20-დან 30 აგვისტომდე, სამეგრელოში, "კაზანტიპის" ფესტივალი ცოტაოდენი ცვლილებებითა და ახალი სახელწოდებით – "გამარჯობა პროჯექთ" ჩატარდება.
ღონისძიება ტურიზმის ეროვნული ადმინისტრაციის მხარდაჭერით ანაკლიაში გაიმართება, რომლის ფარგლებშიც 100-მადე საერთაშორისო დიჯეი და შემსრულებელი ჩამოვა. გარდა ელექტონული მუსიკისა, დამსწრეებს სპორტული აქტივობების ნახვის შესაძლებლობაც ექნებათ.
აღნიშნულ პერიოდში ანაკლიაში დაახლოებით 150 ათასამდე ტურისტს ელოდებიან.
როგორც "კაზანტიპის" პრეზიდენტმა და პროექტ "გამარჯობა პროჯექთის" ინიციატორმა ნიკიტა მარშუნოკმა "რეზონანსს" განუცხადა, ანაკლია თვე-ნახევარში მსოფლიოში ერთ-ერთ მასშტაბურ ფესტივალს უმასპინძლებს.
"პროექტის პერიოდში შავი ზღვისპირა კურორტი 150 ათასამდე სტუმარს ელოდება. ფესტივალზე დასასწრები ვიზის შეძენა მსურველებს "კაზანტიპის" ოფიციალურ ვებ-გვერდზე 203 დოლარად შეუძლიათ. თუმცა არიან ისეთებიც, ვისაც გაუმართლათ და ფესტივალზე დასწრებას უფასოდ შეძლებენ.
გადავწყვიტეთ ქართველ გოგონებისთვის დასასწრები ვიზები საჩუქრად გაგვეკეთებინა, ამიტომ მათთვის დასწრება უფასოა. მსურველები ჩვენს ოფიციალურ ვებ-გვერდზე უნდა შემოვიდნენ და რეგისტრაცია გაიარონ, პასუხს კი ელექტრონული ფოსტის მეშვეობით მიიღებენ. ანაკლიას ასეთი ფესტივალის ჩატარებისთვის უდიდესი პოტენციალი აქვს", _ ამბობს ნიკიტა მარშუნოკი.
