"ჩემს საქმეზე მივდივარ, არ მცალია", " მე პასუხისმგებელი არ ვარ" , " პირად საქმეზე ვარ, სხვას დავავალე და მოგიმზადებენ" , "ჩემთვის არავის არაფერი დაუვალებია" წერილი მამუკა ქილიფთარს დაევალა, რომელიც თბილისშია" _ ეს სიტყვები ოზურგეთის მუნიციპალიტეტის გამგეობის პრესსამსახურის უფროსს ნინო სალუქვაძესა და სპეციალისტს ნია მეგრელიშვილს, ასევე ოზურგეთის მუნიციპალიტეტის საკრებულოს იურისტებს ლაშა თავაძესა და გიორგი ხუროშვილს ეკუთვნით.
დღეს დილიდან "გურია ნიუსი" საჯარო ინფორმაციაზე პასუხის გაცემას ოზურგეთის მუნიციპალიტეტის გამგეობაში ამაოდ ელოდება.
"გურია ნიუსის" წყაროს ინფორმაციით, ოზურგეთის მუნიციპალიტეტის გამგეობაში რამდენიმე დღის წინ პრემიები დაარიგეს. საშტატო თანამშრომლებს ორი თვის კომპენსაცია მისცეს, ხოლო ხელშეკრულებით აყვანილ თანამშრომლებს, რომლებზეც უფლება არ ჰქონდათ კომპენსაციის მიღების, მათ პრემიები დაურიგდათ. პრემიები გამგეობას ივნისის თვეშიც გაუცია, ისიც თანამშრომლების ნაწილზე, ასევე მიიღეს ფულადი დანამატები.
"გვაინტერესებს, რა კრიტერიუმით არჩევენ თანამშრომლებს, რომლებსაც პრემიები დაურიგეს?" _გვითხრეს განაწყენებულმა თანამშრომლებმა.
მათი თქმით, პრემიების გაცემა მეტად გასაიდუმლოებულად მოხდა.
ფაქტი სახეზეა, ინფორმაცია "გურია ნიუსს" არც გამგეობაში საჯარო ინფორმაციაზე პასუხისმგებელმა პირმა მოგვცა და არც საკრებულოს იურისტებმა.
არასამთავრობო ორგანიზაციის იურისტები აღნიშნულ ფაქტს კანონდარღვევად მიიჩნევენ და სამართალდამცავ ორგანოებს ამ საკითხით დაინტერესებას სთხოვენ.
"გთხოვთ მოგვაწოდოთ ინფორმაცია გამგეობის თანამშრომლებზე გაცემული პრემიების შესახებ"_ გამგეობის საჯარო ინფორმაციაზე პასუხისმგებელმა პირმა და პრესსამსახურის უფროსმა ნინო სალუქვაძემ ჯერ დაგვპირდა, რომ ინფორმაციას მოგვაწოდებდა. რამდენიმე საათის ლოდინის შემდეგ კი თავხედურად გვიპასუხა: "ჩემს საქმეზე მივდივარ" და არ მცალიაო. პრესსამსახურის თანამშრომელმა ნია მეგრელიშვილმა კი განგვიმარტა ისეთივე ტონით: _მე არ მევალება ეგ საქმე, პასუხისმგებელი პირი ნინო სალუქვაძეაო.
შესაბამისად, მუნიციპალიტეტის გამგეობამ აღნიშნული ინფორმაცია შეგნებულად დაგვიმალა. პრემიების დარიგებასთან დაკავშირებით კომენტარი ვთხოვეთ საკრებულოს თავმჯდომარეს ავთანდილ სურგულაძეს, რომელმაც ინფორმაცია დაგვიდასტურა, დაკონკრეტებისგან კი თავი შეიკავა.
ავთანდილ სურგულაძე: კი, ბატონო, პრემიები დარიგდა, გარკვეულ თანამშრომლებზე ვინც თავი გამოიჩინა სტიქიის დროს.
