საქართველოს პარლამენტის ჯანდაცვის კომიტეტის თავმჯდომარის დიმიტრი ხუნდაძის წინააღმდეგ პროკურატურა რამდენიმე თვეა მოკვლევას აწარმოებს. ჯერჯერობით, არ არის დაკითხული საქმის მთავარი მოწმეები, არც ის არის ცნობილი, დაიკითხა თუ არა თავად დიმიტრი ხუნდაძე და რა ეტაპზეა გამოძიება.
“გურია ნიუსი“ 6 დღეა ცდილობს მთავარი პროკურატურიდან ინფორმაციის მოპოვებას, თუმცა საგამოძიებო ორგანოდან პასუხი ვერ მივიღეთ.
შეგახსენებთ, რომ საქმესთან დაკავშირებით, "გურია ნიუსმა“ რამდენიმე თვის წინ ორი სტატია გამოაქვეყნა: დიმიტრი ხუნდაძე, შესაძლოა, პროკურატურაში დაიბარონ და "არ მქონდა უფლება დამერეკა შსს–ში და მეთქვა, რომ არის ეჭვი, იქ მოსასმენებია?!"
ცნობისთვის, საქმე ეხებოდა 2014 წლის 28 მარტს მომხდარ შემთხვევას, როდესაც მუნიციპალიტეტის გამგეობაში დმიტრი ხუნდაძემ სატელეფონო ზარი განახორციელა, რის შემდეგაც მცხეთის მუნიციპალიტეტის გამგებლის პირველი მოადგილის, გიორგი გოგიძის ოთახი გაჩხრიკეს და დალუქეს.
როგორც შემდეგ გაირკვა, დეპუტატი დიმიტრი ხუნდაძე ეჭვობდა, რომ გიორგი გოგიძის კაბინეტიდან მასზე თვალთვალი და მოსმენა ხორციელდებოდა.
მცხეთის მუნიციპალიტეტის კულტურის სპორტის, ტურიზმისა და ახალგაზრდობის სამსახურის ყოფილი უფროსი გია კაჭარავა "გურია ნიუსთან“ საუბრისას ამბობს, რომ დიმიტრი ხუნდაძემ თავის უფლებამოსილებას გადააჭარბა და სისხლის სამართლის დანაშაული ჩაიდინა, რადგან მისი ბრძანების საფუძველზე არაკომპეტენტურმა პირებმა ოთახი გაჩხრიკეს და დალუქეს.
ფაქტთან დაკავშირებით კაჭარავამ საქართველოს პარლამენტის თავმჯდომარე დავით უსუფაშვილს, პარლამენტის იურიდიული კომიტეტის თავმჯდომარე ვახტანგ ხმალაძეს, იუსტიციის მინისტრ თეაწულუკიანს, მთავარ პროკურორ გიორგი ბადაშვილსა და სახალხო დამცველ უჩა ნანუაშვილს მიმართა, თუმცა საკითხი ამ ადამიანების ნაწილმა საერთოდ უპასუხოდ დატოვა.
როგორც კაჭარავა "გურია ნიუსთან“ საუბრისას აღნიშნავს, საქმის გამოძიებას პროკურატურაც განგებ აჭიანურებს.
"ვფიქრობ, რომ არ არიან დაინტერესებული საქმის გამოძიებით. მოგეხსენებათ, დეპუტატის მიმართ ასეთი ბრალდების გახმაურება ცუდ შედეგებს მოიტანს. ამიტომ არ ჩქარობს პროკურატურა საქმე გამოიძიოს. როგორც ჩანს, იმედი აქვთ, რომ საქმე მიჩუმდება და გამოძიებასაც შეწყვეტენ. მაქვს ინფორმაცია, რომ პროკურორს დიმიტრი ხუნდაძის დეპუტატი მეგობრები ურეკავენ და სთხოვენ, რომ საქმე გააჭიანუროს. რასაც პროკურორი არც უარყოფს და არც ადასტურებს. თუმცა, მანამ არ გავჩერდები, სანამ დამნაშავე პირი არ დაისჯება“, _ აცხადებს კაჭარავა.
თავად დიმიტრი ხუნდაძე "გურია ნიუსთან“ საუბრისას ადასტურებს, რომ მან პირადად დარეკა შინაგან საქმეთა მინისტრის მოადგილე ლევან იზორიასთან და სთხოვა გამგეობის შენობა შეემოწმებინათ, რადგან "მუსირებდა აზრი რომ იქ მოსასმენი მოწყობილობა იყო“.
"დავრეკე იმიტომ, რომ მინდოდა გამეფრთხილებინა იქედან ხომ არ ხდებოდა მოსმენა. მაგრამ, როგორც მე ვიცი, მთლიანად შეამოწმეს გამგეობა. დალუქვა?! მოიცა, ვის ვუთხარი დალუქე–მეთქი?! სისულელეა! მარტში რაღაცა მოხდა, ვთქვათ შეამოწმეს, შინაგან საქმეთა სამინისტრომ შეამოწმა, რა არ ჰქონდა უფლება? ან მე არ მქონდა უფლება დამერეკა შს სამინისტროში და მეთქვა, რომ არის ეჭვი იქ არის მოსასმენები? მე დავრეკე და ვთხოვე, ბატონ ლევან იზორიას. ფარულად იყო, ჩუმად იყო, თუ რა ხდება?!
