სპორტი, ნადირობა და თევზაობა – ინჟინერ-მექანიკოსი ახლადარჩეული გამგებლის, მშენებელი და ეკონომისტი ახლადდანიშნული მოადგილეების ჰობი აღმოჩნდა.
როგორია მათი კვალიფიკაცია, სად და რა განათლება მიიღეს? ამ შეკითხვებით "გურია ნიუსმა" მარტვილის მუნიციპალიტეტის გამგეობას მიმართა. პასუხად ყველა მათგანის CV, დიპლომის ასლი და ნაწილის ჰობიც კი მიიღო.
მაშ ასე, მარტვილის მუნიციპალიტეტის გამგებელმა, მარტვილის სოფელ ნაგვაზაოს მკვიდრმა ალექსანდრე გრიგალავამ, რომლის ჰობი (CV-ის მიხედვით) სპორტი და ხელოვნებაა, ასევე არის საბჭოთა კავშირის მრავალგზის ჩემპიონი – საქართველოს სასოფლო სამეურნეო ინსტიტუტი დაამთავრა, მექანიზცაია-ელექტროფიკაციის ფაკულტეტი. სწავლობდა 6 წლის განმავლობაში, 1974-1980 წლებში. მუნიციპალიტეტის გამგებელი, პროფესიით ინჟინერ-მექანიკოსია.
სამუშაო გამოცდილება: 1979-1989 წლებში, იგი ქუთაისის სატრაქტორო ქარხანაში ინჟინერ-კონსტრუქტორად მუშაობდა.
1989-1993 წლებში, სპორტული საზოგადოება "შევარდენის" მარტვილის რაიონული საბჭოს თავმჯდომარე იყო.
1993-1995 წლებში, მარტვილის რაიონის გამგეობაში, თავმჯდომარის პირველი მოადგილის პოსტს იკავებდა.
2004-2007 წლებში იყო გაერთიანებული სადისტრიბუციო ენერგო კომპანიის მარტვილის ფილიალის მენეჯერი.
2008-2011 წლებში, მარტვილის სასპორტო სკოლაში, მწვრთნელის პოზიციაზე მუშაობდა.
ჰყავს მეუღლე და ორი შვილი.
ფლობს ინგლისურ ენას საშუალო დონეზე, ხოლო რუსულს კარგად. ასევე, კარგადაა შეფასებული მის მიერ კომპიუტერული პროგრამების ფლობა.
გამგებლის ჰობი სპორტი და ხელოვნებაა.
არის პარტია "ქართული ოცნება – დემოკრატიული საქართველოს წევრი.
გამგებლის პირველი მოადგილე, მარტვილის მკვიდრი, გიორგი გოროზია 7 წლის განმავლობაში, 1987-1994 წლებში, საქართველოს ტექნიკურ უნივერსიტეტის სამშენებლო ფაკულტეტზე სწავლობდა. ის პროფესიით მშენებელია.
მისი სამუშაო გამოცდილება, როგორც დოკუმენტაციიდან ირკვევა, ჯერ კიდევ სტუდენტობის დროს იწყება, როცა 1992-1993 წლებში მარტვილის ადგილობრივი მმართველობის გამგეობის არქიტექტურის განყოფილებას, სტუდენტი გიორგი გოროზია ედგა სათავეში. ის განყოფილების დირექტორის პოზიციას იკავებდა.
1996-2001 წლებში იყო მარტვილის რაიონის მცირე და საშუალო ბიზნესის განვითარების ფონდის დირექტორი.
2001-2002 წლებში, მარტვილის რაიონის კომუნალური საწარმოს მთავარი ინჟინერის პოსტზე მუშაობდა.
2005-2011 წლებში კი, სოციალური დახმარებისა და დასაქმების სახელმწიფო სააგენტოს განყოფილების უფროსი იყო.
კარგად ფლობს რუსულ ენას. საშუალო დონეზე კი კომპიუტერულ პროგრამებს.
მსგავსად გამგებლისა, მისი ჰობიც სპორტია. ასევე, თევზაობა.
გამგებლის მოადგილე, მარტვილის სოფელ გაჭედილის მკვიდრი, დავით სილაგავა, რომლის ჰობიც ასევე სპორტია, ნადირობაც, 5 წლის განმავლობაში, 1993-1998 წლებში ეუფლებოდა თბილისის ბიზნესისა და მარკეტინგის უმაღლეს ინსტიტუტში, მარკეტინგის ფაკულტეტზე, ვაჭრობისა და ეკონომიკის მართვას.
მისი სამუშაო გამოცდილება 2013 წელს იწყება, როცა "ქართული ოცნება – დემოკრატიული საქართველოს" მარტვილის რაიონული ორგანიზაციის ზონის უფროსის მოადგილედ მუშაობდა.
2014 წელს იყო ამავე ორგანიზაციაში ლოჯისტიკის სამსახურის კოორდინატორი.
ფლობს რუსულ ენას კარგად, ხოლო ინგლისურს საშუალო დონეზე.
კარგად ფლობს კომპიუტერულ პროგრამებს.
მარტვილის მუნიციპალიტეტის გამგებლის წარმომადგენელი ქალაქ მარტვილში, ელენე კოკაია, 7 წლის განმავლობაში – 1990-1997 წლებში ეუფლებოდა ეკონომისტის სპეციალობას გორის სახელმწიფო ეკონომიკურ ინსტიტუტში.
2001-2005 წლებში მუშაობდა მარტვილის მრავალპროფილიან საავადმყოფოში, რიგით ბუღალტრად, ხოლო 2005-2011 წლებში მარტვილის სასწრაფო სამედიცინო დახმარების სამსახურში იყო ბუღალტერი.
საშუალო დონზე ფლობს ინგლისურ და რუსულ ენებს. ასევე, კომპიუტერულ პროგრამებს.
მის CV-შიც არის გრაფა – ჰობი, თუმცა, კონკრეტიკის გარეშე.
(ელენე კოკაიას ფოტო, მუნიციპალიტეტის გამგეობის ვებ-გვერდზე არ იძებნება)