_ბატონო ავთანდილ, ჩვენ გვაქვს ინფორმაცია, რომ პრემიები მიიღეს გამგეობის პრესსამსახურის თანამშრომლებმა ნინო სალუქვაძემ და ნია მეგრელიშვილმა, ასევე იმ თანამშრომლებმა, რომლებთანაც სტიქია არაფერ შუაში არაა, ეს ეხება კანცელარიას, ადმინისტრაციის ნაწილ თანამშრომლებს..
_გამოითხოვეთ საჯარო ინფორმაცია.
_თქვენ რა კომენტარს გააკეთებდით ბატონო ავთანდილ?
_იმ თანამშრომლებმა, რომლებმაც თავი გამოიჩინეს საქმიანობით პრემიები დაურიგდათ. მათ არაორდინალურ სიტუაციაში უხდებოდათ სამუშაოს შესრულება, აქედან გამომდინარე ვისზეც ჩათვალა გამგეობამ საჭირო, წერილი გამოგვიგზავნა და გავეცით პრემია.
ამის შემდეგ მივმართეთ ოფიციალურად საკრებულოს.
საკრებულოს იურისტმა ლაშა თავაძემ, რომელიც ამჟამად ოზურგეთის მუნიციპალიტეტის გამგეობაში ინიშნება იურიდიული სამსახურის უფროსად, ჯერ დაგვპირდა რომ ინფორმაციას მოგვცემდა, შემდეგ აღმოჩნდა, რომ ტყუილი თქვა დროის გაყვანის მიზნით.
რამდენიმე საათის ლოდინის შემდეგ მივმართეთ ლაშა თავაძეს, რომელიც სამსახურში არ იმყოფებოდა, მისი თქმით პირად საქმეზე იყო გასული და მის თანამშრომელს გიორგი ხუროშვილს დაავალა, ჩვენთვის წერილი მოემზადებინა.
გიორგი ხუროშვილმა ასევე შეგნებულად, წერილი არ მოამზადა. ის ქალაქ ოზურგეთის მერიაში იურიდიული სამსახურის უფროსად ინიშნება.
ლაშა თავაძე და გიორგი ხუროშვილი რამდენიმე წელია რაც მუნიციპალიტეტის საკრებულოში იურისტებად მუშაობენ. ხოროშვილმა "გურია ნიუსს" განუცხადა, რომ მისთვის წერილის მომზადება არავის დაუვალებია. წერილი მოსამზადებლად მამუკა ქილიფთარს დაეწერა, რომელიც თბილისშია"_ გვითხრა ხუროშვილმა.
ამის შემდეგ ისევ ვუკავშირდებით ლაშა თავაძეს და ჩვენს მიერ გამოთხოვილ საჯარო ინფორმაციაზე პასუხის გაცემას ვთხოვთ.
რამდენიმე საათის ლოდინის შემდეგ საკრებულოს იურისტმა, ოფიციალურად ასეთი პასუხი გაგვცა:
"თქვენი 2014 წლის 1 აგვისტოს განცხადების პასუხად გაცნობებთ, რომ ოზურგეთის მუნიციპალიტეტის საკრებულოში ამჟამად მიმდინარეობს ლიკვიდაციის პროცესი, სადაც მუნიციპალიტეტის საკრებულოს (თანამდებობის პირის) მიერ მიღებული გამოცემული სამართლებრივი აქტები დაარქივებულია და გადატანილია საამისოდ გამოყოფილ ოთახში. გამომდინარე აქედან, თქვენი მოთხოვნა საჯარო მოსამსახურეებზე პრემიების, დანამატების და კომპენსაციების გაცემის რაოდენობებს დაუყონებლივ ვერ გავცემთ. მასალები დასამუშავებელია".
ჩვენს მიერ გადამოწმებული ინფორმაციით, კი აღნიშნული ინფორმაციები კომპეტენტური პირების ოთახებში, კომპიუტერებში ინახება.
