მსოფლიოს სხვადასხვა ქვეყანაში და ქალაქში გოგონათა ძალადობისგან დაცვის საერთაშორისო დღე აღინიშნება. ამ დღისადმი მიძღვნილი ღონისძიება ქალაქ ოზურგეთშიც გაიმართა.
ქალაქის ცენტრში ახალაგზრდებმა თავისი სათქმელი პერფომანსით გამოხატეს, რომელიც ითვალისწინებდა საზოგადოებაში გოგონათა მიმართ გავრცელებული სტერეოტიპების და ბარიერების წინააღმდეგ ბრძოლას.
აქციის ერთ-ერთი მონაწილე მერი ანდღულაძე "გურია ნიუსთან" ამბობს:
"2012 წლიდან გაერთიანებული ერების ასოციაცია აღნიშნავს გოგონათა ძალადობის დაცვის დღეს. ჩვენ წარმოვადგინეთ ის ბარიერები, რომლის გადალახვა უწევს გოგონებს ცხოვრების მანძილზე. "ქალი ვიცი სახლში", "ფეხბურთი რა გოგოს საქმეა", "ბიჭები უფრო ჭკვიანები არიან ვიდრე გოგონები" და მსგავსი სტერეოტიპები, რომელიც აქტიურად არის ზოგადად გავრცელებული ჩვენს საზოგადოებაში".
ოზურგეთის მერიის განათლებისა და კულტურის სამსახურის უფროს მარინა ჯაფარიძის თქმით, სასიხარულოა, რომ ახალი თაობა ჩართულია ამ პრობლემის მოგვარებაში.
"სამოქალაქო საზოგადოების განათლების კუთხით მნიშვნელოვანი ღონისძიება იყო. მსგავსი აქტივობები ხშირად არის ჩასატარებელი."
ჯანდაცვის მსოფლიო ორგანიზაციის მონაცემებით, მთელს მსოფლიოში ყოველ მესამე ქალს ცხოვრების მანძილზე განუცდია ფიზიკური ან სექსუალური ძალადობა, ასევე სხვა ტიპის სასტიკი მოპყრობა. როგორც წესი, მოძალადე ნაცნობი ადამიანია, ხოლო ძალადობის ფაქტი ხშირად ოჯახში ხდება. შემაშფოთებელია მსოფლიოში ქალთა მიმართ ძალადობით განპირობებული სიკვდილიანობის სტატისტიკა – 16-44 წლამდე ასაკის ქალებისა და გოგონების სიკვდილიანობის და შეზღუდული შესაძლებლობების ძირითად მიზეზს ძალადობა წარმოადგენს.
ღონისძიება ახალგაზრდა პედაგოგთა კავშირის ბაზაზე არსებული ახალგაზრდული ცენტრის ინიციატივით და ორგანიზატორობით გაიმართა.