მე უბრალოდ ლევანის უთხარი: გამგეობაში ასეთი აზრი მუსირებს, რატომ უნდა იყოს ეჭვები? თუ შეიძლება შეამოწმეთ. მე მგონი იყვნენ კიდეც. შემოწმებას მე არ დავსწრებივარ, მაგრამ ვიცი, რომ იყვნენ, შეამოწმეს და არც არაფერი აღმოჩნდა იქ. … მერე ეს დალუქვაა? კაი ერთი. მე გეტყვით. მთლიანად უნდა შეემოწმებინათ. რადგან ეჭვი იყო, რომ იმ ოთახებში შეიძლება ყოფილიყო. ისე, რომ დალუქეს და "ყარაული" დაუყენეს ასე არ იყო. როცა ითქვა, ამ ოთახს უნდა მიაქციოთ ყურადღება, სანამ იქ ის მოვიდოდა (გულისხმობს შსს.ავტ.) თვითონ გამგეობას დაცვა ჰყავს, შეიძლება იმათ გადაწყვიტეს, რადგან პასუხისმგებლობა ჰქონდათ და ყურადღება მიაქციეს“, _ აცხადებდა ხუნდაძე.
დეპუტატის მიმართვას შსს-ში კატეგორიულად უარყოფენ და ამბობენ, რომ "შინაგან საქმეთა სამინისტროსთვის მსგავსი ფორმატით არავის მოუმართავს. არანაირი შეტყობინება არ შემოსულა. შესაბამისად, იქ პოლიცია ვერ მივიდოდა."
თუმცა, მცხეთის მუნიციპალიტეტის ყოფილი გამგებელი გივი გიუტაშვილი აღნიშნავს, რომ მისი მოადგილის კაბინეტის დალუქვის მეორე დღეს სამინისტროდან ჩამოსულმა ჯგუფმა გამგეობის შენობა ვიზუალურად დაათვალიერა, თუმცა საეჭვო არაფერი უპოვიათ.
"ამ შემთხვევიდან მეორე დღეს მოვიდნენ სამართალდამცველები. რამე აღმოაჩინეს თუ არა მე როგორ მეტყოდნენ?! უბრალოდ, ვიზუალურად დაათვალიერეს ოთახი და წავიდნენ. ერთადერთი ის ვიკითხე, რამე ხომ არ ხდება–მეთქი და არანაირი პრობლემა არ არისო, – მითხრეს. მე როგორც ვიცი, სამინისტროდან იყო ეს ჯგუფი მოსული“, _ აცხადებს გიუტაშვილი.
რაც შეეხება მისი მოადგილის კაბინეტის დალუქვას, რაზეც სპეციალური ოქმიც შედგა და ხელს 6 პირი აწერს, გიუტაშვილი ამბობს, რომ მან არ იცის, ვისი ბრძანების საფუძველზე დალუქეს ოთახი და ვინ შეადგინა ეს ოქმი.
"მაგ პროცესს მე არ ვესწრებოდი, გასული ვიყავი. საღამოს მივედი და გავარკვიე ყველაფერი. ზუსტად ხუნდაძემ მიუთითა თუ არა თანამშრომლების ოთახის დალუქვაზე, მეც არ ვიცი, შეიძლება მეც ვუთხარი რომ დროებით, დაეტოვებინათ ოთახი, სანამ შემოწმება მოხდებოდა. პროცესს არ ვესწრებოდი, მაგრამ ხელი მოვაწერე, სხვადასხვა სამსახურები ხომ ესწრებოდნენ?!“, _ აცხადებს გიუტაშვილი.
კითხვაზე, თუ ოთახის აღწერას არ ესწრებოდით, ოქმს ხელი რატომ მოაწერეთ? – გიუტაშვილი გვპასუხობს: "რა? არ უნდა მომეწერა? აღწერა მოხდა, მერე რა? სხვა თანამშრომლები ესწრებოდნენ ამ აღწერას და მითხრეს რომ ყველაფერი წესრიგში იყო, ამიტომ მოვაწერე ხელი“, _ ამბობს მუნიციპალიტეტის ყოფილი გამგებელი.
მცხეთის მუნიციპალიტეტის სამეურნეო სამსახურის ყოფილი უფროსი, ამჟამად დეპუტატ დიმიტრი ხუნდაძის თანაშემწე კახა ბურდული, რომელმაც დალუქვის გადაწყვეტილება ხუნდაძის მითითების საფუძველზე მიიღო, დეტალებზე საუბრისაგან თავს იკავებს.
"ამ საკითხზე კომენტარის გაკეთებას არ ვაპირებ, ვიყავი პროკურატურაში დაბარებული და ჩვენება მივეცი, რაიმე მასალები თუ გაინტერესებთ, იქედან მოითხოვეთ“, _ აღნიშნავს ბურდული და დასძენს, რომ მან ჩვენება მცხეთის პროკურატურაში დაახლოებით 2 თვის უკან მისცა.
დამატებით კომენტარს არ აკეთებს არც საქმის საპროცესო ზედამხედველი პროკურორი ლადო ნარინდოშვილი. მან "გურია ნიუსს“ უთხრა, რომ "აღნიშნული საკითხის შესწავლა მიმდინარეობს“ დამატებით დეტალებზე კომენტარისთვის კი მთავარი პროკურატურის პრესსამსახურთან გადაგვამისამართა.
დაარღვია თუ არა კანონი დეპუტატმა დიმიტრი ხუნდაძემ, ამ კითხით "გურია ნიუსმა“ იურისტებს მიმართა.
მათ პასუხებს მოგვიანებით შემოგთავაზებთ.