აღნიშნულ ფაქტთან დაკავშირებით კი "გურია ნიუსთან" კომენტარს აკეთებს იურისტი ლევან ალაფიშვილი:
_ ზოგადი ადმინისტრაციული კოდექსი ადგენს, რომ იმ შემთხვევაში თუ კი ინფორმაციის სისტემატიზაცია და დამუშავებაა საჭირო, ან ტერიტორიულად მოცილებულია შესაბამისი ორგანო ან დაწესებულება, ან მოითხოვს ტექნიკურ სისტემატიზაციურ სამუშაოებს, მხოლოდ ამ შემთხვევაში შეუძლია საჯარო დაწესებულებას გადაავადოს მაქსიმუმ ათი დღით ინფორმაციის გაცემა, ისიც დაუყონებლივ უნდა განმარტოს მიზეზები ამისა. თქვენს მიერ დასახელებულ შემთხვევაში კონპენსაციისა და პრემიების შესახებ ინფორმაცია ძალიან მარტივია, ელექტრონულად იქვე შეიძლებოდა მოძიებული ყოფილიყო, რადგან ტერიტორიულად მოშორებული არ არის, საფინანსო ორგანო იმავე შენობაშია და ამასთანავე რაიმე დამატებითი სისტემატიზაცია, დავუშვათ დოკუმენტაციის მოძიება და ამდაგვარი საჭირო არ არის. რაც გვაფიქრებინებს, რომ რეალურად ინფორმაცია, რომელიც არის საჯარო და დაუყონებლივ გასაცემი, დამალეს, ეს არის კანონდარღვევა. მათ არ გასცეს საჯარო ინფორმაცია, უფრო სწორად საჯარო ინფორმაცია კანონდარღვევით არ გაიცა. ასევე ანალოგიური საკრებულოსაც. ყველა უწყებამ დაუყონებლივ უნდა გასცეს.
_ბატონო ლევან, მათ გვითხრეს, რომ ეს ინფორმაცია არქივში აქვთ უკვე ჩაბარებული..
_რას ამბობთ. არ დაიჯეროთ, რას ლაპარაკობთ, 21 -საუკუნეა, ამ ამბავს 5 -6 წლის ბავშვიც აღარ დაიჯერებს, იმიტომ, რომ საბანკო გადარიცხვების ნახვა ელექტრონულად შეიძლება. ეს აუცილებლად კომპიუტერში გამგეობას, საფინანსო-სამსახურს ექნებოდა, მათ ხელი მიუწვდებათ ინფორმაციებზე. ასე რომ მაქსიმუმ ნახევარი საათის განმავლობაში თქვენთვის ეს ინფორმაცია უნდა მოეცათ.
_როგორ შეაფასებდით პრემიებისა და კომპენსაციების გაცემის ფაქტს?
_ ეს არის სამართლებრივი კანონდარღვევა, ფაქტი სახეზეა, უდიერი და თავხედური დამოკიდებულება გადასახადის გადამხდელთა ფულის მიმართ – ვინც ასე მოექცა ბიუჯეტის ფულს! იმიტომ, რომ ხელფასი, პრემია და ა.შ. არის შესრულებული სამუშაოს და წახალისების ფორმა და არა ვიღაცის გაჩერების ფორმა, ანუ თანამშრომლებს მისცეს პრემია და ხელფასები არაფრისთვის. ანუ რა გასცეს, როგორ გასცეს? ეს საკითხი, რომ სამართალდამცავი ორგანოების მიერ მოძიებისა და მსჯელობის საგანი რომ გახდეს, ძალიან ბევრ კითხვაზე მოუწევთ პასუხის გაცემა იმ პირებს რომლებმაც ეს გადაწყვეტილება მიიღეს. ჩემი აზრით, აღნიშნული ფაქტით საგამოძიებო ორგანოები დაუყონებლივ უნდა დაინტერესდნენ.
