"ან ტარიფი უნდა გაიზარდოს, ან ელექტროენერგიის გათიშვები დაიწყება"
სტატისტიკის თანახმად, ქვეყანაში თითქმის ყოველწლიურად ელექტროენერგიაზე მოთხოვნა იზრდება. იმის ფონზე, რომ 2015 წელს ეს მაჩვენებელი კიდევ უფრო გაიზრდება, ექსპერტთა ნაწილის ვარაუდით, ეს შესაძლოა პირდაპირ აისახოს დენის ტარიფზე.
საქმე ისაა, რომ ელექსტროენერგიაზე მოთხოვნის ზრდა, თუ სახლემწიფო ჰესების მშენებლობას არ დაიწყებს და დაწყებულს არ დააჩქარებს, იმპორტის გაზრდას გამოიწვევს. ეს უკანასკნელი კი ტარიფის ზრდას. თანაც, თუ გავითვალისიწნებთ იმ ფაქტორს, რომ ლარის კურსი ბოლო პერიოდში საგრძნობლად დავარდა, ექსპერტთა ვარაუდოთ, პროცესი გარდაუვალია.
ზემოთ თქმულს ადასტურებს ენერგეტიკის სამინისტროს მიერ "გურია ნიუსისთვის" მოწოდებული ცხრილიც:
უწყებაში აცხადებენ, რომ გასულ წელთან შედარებით მიმდინარე წელს იმპორტის 15 პროცენტით გაზრდა იგეგმება, რაც ექსპერტთა აზრით, შესაძლოა, დენის ტარიფზეც აისახოს, აღნიშნულს საპარლამენტო უმცირესობაშიც ეთანხმებიან.
პარლამენტის საფინანსო-საბიუჯეტო კომიტეტის წევრ ზურაბ მელიქიშვილის განცხადებით, გარკვეულ პერიოდში ენერგოსფეროში მდგომარეობა გართულდება. თუმცა, გამოიწვევს თუ არა ეს დენის ტარიფის ზრდას, როგორც დეპუტატი "გურია ნიუსთან" აღნიშნავს, ეს მთავრობაზეა დამოკიდებული.
"ან ტარიფი უნდა გაიზარდოს, ან ელექტროენერგიის გათიშვები დაიწყება," _ ამბობს დეპუტატი.
იმისათვის, რომ ელექტროენერგიაზე მზარდი მოთხოვნა დაკმაყოფილდეს, გარკვეული საფუძველი არსებობს – საკმაოდ ბევრი ელექტროსადგურის მშენებლობაა დაწყებული და ზოგიც პროექტირების სტადიაშია, თუმცა როგორც ენერგოექსპერტი რევაზ არველაძე "გურია ნიუსთან" განმარტავს, მშენებლობების ტემპი არ არის საკმარისად სწრაფი. შესაბამისად, ექსპერტი არ გამორიცხავს, რომ იმპორტის ზრდა გახდეს საჭირო.
საქართველომ საბჭოთა კავშირის დაშლის შემდეგ, ისევე, როგორც სხვა რესპუბლიკებმა, მთელი სათბობენერგეტიკული კომპლექსი, ფაქტობრივად, ნულოვანი ღირებულებით მიიღეს.
"ასეთ დროს ტარიფში ინვესტიციების გამოსყიდვის წილი ძალიან დაბალია ან საერთოდ არ არის. ასეთ ენერგეტიკულ სისტემაში ნებისმიერი ახალი სიმძლავრის შეყვანა აუცილებლად გამოიწვევს ტარიფის ზრდას. ე.ი. თვითონ ჩვენი ენერგეტიკული სისტემის განვითარება გამოიწვევს ტარიფის ზრდას და იმპორტის წილის გაზრდა, რომელიც ბუნებრივია, უფრო ძვირი ღირს, ვიდრე შიდა სადგურებზე წარმოებული ელექტროენერგია, ცხადია, რომ ასევე გამოიწვევს ტარიფის ზრდას," _ ამბობს ენერგოექსპერტი.
არველაძის ვარაუდით, იმ შემთხვევაში, თუ არსებულ ტარიფში რამე რეზერვია დაგროვებული, შესაძლებელია, ზრდა არც მოხდეს. თუმცა, ლარის კურსის ცვალებადობამ ეს რეზერვი შესაძლოა მთლიანად ნულზე დაიყვანოს და ტარიფის ზრდა მაინც აუცილებელი გახდეს.
"წესით, ახლაც უნდა გამოეწვია ზრდა, მაგრამ იცით, რომ ხელისუფლება ჩაერთო ამ ამბებში. თუმცა, ვფიქრობ, ტარიფების ხელოვნურად შეჩერება არაჯანსაღი პროცესია. ლარის კურსის ვარდნა ასე თუ გაგრძელდა, თავისთავად ცხადია, ტარიფებს ხელოვნურად ვეღარ გააჩერებენ," _ ამბობს რევაზ არველაძე.
ამდენად, ზემოთ მოყვანილი ფაქტორების გათვალისწინებით, დენის ფასის გაზრდა გარდაუვალია, მით უფრო, ლარის კურსის გაუფასურების ფონზე.
