ოზურგეთის მუნიციპალიტეტის თემების ა.(ა)ი პ. დასუფთავების სამსახურს შალვა კონჯარია უხელმძღვანელებს.
შალვა კონჯარია ოზურგეთის მუნიციპალიტეტის სოფელ შემოქმედიდანაა. რამდენიმე წლის წლის წინ იყო სოფელ შემოქმედის გამგებელი, ოზურგეთის გამგეობის სოციალური სამსახურის უფროსი, წყალკანალის ყოფილი ხელმძღვანელი და ბოლოს სოფელ მერიაში ფერმერთა მომსახურების ცენტრის დირექტორად მუშაობდა.
აღნიშნული ცენტრი, ოზურგეთის მუნიციპალიტეტის სოფელ მერიაში 2012 წლის 11 ივნისს მიხეილ სააკაშვილმა გახსნა, რომლის უფროსიც შალვა კონჯარია იყო.
შალვა კონჯარია გურიის ყოფილი გუბერნატორის ვალერი ჩიტაიშვილის უახლოესი მეგობარი და მისი ნდობით აღჭურვილი პირი იყო.
ოზურგეთის მუნიციპალიტეტის თემების ა.(ა)ი პ. ბაღების გაერთიანებას ავთანდილ მექვაბიშვილი ჩაიბარებს, რომელიც ოზურგეთის მუნიციპალიტეტის საკრებულოს ყოფილი თავმჯდომარეების ალეკო მამეშვილისა და ავთანდილ სურგულაძის მოადგილე იყო. მანამდე კი, წლების წინ სოფელ ჯუმათის გამგებელი, სამხედრო აღრიცხვის, გაწვევისა და მობილიზაციის სამსახურის უფროსი, #60 ოზურგეთის საოლქო საარჩევნო კომისიის თავმჯდომარე და ოზურგეთის გამგებელი იყო.
ავთანდილ მექვაბიშვილის საქმიანობის პერიოდს უკავშირდება ე.წ. "ძველი ბაზრის" სკანდალური, ხმაურიანი თემა, რომლის დროსაც მოხდა მოვაჭრეების ბაზრიდან გამოძევება და აღნიშნულ ტერიტორიაზე მიწისა და სამშენებლო მასალის დაყრა. ბოლოს ბაზრის უკანა ტერიტორია აღდგენილი იქნა ყოფილი გამგებლის კოტე შარაშენიძის მიერ.
"გურია ნიუსი" აღნიშნულთან დაკავშირებით არაერთხელ წერდა.
შალვა კონჯარიასა და ავთანდილ მექვაბიშვილის დანიშვნას ოზურგეთს მუნიციპალიტეტის გამგებელი მერაბ ჭანუყვაძე "გურია ნიუსთან" ადასტურებს.
