"ინფორმაციის თავისუფლების განვითარების ინსტიტუტის" ყოფილი ხელმძღვანელის გიორგი კლდიაშვილის საქმე პროკურატურამ სააპელაციო სასამართლოში გაასაჩივრა.
როგორც კლდიაშვილი ამბობს, ის იმედოვნებს, რომ სააპელაციო სასამართლო პირველი ინსტანციის გადაწყვეტილებას ძალაში დატოვებს.
"პროკურატურამ გაასაჩივრა გადაწყვეტილება, რომლის მიხედვითაც ჩემს წინააღმდეგ სისხლის სამართლის დევნა შეწყდა. აქ იყო რამდენიმე საკითხი, უპირველესად ის, რომ სასამართლომ კანონიერად არ სცნო მტკიცებულებები. საუბარია შსს-ს კრიმინალური პოლიციის ერთ-ერთი თანამშრომლის დაკითხვის ოქმზე, რომლის პატაკის საფუძველზეც დაიწყო გამოძიება. აქ იყო შეცდომა დაშვებული, მაგრამ შეცდომის გარდა, ჩვენ გვქონდა ორი განსხვავებული დოკუმენტი.
ანუ ჩვენ ჩაგვბარდა დოკუმენტი, რომელიც იყო განსხვავებული თარიღით და შიგნით როგორც შრიფტი, ასევე სიტყვებიც იყო შეცვლილი, ხოლო ბრალდებას ჰქონდა მეორე დოკუმენტი. აქ რაზეა საუბარი გამოძიება დაადგენს, რადგან ორი განსხვავებული დოკუმენტის წარმოდგენა სასამართლოში თავისთავად ბევრ ეჭვს ბადებს.
ამის საფუძველზე, სხვა მტკიცებულბები – ჩხრეკის ოქმი, იარაღის ამოღების ოქმი, სასამართლომ უკანონოდ სცნო და შესაბამისად, მტკიცებულებების არარსებობის გამო შეწყვიტა საქმე.
ანუ სასამართლომ აღნიშნა, რომ სისხლის სამართლის დანაშაულის ნიშნები ჩემს საქმეში არ არსებობდა.
თუმცა, საქალაქო სასამართლოს გადაწყვეტილება ბრალდების მხარემ სააპელაციოში გაასაჩივრა. ჩემმა ადვოკატებმა, რომლებიც საიას- წარმომადგენლები არიან, შესაგებლით რა თქმა უნდა უპასუხეს.
დღეს ან ხვალ ცნობილი გახდება დაუშვებს თუ არა თბილისის სააპელაციო სასამართლო ამ საქმეს განსახილველად.
ვიმედოვნებ, რომ სააპელაციო პირველი ინსტაციის გადაწყვეტილებას ძალაში დატოვებს. ესაა პროკურატურის ბოლო მცდელობა“, _ აღნიშნა კლდიაშვილმა "გურია ნიუსთან“ საუბრისას.
