასრულებს.
