საზღვაო ტრანსპორტის სააგენტო "გურია ნიუსის“ ვებგვერდზე გამოქვეყნებულ მასალას ეხმაურება:
"მიმდინარე წლის 6 თებერვალს სსიპ საზღვაო ტრანსპორტის სააგენტოს დაუკავშირდა საინფორმაციო სააგენტო „გურია ნიუსის“ ჟურნალისტი, ზურა ბაუჟაძე, თურქეთში მყოფი ქართველი მეზღვაურების შესახებ მომხდარი შემთხვევასთან დაკავშირებით და სააგენტოს ვებგვერდზე გამოაქვეყნა ინფორმაცია, რომლის თანახმადაც, გემი, რომელზეც ქართველი მეზღვაურები იმყოფებოდნენ, იძირებოდა და მიმდინარეობდა სამაშველო სამუშაოები მეზღვაურთა გადასარჩენად ვერტმფრენის მეშვეობით.
ზემოაღნიშნულის საფუძველზე სააგენტო დაუკავშირდა თურქეთის რესპუბლიკის სანაპირო დაცვას და სამსუნის ნავსადგურის კონტროლის სამსახურს ინფორმაციის გადასამოწმებლად. როგორც აღმოჩნდა ეს იყო გემი „Gulf Rio”, რომელიც ჯერ კიდევ 7 იანვარს ქალაქ სამსუნთან შეჯდა მეჩეჩზე. მასზე მართლაც იმყოფებოდა 4 ქართველი მეზღვაური და საზღვაო ტრანსპორტის სააგენტომ ინციდენტის დღესვე საგარეო საქმეთა სამინისტროსთან ერთად კოორდინირებული ქმედებით მოახდინა მყისიერი რეაგირება მეზღვაურთა დასახმარებლად. შემთხვევის დღესვე მოხდა გემის სრული ეკიპაჟის ევაკუაცია თურქეთის სამაშველო სამსახურების მიერ.
ამით გვინდა დავაზუსტოთ, რომ „გურია ნიუსის“ ჟურნალისტის მიერ გავრცელებული ინფორმაცია, რომელიც თარიღდება 6 თებერვლით გემ „Gulf Rio“-ს ჩაძირვასთან დაკავშირებით, სინამდვილეში მოხდა 7 იანვარს, რაზეც როგორც ზემოთ ავღნიშნეთ განხორციელდა რიგი ქმედებები და დღევანდელი ინფორმაცია არ შეესაბამება სიმართლეს.
მსგავსი გაუგებრობების თავიდან აცილების მიზნით სსიპ საზღვაო ტრანსპორტის სააგენტო თხოვნით მიმართავს ყველა მედია საშუალებას სანამ გადაუმოწმებელ ინფორმაციას გაავრცელებენ, დარწმუნდნენ მის სისწორეში“ _ აღნიშნულია სააგენტოს მიერ „გურია ნიუსისთვის გამოგზავნილ ოფიციალურ წერილში.
ზურა ბაუჟაძე, სტატიის ავტორი: "ნიუსი, რომელიც ვებგვერდზე გამოქვეყნდა. თურქულ სააგენტოზე დაყრდნობით მომზადდა, რაც მითითებული იყო მასალაში.
მასალის გამოქვეყნებამდე დავუკავშირდი საზღვაო ტრანსპორტის სააგენტოს საზოგადოებასთან ურთიერთობის სამსახურის უფროსს, ანანო გომართელს, რომლის განმარტებით მომხდარის შესახებ სააგენტოს ინფორმაცია ამ ეტაპზე არ გააჩნდა.
საბოლოოდ, თურქულ გამოცემაზე დაყრდნობით მომზადდა ნიუსი, რომელშიც, როგორც აღვნიშნე, მითითებული იყო წყაროც, უწყების პრესსამსახურის კომენტარიც და ის ფაქტიც, რომ გემი მეჩეჩზე უკვე ერთი თვეა, ზის.
თუკი სააგენტოში იცოდნენ, რომ თურქული მედიით გავრცელებული ინფორმაცია, რომელსაც „გურია ნიუსი“ დაეყრდნო, არ იყო ზუსტი უნდა გაერკვიათ დროულად და მათგან არ უნდა მიგვეღო პასუხი, რომ საქმის კურსში არ იყვნენ.
აღსანიშნავია, რომ სააგენტოს მხრიდან რეაგირება მას შემდეგ მოხდა, რაც გამოქვეყნებული მასალით სხვა მედიასაშუალებები დაინტერესდნენ."
