ყოფილი პრემიერ-მინისტრის ბიძინა ივანიშვილის განცხადებით ბოლო პერიოდში განვითარებული მოვლენების ერთ-ერთი მიზეზი მედიაში გაჩენილი "ობიექტური ანალიზის" არარსებობაა.
"დღეს არის იდეალური სიტუაცია – პირველად უახლეს ისტორიაში ხელისუფლებას არ აქვს თავისი საინფორმაციო ტელევიზია, რაც არის ძალიან კარგი. ამავდროულად, არსებობს "რუსთავი 2", რომელიც პირდაპირ აგიტაციას უწევს "ნაციონალურ მოძრაობას, ასევე რამდენიმე კერძო ტელევიზია, რომელთაც თავიანთი ბიზნესინტერესი აქვთ. ძალიან ხშირად ჭირს ობიექტური ინფორმაციის მიწოდება საზოგადოებისთვის. ვფიქრობ, მედიას აკლია კვალიფიციური ანალიზი. ობიექტური ანალიზის ვაკუუმი გაჩნდა და ეს აბნევს ძალიან ბევრ პოლიტიკოსს თუ ექსპერტს. ამის გამო ისინი ბევრ შეცდომას უშვებენ. იმის მიზეზი რაც დღეს ხდება, ბევრი შეცდომების მიზეზი ესეც არის და მე ამ შეცდომებზე უკვე ვზრუნავ", – განაცხადა ივანიშვილმა საზოგადეობრივი მაუწყებლის ეთერში.
ყოფილი პრემიერის თქმით, ისე როგორც სხვა ინსტიტუტები, მედიაც საჭიროებს განვითარებას და რაც მთავარია, საჭიროა სიღრმისეული ანალიზი.
ივანიშვილი ამბობს, რომ სწორედ ანალიტიკოსების მოსამზადებლად დააფუძნა საზოგადოება "2030", რომელშიც ძალიან ბევრი "პატივსაცემი ადამიანია" გაერთიანებული. მისივე ინფორმაციით ამავე სახელწოდებით გავა ყოველდღიური გადაცემა ტელეკომპანია ჯიდიესი-ს ეთერში, რომელსაც სამი წამყვანი ეყოლება:
_ ამ საზოგადოების ლოზუნგი გახლავთ ილიას სიტყვები "ყველამ ერთად და თითოეულმა ცალკე გავაცნობიეროთ რომ ნაწილი ვართ ერისა". ეს მუხტი გვაერთიანებს ჩვენ ხალხს და ვინც შეიძლება შემოგვემატოს კიდევ. ყველა ჩვენი აქცენტი გაკეთებული იქნება საზოგადოების ინტერესებზე და შიგნითვე ჩვენ მოვახერხებთ, რომ არ გამოგვეპაროს კერძო ან პირადი ინტერესები. ამავე სახელით ტელეპროექტი "2030" გვექნება, სადაც კვირაში ერთხელ ანალიტიკური გადაეცემა იქნება "ჯიდიესზე". გადაცემა ორშაბათიდან პარასკევის ჩათვლით იქნება და მოწვეული სტუმრებით მოხდება ანალიზი მოვლენების. საუბარი იქნება სტრატეგიაზეც და სხვადასხვა თემებზეც. კვირაობით კი 1 საათის განმავლობაში სამ წამყვანთან ერთად ძირითად ანალიზს გავაკეთებთ.
უმრავლესობასთან შეხვედრაზე ვთქვი, რომ ბევრ შეცდომას უშვებთ და ყველაფერს მიეცემა შეფასება. ნუ გგონიათ, რომ "რუსთავი 2"-ის "ნაციონალური მოძრაობის" მიერ ყირაზე დაყენებული აქცენტები ასე დარჩება, ყველაფერს მიეცემა ობიექტური შეფასება. სამწუხაროა, რომ იმ ფონზე, როდესაც აგიტაციას ერთი ტელევიზია აკეთებს და "ნაციონალური მოძრაობა" სიცრუეზე იყო ორიენტირებული და დღესაც ამას ახერხებს, სხვა ტელევიზიები ვერ ახერხებენ სიტუაციის დაბალანსებას და საზოგადოებაში არასწორი მოვლენების ინტერპრეტაცია ხდება. ჩვენ მოვახერხებთ მოვლენების სწორი ანალიზის მიწოდებას საზოგადოებისთვის. ყველა მოვლენას მიეცემა ობიექტური და სწორი შეფასება. მე გვერდით დავუდგები პოლიტიკოსებს, დავეხმარები მოვლენების გაანალიზებაში და საზოგადოება სწორ აქცენტებს გააკეთებს ყველა მოვლენაზე და ნუ ავყვებით ეიფორიას და არ დავუშვათ შეცდომები", _ აღნიშნა ივანიშვილმა.
