13 იანვარს, სპორტისა და ახალგაზრდობის საქმეთა მინისტრმა ლევან ყიფიანმა პრესკონფერენცია გამართა და სამინისტროში მიმდინარე რეორგანიზაციაზე ისაუბრა.
2015 წლის 5 იანვრის მთავრობის დადგენილებით, საქართველოს სპორტისა და ახალგაზრდობის საქმეთა სამინისტროს დებულებაში ცვლილებები შევიდა.
სამინისტროში ჩატარებული ანალიზის შემდეგ გადაწყდა, რომ სამინისტროს უფრო ეფექტურად მუშაობისა და ახალი გამოწვევების – სპორტის და ახალგაზრდობის პოლიტიკის დოკუმენტების ცხოვრებაში გასატარებლად ჩატარებულიყო რეორგანიზაცია. სამინისტროში ჩამოყალიბდა საერთაშორისო ურთიერთობებისა და ევროინტეგრაციის დეპარტამენტი, რომლის ფუნქციებში შედის სპორტისა და ახალგაზრდობის მიმართულებით ევროკავშირსა და საქართველოს შორის დადებული ასოცირების შეთანხმებით აღებული ვალდებულებების შესრულება.
რეორგანიზაცია შეეხო სპორტის და ახალგაზრდულ დეპარტამენტებს, სადაც კვალიფიციური მუშაობისთვის ცალკე სამმართველოებად ჩამოყალიბდა კვლევისა და ანალიზის სამართველოები. სამინისტროში უცვლელი დარჩა არსებული 91 კაციანი საშტატო ნუსხა. შემცირდა ერთი მოადგილის შტატი, რომლის ფუნქციების შესრულება დაევალა მინისტრის პირველ მოადგილეს. კანონით განსაზღვრულ ვადაში სამინისტროში გამოცხადდება კონკურსი, სადაც მოხდება კვალიფიციური კადრების შერჩევა.
