"ბატონი გივი თარგამაძის მორიგი უსაფუძვლო ბრალდების საპასუხოდ, კომპანია "არემჯის" სახელით, შეგვიძლია განვაცხადოთ, რომ ჩამოთვლილი პიროვნებების დიდი უმრავლესობა საერთოდ არ მუშაობს ამჟამად არც თავად კომპანიაში, არც მასთან დაკავშირებულ რომელიმე ორგანიზაციაში. ერთადერთი, გივი თარგამაძის სიიდან ბატონი დავით ბალანჩივაძე გახლავთ გენერალური დირექტორის მოადგილე, თუმცა "ნაციონალური მოძრაობის" გავრცელებული ინფორმაცია მისი მე-9 არხში მუშაობასთან დაკავშირებით, არ შეესაბამება სიმართლეს. ამასთან, გვსურს გაცნობოთ, რომ საყდრისი-ყაჩაღიანის საბადოსთან დაკავშირებით, ამჟამად მიმდინარეობს ინტენსიური კონსულტაცია ყველა დაინტერესებულ მხარესთან, რათა ყველა მონაწილეს, მათ შორის, კომპანიის, თანამშრომლების, რეგიონისა და საზოგადოების სხვა ჯგუფები ინტერესები მაქსიმალურად იყოს გათვალისწინებული. ნაციონალური მოძრაობა, მისი ერთ-ერთი ლიდერის მიერ უკვე მეორედ გახმოვანებული არასწორი ინფორმაციით, ხელს უშლის საყდრის-ყაჩაღიანის პრობლემის დროულად და სამართლიანად მოგვარებას." _ ამ შინაარსის განცხადებას ავრცელებს კომპანია "არემჯი" გივი თარგამაძის ბრიფინგის საპასუხოდ.
შეგახსენებთ, რომ ერთიანი ნაციონალური მოძრაობის ერთ-ერთმა ლიდერმა, გივი თარგამაძემ დღეს მორიგი ბრიფინგი მოაწყო საყდრის-ყაჩაღიანის თემასთან დაკავშირებით.
მისი განცხადებით: "2012 წლის 1 ოქტომბრის არჩევნების შემდეგ შპს "RMG Gოლდ"-ის ხელმძღვანელობის ქართულ ნაწილში მნიშვნელოვანი ცვლილებები მოხდა. პირველი შემოტევა კომპანიამ ხუხაშვილ-ნაცვლიშვილის ტანდემისგან განიცადა, რომელიც ოქტომბრის შემდეგ ბიზნესებს ახალ მთავრობასთან ურთიერთობას "ულაგებდა".
მანვე ჩამოთვალა პიროვნებები, რომლებიც მისი განცხადებით, "არემჯიმ" გარკვეული ინტერესების გამო დაასაქმა.
გივი თარგამაძე: "საქართველოს პროკურორის მაშინდელმა პირველმა მოადგილემ, ლაშა ნაცვლიშვილმა, კომპანიის უსაფრთხოების სამსახურის უფროსად დანიშნა კახა კობახიძე (მეტსახელად "ხოკა"). კახა კობახიძეს ბიოგრაფიაში რამოდენიმე საინტერესო დეტალია. პირველი, იგი იყო ედუარდ შევარდნაძის ეპოქის უშიშროების მინისტრის, ვალერი ხაბურზანიას უახლოესი მეგობარი და მარჯვენა ხელი. ვარდების რევოლუციის შემდეგ, ბატონი კახა სამსახურიდან უშიშროების ახალმა მინისტრმა, ირაკლი ალასანიამ გაათავისუფლა, რუსეთის სპეც-სამსახურებთან მჭიდრო კავშირის გამო. ამის შემდეგ, კახა კობახიძე, თავისი მფარველივით, რუსეთში გადაბარგდა და იქ პრეზიდენტ პუტინთან დაახლოებულ ბიზნესმენების კომპანიებში მოღვაწეობდა. საქართველოს ის ლაშა ნაცვლიშვილმა დაუბრუნა, რომლის რუსეთის სპეც სამსახურებთან კავშირზე ასევე არსებობდა სერიოზული ეჭვები.
პარალელურ რეჟიმში, ფირმის გენერალური დირექტორის მოადგილის თანამდებობა დაიკავა ზაზა ბაბუნაშვილი, რომელიც ღარიბაშვილ/თამაზაშვილის კლანის წარმომადგენლის, შსს მინისტრის პირველი მოადგილის, გიორგი ზედელაშვილის ნათელ-მირონია და წლების განმავლობაში თავადაც მუშაობდა ძალოვან სტრუქტურებში (კუდი, სუსი). აქვე აღვნიშნავთ, რომ სამეთვალყურეო საბჭოს თავმჯდომარე, ზურაბ ქუთელია, თამაზაშვილის ნათესავია.
მას შემდეგ, რაც ბიზნესთან ურთიერთობები ბიძინა ივანიშვილის დეიდაშვილმა უჩა მამაცაშვილმა გადაიბარა, RMG Gold-ის მმართველობაში გამოჩნდნენ დავით ბალანჩივაძე და ნიკა ქაჩირიშვილი. გენერალური დირექტორის მრჩეველი დავით ბალანჩივაძე, წლების განმავლობაში, ტელევიზია მე-9 არხის მენეჯმენტში მოღვაწეობდა.
ამ ყოველივეს გათვალისწინებით, გასაგები ხდება, თუ ვის ინტერესებს ემსახურებოდა ის კანონდარღვევები, რომლითაც მოხდა ფირმისათვის ლიცენზიის გაგრძელება და საყდრისი-ყაჩაღიანითვის ისტორიული ძეგლის სტატუსის ჩამორთმევა." _ განაცხადა გივი თარგამაძემ.
"გურია ნიუსს" კომპანია "არემჯიში" განუცხადეს, რომ თარგამაძის მიერ ჩამოთვლილი რამდენიმე პიროვნების შესახებ საერთოდ არაფერი იციან, რადგან მათ კომპანიაში არასდროს უმუშავიათ:
"1. ბაბუნაშვილი და ქაჩირიშვილი ვინ არის, არიან საერთოდ არავინ იცის, რადგან მათ არასოდეს უმუშავიათ არემჯიში. 2. კობახიძე მუშაობდა, ოღონდ აღარ მუშაობს. თან მუშაობდა არა უსაფრთხოების, არამედ ადმინისტრაციის უფროსად. 3. ქუთელიაც აღარ არის სამეთვალყურეო საბჭოს თავმჯდომარე. 4. ბალანჩივაძე არის გენერალური დირექტორის მოადგილე და არა – მრჩეველი. რომელიც ასევე არასოდეს მუშაობდა მე-9 არხზე." _ აცხადებენ "არემჯიში".
