არჩევნების დღემ მნიშვნელოვანი დარღვევების გარეშე ჩაიარა, – ასე აფასებს "საერთაშორისო გამჭვირვალობა – საქართველო" ადგილობრივი თვითმმართველობის არჩევნების მეორე ტურს "კენჭისყრის დღემ მშვიდ გარემოში ჩაიარა. დამკვირვებლებს საარჩევნო უბნებზე სერიოზული დარღვევები არ დაუფიქსირებიათ.
"ჩვენი ინფორმაციით, საარჩევნო უბნები უზრუნველყოფილი იყო საარჩევნო დოკუმენტაციით. არჩევნების პირველი ტურისგან განსხვავებით, არ დაფიქსირებულა ბიულეტენების გატაცების ფაქტი. მთელი დღის განმავლობაში ორგანიზაციის დამკვირვებლები, ასევე ამოწმებდნენ იმ ინციდენტებს, რომლებიც მედიისა და პოლიტიკური პარტიების საშუალებით ვრცელდებოდა.
დაფიქსირდა დაპირისპირების რამდენიმე შემთხვევა, რომლებიც, ძირითადად, უბნის გარეთ პოლიტიკური პარტიების აქტივისტებსა და მხარდამჭერებს შორის ძალადობრივ ქმედებაში გამოიხატა", – აცხადებენ ორგანიზაციაში.
ამასთან, "საერთაშორისო გამჭვირვალობა" რამდენიმე პრობლემაზე ამახვილებს ყურადღებას, რასაც ორგანიზაციის შეფასებით, ტენდენციის სახე ჰქონდა.
"კერძოდ, ეს იყო პოლიტიკური პარტიების კოორდინატორებისა და აქტივისტების მობილიზება საარჩევნო უბნის გარეთ – კენჭისყრის მიმდინარეობისას. ორგანიზაციის ცნობით, პოლიტიკური პარტიების კოორდინატორები და აქტივისტები, ისევე როგორც წინა არჩევნებზე, ახლაც უბანზე მისულ ამომრჩეველს აღნუსხავდნენ.
"საერთაშორისო გამჭვირვალობა" განმარტავს, რომ აღნიშნული ქმედება კანონის დარღვევას არ წარმოადგენს, თუმცა, მისივე განცხადებით, ზოგიერთ შემთხვევაში სხვადასხვა პარტიის მხარდამჭერებს შორის დაპირისპირებას იწვევს და ამომრჩეველზე არაპირდაპირი გავლენის საშუალებადაც შეიძლება შეფასდეს.
ასევე ადგილი ჰქონდა დაპირისპირებას სააჩევნო უბნის გარეთ. მაგალითისთვის, ნაძალადევის ოლქის #8, #9 და #10 უბნებიდან, რომლებიც ერთსა და იმავე შენობაში მდებარეობს, "საზოგადოებრივი ინიციატივის" დამკვირვებელი გააძევეს.
გაძევების შემდეგ საარჩევნო უბნის გარეთ მას და რამდენიმე პირს შორის ფიზიკური დაპირისპირება მოხდა. ასევე ვრცელდებოდა მსგავსი ინფორმაცია ხონის ოლქის #1, კრწანისის ოლქის #24, #25, #26, რუსთავის ოლქის #79-ე და სხვა უბნებზე.
გარდა ამისა, კრწანისის ოლქის #10 უბნის გარეთ დაკავებული იქნა საუბნო საარჩევნო კომისიაში "ერთიანი ნაციონალური მოძრაობის" წარმომადგენლის მეუღლე, რომელიც ცოტა ხნის შემდეგ გაათავისუფლეს. პარტია ოჯახის წევრებზე ზეწოლაზე საუბრობს.
ვარკეთილის ოლქის #2 უბანზე სადამკვირვებლო ორგანიზაციის "მწვანე დედამიწის" წარმომადგენელი ირმა ბერაძე სამაგიდო სიიდან უბანზე მისული ამომრჩევლების პერსონალურ მონაცემებს ინიშნავდა, რაც "პერსონალური მონაცმების დაცვის შესახებ" კანონის დარღვევას წარმოადგენს.
"საერთო ჯამში, ვფიქრობთ, რომ არჩევნების დღემ მნიშვნელოვანი დარღვევების გარეშე ჩაიარა. იმედი გვაქვს, საარჩევნო ადმინისტრაცია უზრუნველყოფს ხმის დათვლის პროცესის კანონის შესაბამისად წარმართვას და აღარ იქნება ოქმებში ბალანსთან დაკავშირებული პრობლემები", – აცხადებს "საერთაშორისო გამჭვირვალობა – საქართველო".
