ის სიმღერა ხომ იცით? მზე დამაქვს ხურჯინით და… დილიდან დილამდე… ჰოდა, ასე დამაქვს ხურჯინით ეროვნული ვალუტის ავადმყოფობა. ავად არის ლარი, ვირუსი შეეყარა და უკვე აშკარაა, რომ კომატოზურ მდგომარეობამდე მივიდა.
ხელისუფლებს ცდილობს რეანიმაციას ააცილოს ვალუტა, მაგრამ ამ საქმიდან ჯერჯერობით არაფერი გამოსდის. სამაგიეროდ, ყოფილი ხელისუფლების წევრებს გამოსდით და ღიად აცხადებენ, რომ ამჟამინდელი ხელისუფლება უუნაროა. მაგალითად კი სწორედ ლარის მდგომარეობა მოჰყავთ და ძნელია შეედაო.
***
სხვათა შორის, დავაზე გამახსენდა და ზაზა პაპუაშვილმა ყოფილ ხელისუფლებას ყოფილი ამბები გაუხსენა და დაკარგული ტერიტორიები სულ კილომეტრობით გაუზომა. ნაციონალური მოძრაობის წევრებმა დუმილი ამჯობინეს, მაგრამ ამ დუმილს უკან რა იმალება, კი ხვდებით თქვენც, მეც და… ტრიფონიც. ჰო, ტრიფონმა უკრაინაშ გიორგი ვაშაძეც წაიყვანა სამუშაოდ და ამ კაცმა ერთი დასაქმების ბიურო რომ გააკეთოს, დამიჯერეთ, ძალიან საინტერესო იქნება. საინტერესო და წარმატებული. ისეთი წარმატებული კი არა, საქართველოში სასამართლოს და პენიტენციალური სისტემის რეფორმა რომ იყო, არამედ მართლა წარმატებული, მაგრამ ამბიცია აქვს სხვა ჩვენს ტრიფონს და სწორედ მის დაკმაყოფილებას ცდილობს უკრაინაში. ისე, მახსოვს, უკრაინაში ტრიფონია ადრე სხვა რამის დასაკმაყოფილებლად დაფირნავდა ხოლმე, კარგი დრო რომ იყო… მისთვის კარგი, თორემ ჩვენთვის… პრიონციპში, ჩვენთვის, რიგითებისთვის ეს კარგი დრო არა და არ დადგა. არადა, უკეთესის დაპირება თუ მოლოდინი იყო თითქოს.
***
სიმღერით დავიწყეთ და სიმღერითვე გავაგრძელოთ – „ყვარყვარე შენ შეგვიწყალე, ყვარყვარე შენ შეგვიბრალე“… ხომ გახსოვთ სიმღერა ფილმიდან „ყვარყვარე თუთაბერი“?!
დაახლოებით, ანალოგიურ ტექსტს ღიღინებს ქვემო ქართლის ყოფილი (ოღონდ ეს სხვა დროის ყოფილია) გუბერნატორი ლევან მამალაძე. მას დაუსწრებლად 17 წელი აქვს მისჯილი და ახლა მარგველაშვილისგან შეწყალებას ითხოვს, სამშობლოში დამაბრუნე, ჩემს მიწაზე ფეხიშიშველმა გავიაროო. ზოგადად, ცვრიან ბალახზე თუ ფეხშიშველმა არ გავიარე, რაა მამული, მაგრამ მამალაძის ზეობის პერიოდში, მის გარდა, ქვემო ქართლში თითქმის ყველა ფეხშიშველა რომ დადიოდა, კი მახსოვს და რა ვიცი… თუ უნდა შეიწყალოს პრეზიდენტმა, თუ უნდა ნუ შეიწყალებს, მაინც ისეთები შეიწყალეს თავის დროზე, მამალაძე რა მოსატანია…
***
ეგეც თქვენი ლუკა კურტანიძე? ორი დღეა, პარლამენტარია და გოგა ხაჩიძეზე პიტბულივით გაიწია. ხაჩიძემ თავის მხრივ საკანონმდებლო ინიციატივა წარმოადგინა, კურტანიძემ დაუწუნა და მოდით, ასე ვიტყვი – მომღერალ ხაჩიძის მიერ პარლამენტში წარდგენილ კანონპროექტს მოჭიდავე კურტანიძე რომ დაიწუნებს, სწორედ მანდ გვაქვს… (არ დამიწერს ამ სიტყვას რედაქტორი და თავად დააბოლოვეთ).
***
სიმღერით დაწყებული, ცეკვით დავასრულოთ – მხატვრული ფილმი „ლაზარე“ ხომ გახსოვთ? გშია? იცეკვე… ჰოდა, ლარმა თუ ასე განაგრძო, ამ ფრაზას ხშირად გავიგებთ… შორიდან კი არა, აქვე, ახლოს… ჩვენს ოჯახებში…
